ДЕТСКИ ПОГЛЕД: ИЗБОР НА ПЛАКАТИ ЗА ДЕТСКИ ФИЛМОВИ ОД ЗБИРКАТА ФИЛМСКИ ПЛАКАТИ НА ХРВАТСКИОТ ДРЖАВЕН АРХИВ (ХДА)

9 ЈАНУАРИ (СРЕДА), 19:00 ч.

БРКАНИЦА ПО МОТОРОТ

(Jurnjava za motorom )

Игран филм, Хрватска (СФР Југославија)

1959 г., 50 мин., црно-бел, ДСП

Режија: Бранко Мајер (Branko Majer)

Сценарио: Славко Колар (Slavko Kolar)

Улоги: Аугуст Чилиќ, Мирослав Чрљенец, Звонимир Ференчиќ, Соња Лихтер, Младен Шермент (August Cilić, Miroslav Črljenec, Zvonimir Ferenčić, Sonja Lihter, Mladen Šerment)

Филмот БРКАНИЦА ПО МОТОРОТ е снимен според хумористичната приказна за деца „Брканица на мотор“ на хрватскиот книжевник Славко Колар, кој сценаристички ја адаптирал за филм.

Главниот јунак е дете по име Мацан, од Загреб, кое го моли татко му да појде заедно со него во едно село, каде што треба да им поправи земјоделска машина на роднините. Момчето е фасцинирано од моторот на татко му и секогаш сака да се вози со него, па и покрај строгата забрана да не седнува на моторот, ја користи првата можност да се направи важен пред селанчињата. Седнува на моторот со намера само да им покаже како се управува со мотор „во место“, но едно од децата го стартува моторот, тој тргнува и не може да запре. Авантурата започнува, се крева тревога и целото село е во потрага по малиот моторџија…

 

9 ЈАНУАРИ (СРЕДА), 20:00 ч.

ПИКО

(Piko)

Игран филм, Хрватска (СФР Југославија)

1959 г., 47 мин., црно-бел, ДСП

Режија: Среќко Вејганд (Srećko Weygand)

Сценарио: Среќко Вејганд (Srećko Weygand)

Улоги: Дамир Вугринец, Марија Кон, Хермина Пипиниќ, Иван Шубиќ (Damir Vugrinec, Marija Kohn, Hermina Pipinić, Ivan Šubić)

 

ПИКО, како и БРКАНИЦА ПО МОТОРОТ, се среднометражни детски филмови снимени во 1959 година во продукција на „Зора филм“ од Загреб.

Пико е момче чии родители се презафатени со нивните професионални кариери, постојано се на работа или се зафатени со други обврски. На Пико му недостигаат родителската љубов, нежност и внимание, па затоа бега од домот. Сега е сам на улиците на градот…

 

 

 

 

ДЕТСКИ ПОГЛЕД: ИЗБОР НА ПЛАКАТИ ЗА ДЕТСКИ ФИЛМОВИ ОД ЗБИРКАТА ФИЛМСКИ ПЛАКАТИ НА ХРВАТСКИОТ ДРЖАВЕН АРХИВ (ХДА)

11 ЈАНУАРИ (ПЕТОК), 12:00 ч.

СИН ГАЛЕБ

(Sinji galeb)

Игран филм, Хрватска (СФР Југославија)

1953 г., 91 мин., црно-бел, ДСП

Режија: Бранко Бауер (Branko Bauer)

Сценарио: Бранко Бауер , Јосип Барковиќ, Тоне Селишкар (Branko Bauer, Josip Barković, Tone Seliškar)

Улоги: Суад Ризванбеговиќ, Јосип Батистиќ, Виктор Бек, Фрањо Бенковиќ (Suad Rizvanbegović, Josip Batistić, Viktor Bek, Franjo Benković)

Снимен според новелата на писателот Тоне Селишкар, СИНИОТ ГАЛЕБ е приказна за Иве, едно сиромашно момче кое сака да ја „откупи“ честа на неговиот татко. Дејствието на филмот е сместено меѓу двете светски војни и се одвива на далматински остров, во новелата познат како Галебовиот остров, а Бауер е еден од најпознатите ексјугословенски режисери на филмови за деца и младинци.

Татко му на Иве меѓу мештаните е познат како „Бразилецот“, бидејќи минал многу години пловејќи по морињата и океаните. Мештаните се рибари кои ловат со нивните чамци на весла, па „Бразилецот“ им предложил да се здружат, да соберат пари за модерен брод со мотор, со кој ќе можат да пловат подалеку и да уловат повеќе риба. Тие со тешки маки собираат пари, му ги даваат на „Бразилецот“ да купи нов брод, но тој ќе ги прокоцка. Налутените мештаните ќе го претепаат и ќе го протераат од островот, а мајка му на Иве ќе умре, па тој останува сам. Да не е милоста на соседите, би умрел од глад.

„Бразилецот“ се враќа на островот да моли за милост пред смртта и уште еднаш да го прегрне синот. По смртта на татко му, Иве го наследува руинираното рибарско бротче „Синиот галеб“. Сака да го реновира и да го оспособи за риболов, па ја формира „Дружината синиот галеб“. Децата на островот го бојкотираат, освен девојчето Милева, кое ќе влијае Иве сепак да биде прифатен и од другите. Кога ќе го оспособат бротчето, тоа ќе биде запленето од рибарите како компензација за штетата што им ја нанел таткото на Иве. Сепак, Иве и децата успеваат да го повратат бротчето и да испловат на отворено море, каде што ќе наидат на силна бура. Тогаш започнува авантурата од која можат да се спасат само ако се сложни другари…

 

11 ЈАНУАРИ (ПЕТОК), 19:00 ч.

ДРУЖИНАТА НА ПЕРО ЏУМКАТА

(Družba Pere Kvržice)

Игран филм, Хрватска (СФР Југославија)

1970 г., 96 мин., колор, ДСП

Режија: Владимир Тадеј (Vladimir Tadej)

Сценарио: Владимир Тадеј, Мато Ловрак (Vladimir Tadej, Mato Lovrak)

Улоги: Младен Васари, Предраг Вуковиќ, Берислав Кокот, Борис Дворник, Антун Врдољак (Mladen Vasary, Predrag Vuković, Berislav Kokot, Boris Dvornik, Antun Vrdoljak)

 

Снимен според популарниот роман за деца „Дружината на Перо Џумката“ на хрватскиот книжевник Мато Ловрак, истоимениот филм со неговиот успех неколку години подоцна ќе иницира екранизација на уште еден роман на Ловрак, „ВОЗОТ В СНЕГ („Vlak u snijegu “), во режија на Мате Реља (Mate Relja), продолжувајќи ја завидната продукција на филмови за деца и младинци во Хрватска во 70-те години од минатиот век.

ДРУЖИНАТА НА ПЕРО ЏУМКАТА е авантуристички филм за деца. Перо Џумката е бистро и снаодливо, но палаво дете. Во неговото село постои напуштена воденица, што престанала да работи заради неслогата на жителите кој да ја одржува. Перо и неговите другарчиња тајно започнуваат да ја преуредуваат старата воденица, со намера таа да им служи и како здание во кој ќе си играат преку летото.

За да ја спречи повторната активност на старата воденица, сопственикот на новата и модерна за тоа време воденица на пареа сака да ги подмити селаните да останат негови муштерии. Но, детската дружина предводени од Перо, со помош на селкиот учител, успеваат да ја оспособат воденицата и да им ја вратат на селаните.

Поучната филмска приказна за слогата стекнала голема популарност во тогашна Југославија, а филмот со успех е прикажуван и во Западна Европа, САД и Јапонија.

 

 

12 ЈАНУАРИ (САБОТА), 19:00 ч.

ВОЛК САМОТНИК

(Vuk samotnjak)

Игран филм, Хрватска (СФР Југославија)

1972 г., 90 мин., колор, ДСП

Режија:Обрад Глушчевиќ (Obrad Gluščević)

Сценарио: Обрад Глушчевиќ, Стјепа Перовиќ (Obrad Gluščević, Stjepa Perović)

Улоги: Славко Штимац, Жељко Матаија, Иван Штимац (Slavko Štimac, Željko Mataija, Ivan Štimac)

ВОЛК САМОТНИК е приказна за пријателството меѓу едно дете и еден пес, сместена во суровиот пејзаж на Лика, Хрватска, веднаш по завршувањето на Втората светска војна. Детето Ранко (Славко Штимац) наоѓа голем германски овчар во планините, фатен во замка за дивеч. Го ослободува и се спријателува со него.

Песот има ремче на вратот со плочка на која пишува Hund, па Ранко мисли дека тоа е неговото име и го вика така, иако hund на германски значи – пес, куче. Бидејќи е од расата германски овчар, Хунд личи на волк, па жителите во селото на Ранко мислат дека се работи за опасен волк самотник и сакаат да го убијат. Ранко не се согласува со нив и скришно му носи храна во планината, а Хунд во една прилика му го спасува животот од напад на вистински волк. Селаните земаат пушки во рацете и организираат хајка да го уловат Хунд, бидејќи сметаат дека тој е волкот самотник што им ги заклал овците во едно бачило, а Ранко се обидува да го спаси неговиот пријател…

ВОЛК САМОТНИК е дебитантски филм на детето-натуршчик Славко Штимац, кој подоцна стана актерска легенда на југословенска кинематографија (наречен и „Ширли Темпл на југословенскиот филм“), чија кариера трае и ден денес, со повеќе од 60 улоги.

 

 

ДЕТСКИ ПОГЛЕД: ИЗБОР НА ПЛАКАТИ ЗА ДЕТСКИ ФИЛМОВИ ОД ЗБИРКАТА ФИЛМСКИ ПЛАКАТИ НА ХРВАТСКИОТ ДРЖАВЕН АРХИВ (ХДА)

15 ЈАНУАРИ (ВТОРНИК), 12:00 ч.

КАПЕТАН МИКУЛА МАЛИ

(Kapetan Mikula Mali)

Игран филм, Хрватска (СФРЈ Југославија)

1974 г., 95 мин., колор, ДСП

Режија: Обрад Глушчевиќ (Obrad Gluščević)

Сценарио: Обрад Глушчевиќ, Стјепан Шешељ (Obrad Gluščević, Stjepan Šešelj)

Улоги: Петре Прличко, Тончи Видан, Јошко Пажанин, Манојло Цвијановиќ (Petre Prličko, Tonči Vidan, Joško Pažanin, Manojlo Cvijanović)

КАПЕТАН МИКУЛА МАЛИ е воена драма од Втората светска војна, инспирирана од животната сторија на момчето Фране Томаш од местото Крила Јесенице (Krila Jesenice), за време на фашистичката окупација на далматинското крајбрежје. Тој во 1943 и 1944 година со трабакула (мал брод) ги превезувал ранетите партизани и бегалците пред налетите на германската војска на ослободениот остров Вис во Јадранското Море кој бил под контрола на Народноослободителната војска и сојузниците.

Микула Мали (Видан) е дванаесетгодишник кој го презема бротчето од неговиот дедо Микула Велики (Прличко) и со другарите Цико (Пажанин) и Комушина (Цвијановиќ). Микула Мали со неговата итрина успешно ги избегнува патролите на бродовите на германската и италијанската фашистичка војска, спасувајќи ги бегалците од погромот. Борбените авантури на Микула Мали и неговите другари се проследени со загриженоста на дедото Микула (гласот на ликот барба Микула, што го игра Прличко, е нахсинхронизиран од сплитскиот актер Шпиро Губерина [Špiro Guberina], заради специфичниот далматински акцент), но и со многу комични случки.

Историјата на екс-Ју кинематографијата забележала дека Ј.Б. Тито директно го поттикнал снимањето на филмот, кој имал и голем меѓународен успех (прикажуван во САД, Европа, земји од Африка, Латинска Америка и Блискиот Исток, потоа Индија, Индонезија, Филипини, Кореја…), а подоцна е преточен и во популарна ТВ серија.

 

ДЕТСКИ ПОГЛЕД: ИЗБОР НА ПЛАКАТИ ЗА ДЕТСКИ ФИЛМОВИ ОД ЗБИРКАТА ФИЛМСКИ ПЛАКАТИ НА ХРВАТСКИОТ ДРЖАВЕН АРХИВ (ХДА)

16 ЈАНУАРИ (СРЕДА), 12:00 ч.

 

ТАЈНАТА НА СТАРИОТ ТАВАН

(Tajna starog tavana)

Игран филм, Хрватска (СФР Југославија), Чехословачка

1984 г., 101 мин., колор, ДСП

Режија: Владимир Тадеј (Vladimir Tadej)

Сценарио: Јарослав Петрик, Владимир Тадеј (Jaroslav Petrík, Vladimir Tadej)

Улоги: Марио Мирковиќ, Јири Гурица, Нина Петровиќ (Mario Mirković, Jirí Guryca, Nina Petrović)

Оваа семејна научнофантастична драма се случува на Хвар, остров во Јадранското  Море, каде што летните празници ги поминуваат две момчиња-радиоаматери. Миро (Мирковиќ) од Загреб и Пепек од Прага (Гурица) престојуваат во старата куќа на тетката на Миро.

Истражувајќи го правливиот таван на куќата, Миро и Пепек наоѓаат еден стар и необичен пиштол што го направил прадедото на Миро, кој важел за чуден изумител. Играјќи се со него, Миро и Пепек сфаќаат дека всушност станува збор за антигравитациски пиштол кој може да им ја одземе гравитациската тежина на предметите и да ги лансира во вселената.

Децата започнуваат да експериментираат со пиштолот и започнува летењето на разни предмети, што предизвикува хаос на островот. Тоа го привлекува вниманието на една меѓународна шпионска организација, која ги киднапира децата, а локалната полиција е немоќна…

 

ФИЛМ ПО ИЗБОР НА ГЕТЕ ИНСТИТУТ

17 ЈАНУАРИ (ЧЕТВРТОК), 20:00 ч.

ЧЕТИРИ КРАЛЕВИ

(4 Könige / 4 Kings)

Игран филм, Германија

2015 г., 98 мин., колор, ДСП

Режија: Тереза фон Елц (Theresa von Eltz)

Сценарио: Естер Бернсторф, Тереза фон Елц (Esther Bernstorff, Theresa von Eltz)

Улоги: Паула Биер, Јела Хазе, Јанис Ниевенер (Paula Beer, Jella Haase, Jannis Niewöhner)

Алекс, Феѓа, Тимо и Лара се четворица тинејџери со проблематично социјално однесување за кои претстојниот Бадник не е време на мир и радост. Бидејќи сите четворица имаат растечки конфликти во семејствата, празниците нема да ги минат дома, туку во психијатриска болница.

Тие се адолесценти различни по карактери, но се ставени пред предизвикот да се приспособат еден кон друг, но и да се конфронтираат меѓусебно во исцрпувачките терапевтски сесии. Благодарение на неконвенционалниот психијатар Др. Волф,нивните сесии добиваат неочекуван правец, па четворицата тинејџери ќе доживеат Божик што никогаш нема да го заборават.

 

ФРАНЦУСКИ КИНО КЛУБ

18 ЈАНУАРИ (ПЕТОК), 20:00 ч.

КАЗНЕН ПРОСТОР

(La surface de reparation / On the Sly)

Игран филм, Франција

2017 г., 94 мин., колор, ДСП

Режија: Кристоф Режан (Christophe Régin)

Сценарио: Кристоф Режан (Christophe Régin)

Улоги: Франк Гастамбид, Алис Исаз, Иполит Жирардо (Franck Gastambide, Alice Isaaz, Hippolyte Girardot)

 

Франк е голем љубител на фудбалот, а сепак е на маргините на фудбалскиот клуб Нант уште од десетгодишна возраст.  И покрај тоа што нема никаков статус во клубот ниту добива плата, тој ги мотивира и ги штити играчите, кои добро ги познава.

Еден ден ја запознава Саломи, поранешна љубовница на фудбалер, која го сака Џибрил, една од фудбалските ѕвезди. Џибрил е пред крајот на неговата кариера во клубот…

 

 

РАНИТЕ ФИЛМОВИ НА БЕРГМАН ПО ИЗБОР НА ФЕСТИВАЛОТ КИНЕНОВА

22 ЈАНУАРИ (ВТОРНИК), 20:00 ч.

КРИЗА

(Crises)

Игран филм, Шведска

1946 г., 93 мин., црно-бел, ДСП

Режијa: Ингмар Бергман (Ingmar Bergman)

Сценарио: Ингмар Бергман (Ingmar Bergman)

Улоги: Инга Ландгре (Inga Landgré), Стиг Олин (Stig Olin), Маријане Лофгрен (Marianne Löfgren)

Ова е дебитантскиот филм на Бергман како режисер. Заведувањето и разочарувањето во градскиот живот како контрапункт на провинцијалната добрина заземаат централно место во оваа морална приказна за една млада ќерка растргната меѓу световите на нејзините две мајки. Сценариото само по себе е невпечатливо. Бергман подоцна се одрекнува од одговорноста за приказната преку изјавата: „Ако некој ме имаше замолено да го снимам телефонскиот каталог, би го направил тоа.“ Може да се замисли дека Бергмановата верзија на телефонскиот каталог во овој дел од неговата кариера ќе содржеше иста фасцинирачка мешавина од филмски стилови што може да се забележи и во „Криза“, каде француската кинематографија од 1930-те се сретнува со експресионистичкото осветлување, како ран обид на Бергмановата сон-секвенца, и подоцна препознатливите интроспективни кадри преку огледалата.

 

РАНИТЕ ФИЛМОВИ НА БЕРГМАН ПО ИЗБОР НА ФЕСТИВАЛОТ КИНЕНОВА

23 ЈАНУАРИ (СРЕДА), 20:00 ч.

ВРНЕ НАД НАШАТА ЉУБОВ

(It Rains on Our Love)

Игран филм, Шведска

1946 г., 95 мин., црно-бел, ДСП

Режијa: Ингмар Бергман (Ingmar Bergman)

Сценарио:  Ингмар Бергман (Ingmar Bergman)

Улоги: Барбо Колберг (Barbo Kollberg), Биргер Малмстин (Birger Malmsten), Гиста Седерлунд (Gösta Cederlund)

Двајца млади луѓе се обидуваат да ја зачуваат кревката љубовна врска на маргините од општеството, борејќи се против сите притисоци од етаблираните социјални институции и нивните претставници. „Врне над нашата љубов“ е можеби најшематскиот ран филм на Бергман на тема адолесценти во криза, со старателите и противниците на младата љубов прикажани во речиси алегорична форма. Сцените на идиличност и бегство на гонетите млади љубовници, повеќе минливи и ранливи од неговите останати филмови, тука имаат топлина која современите шведски критичари ја поздравуваат со позитивно олеснување по „испревртената сексуалност“ во „Криза“, деби-филмот од истата година.

 

РАНИТЕ ФИЛМОВИ НА БЕРГМАН ПО ИЗБОР НА ФЕСТИВАЛОТ КИНЕНОВА

24 ЈАНУАРИ (ЧЕТВРТОК), 20:00 ч.

НАСМЕВКИ НА ЛЕТНАТА НОЌ

(Smiles of a summer night)

Игран филм, Шведска

1955 г., 108 мин., црно-бел, ДСП

Режијa: Ингмар Бергман (Ingmar Bergman)

Сценарио: Ингмар Бергман (Ingmar Bergman)

Улоги: Ула Јакобсон (Ulla Jacobsson), Ева Далбек (Eva Dahlbeck), Хериет Андерсон (Harriet Andersson)

Меѓународниот пробив на Ингмар Бергман се случува низ формата како оваа комедија, чие дејствие се случува во почетокот на векот, со приказна за страста, љубомората и гордоста. Ова е една од најдобрите еротски комедии во светската кинематографија.

Заплетот е исполнет со рунди од љубовни афери и интриги кои се вртат околу средовечен адвокат, неговата млада жена која е останата невина, неговата поранешна љубовница, софистицираната театарска актерка, нејзиниот љубовник и неговата жена. Вуди Ален брилијантно го има преработено овој филм во „Сексуалната комедија среде летната ноќ“, а филмот исто така ја има инспирирано бродвејската претстава „Мала ноќна музика“.

 

РАНИТЕ ФИЛМОВИ НА БЕРГМАН ПО ИЗБОР НА ФЕСТИВАЛОТ КИНЕНОВА

25 ЈАНУАРИ (ПЕТОК), 20:00 ч.

МАГИОНИЧАРОТ

(The Magician)

Игран филм, Шведска

1958 г., 101 мин., црно-бел, ДСП

Режија: Ингмар Бергман (Ingmar Bergman)

Сценарио: Ингмар Бергман (Ingmar Bergman)

Улоги: Макс фон Сидов (Max von Sydow), Ингрид Тулен (Ingrid Thulin), Гунар Бјорнстранд (Gunnar Björnstrand)

Еден патувачки магионичар е соочен со скептичната публика во оваа драма за предизвиците да се живее како уметник. И никој не создава таков анималистичен магнетизам подобро од Фон Сидов. Насетуваме одредени навестувања на ПЕРСОНА (тишината како последното бегство на еден артист), ФАНИ И АЛЕКСАНДАР (семејни  театралности како сопственото бегство) и СЦЕНИ ОД  БРАЧНИОТ ЖИВОТ. Меѓутоа, со својот бајковит пејзаж, ескпресионистичка сценографија и научно-фанастични старо-темни-лабаратории, МАГИОНИЧАРОТ бара да биде воспримен под свои услови. Хипнотизерот Макс и Магионичарот Бергман, секој со својата „сугестивност“, влијае врз доброволното суспендирање на верувањето.

 

НЕДЕЛА НА АВСТРАЛИСКИ ФИЛМ

26 ЈАНУАРИ (САБОТА), 20:00 ч.

ЦРНИОТ БАЛОН

(The Black Balloon)

Игран филм, Австралија

2008 г., 97 мин., колор, ДСП

Режија: Елиса Даун (Elissa Down)

Сценарио: Елиса Даун, Џими Џек (Elissa Down, Jimmy Jack)

Улоги:  Риз Вејкфилд, Лук Форд, Тони Колет, Џема Ворд, Ерик Томсон (Rhys Wakefield, Luke Ford, Toni Collette, Erik Thompson, Gemma Ward)

Младиот Томас треба да наполни 16 години. Неговиот татко е воено лице, мајка му е бремена, а братот Чарли е аутистичен. Томас тешко наоѓа „привремени“ пријатели поради честото селење на семејството, но и поради тоа што мора да се грижи за братот и да преземе голем дел од домашните обврски кога мајка му е хоспитализирана заради бременоста. Во новото училиште тој веќе има симпатија –Џеки, со која имаат заеднички часови по физичко воспитување. Но братот Чарли, со сета негова посебност и индискретност, е постојано негова сенка, дури и кога Томас сака да се прошета со Џеки насамо или кога таа доаѓа да го посети дома. На Томас, едноставно, му е смачено од Чарли и тешко му е да прифати дека тој никогаш нема да се промени, дека секогаш ќе зависи од него и од родителите. Не само што мора да ја прифати одговорноста на подолг рок, туку и да се помири со непредвидливото однесување на братот, како и со реакциите на луѓето околу нив – без разлика дали ја одобруваат или не различноста на неговиот брат.

Предизвиците за тинејџерот Томас се големи, но затоа неговото семејство е посебно, посплотено и единствено.

 

НЕДЕЛА НА АВСТРАЛИСКИ ФИЛМ

27 ЈАНУАРИ (НЕДЕЛА), 20:00 ч.

ЏИНДАБАЈН

(Jindabayne)

Игран филм, Австралија

2006 г., 123 мин., колор, ДСП

Режија: Реј Лоренс (Ray Lawrence)

Сценарио: Битрикс Кришчн, според расказ на Рејмонд Карвер (Beatrix Christian, Raymond Carver)

Улоги:  Габриел Бирн, Лора Лини, Дебора Ли Фурнес, Џон Хауард, Крис Хејвуд (Gabriel Byrn, Laura Linney, Deborra-Lee Furness, John Howard, Chris Haywood)

Во малото гратче Џиндабајн, поранешниот тркач со автомобили, Стјуарт, работи на бензинска пумпа. Неговиот брак со Клер е стерилен, без емоции и страсти, и иако се сега заедно, тој сè уште не може да ѝ прости што таа го напуштила веднаш по раѓањето на синот. Стјуарт е и страствен риболовец, и заедно со пријателите и колеги Карл, Роко и Били често ги поминува викендите на кампување и во риболов. Едно петочно попладне, додека четворицата другари кампуваат во зафрлено и малку населено место, во реката ќе најдат мртво тело на млада абориџинка. Тоа што понатаму ќе го направат, односно нема да го направат, ќе предизвика гнев кај нивните сограѓани, особено меѓу абориџинската заедница. Нивното пријателство исто така е во опасност и секој момент може да се претвори во непријателство. И бракот на Стјуарт и Клер е пред распаѓање, бидејќи таа се обидува да ги разбере мотивите за неговите постапки, но и да најде начин да му се извини на семејството на убиената абориџинка.

 

НЕДЕЛА НА АВСТРАЛИСКИ ФИЛМ

28 ЈАНУАРИ (ПОНЕДЕЛНИК), 20:00 ч.

ЦРВЕНИОТ ПЕС

(Red Dog)

Игран филм, Австралија

2011 г., 92 мин., колор, ДСП

Режија: Крив Стендерс (Kriv Standers)

Сценарио: Даниел Таплиц, според романот на Луис Де Бернијер (Daniel Taplitz, Louis de Berniѐres)

Улоги:  Џош Лукас, Рејчел Тејлор, Џон Бечлор, Ноа Тејлор, Коко (Josh Lucas, Rachel Taylor, John Batchelor, Noah Taylor, Coco)

 

Во едно мало рударско гратче, возачот Томас со својот камион ќе довезе нарачана статуа, но ќе биде изненаден од глетката што ќе ја затекне. Група посетители на локалниот паб се снебива околу еден пес кој изгледа како да е на умирање, а присутните сакаат да му ги скратат маките со тоа што ќе го убијат од сожалување. Додека тие се расправаат, Томас ја дознава приказната за песот авантурист кој се возел и со автобус и со воз, кој немал „постојан“ стопан, но имал „омилени“ пријатели-луѓе, и кој е речиси заштитен знак на рударското гратче. Имено, песот сите го знаат, со сите комуницира и се дружи, и секој од нив има по некоја анегдота или случка доживеана со црвениот пес.

ЦРВЕНИОТ ПЕС е филмска верзија на вистинската приказна за легендарниот пес познат во цела Западна Австралија, кој долго време талкал од место во место, наводно барајќи го својот сопственик. Песот во медиумите е познат по бојата на крзното, за него биле напишани неколку новинарски статии и три книги, а неговата статуа денес е поставена во рударското гратче Демпиер.

 

НЕДЕЛА НА АВСТРАЛИСКИ ФИЛМ

29 ЈАНУАРИ (ВТОРНИК), 20:00 ч.

ЧИНИЈАТА

(The Dish)

Игран филм, Австралија

2000 г., 101 мин., колор, ДСП

Режија: Роб Сич (Rob Sitch )

Сценарио: Санто Силауро, Том Глајзнер и други (Santo Cilauro, Tom Gleisner, etc.)

Улоги: Сем Нил, Кевин Харингтон, Том Лонг, Патрик Уорбартон, Елајза Шонерт (Sam Neill, Kevin Harrington, Tom Long, Patrick Warburton, Eliza Szonert)

По многу години, Клиф Бакстон ја посетува фармата за овци и тука му навираат спомените од минатото. Тој се присеќава на возбудените локални власти, на слабата струја, загрижениот претставник на НАСА, непредвидените ветрови, на една романтична љубов и сето она што се случувало на фармата за време на слетувањето на првиот човек на Месечината. Во таа 1969 година австралиската опсерваторија Паркс е вклучена во мрежата опсерватории кои треба да примат и да реемитуваат сигнал од видео-пренос за сите 600 милиони гледачи на Земјата да имаат можност истовремено на своите тв-екрани да ги следат случувањата на Аполо 11. Радио-телескопот е постојано опкружен со овци, а техничарите кои го опслужуваат се обидуваат да го одржат во исправна состојба, функционален, за да не потфрлат ниту тие ниту „големата чинија“ за време на преносот. Сепак, се случуваат низа пропусти, атмосферата зоврива и избива кавга помеѓу локалните техничари и човекот на НАСА. Ситуацијата станува комична, а меѓусебните обвинувања се аргументираат со помош на културолошките разлики помеѓу Австралија и САД. ЧИНИЈАТА е инспириран од вистинскиот настан.

 

НЕДЕЛА НА АВСТРАЛИСКИ ФИЛМ

30 ЈАНУАРИ (СРЕДА), 20:00 ч.

РОМУЛ, МОЈОТ ТАТКО

(Romulus, My Father)

Игран филм, Австралија

2007 г., 104 мин., колор, ДСП

Режија: Ричард Роксборо (Richard Roxburgh)

Сценарио: Ник Дрејк, според мемоарите на Рајмонд Гаита (Nick Drake, Raimond Gaita)

Улоги: Ерик Бана, Коди Смит-Мекфи, Франка Потенте, Мартон Чокаш, Расел Дајкстра (Eric Bana, Kodi Smit-McPhee, Franka Potente, Marton Csokas, Russel Dykstra)

Ромул е по потекло Романец од Војводина, кој заедно со сопругата Кристина, Германка, во доцните 1950-ти години од Австрија се исселуваат во Австралија. Но, имигрантскот живот во ветената земја не онаков каков што го замислувале, особено не за Кристина, која не сака да живее на фарма, па ќе ги напушти сопругот и синот Рајмонд и ќе замине во поголем град, со друг маж.

Светот на малиот Рајмонд е исполнет со сиромаштија, емотивни лузни, конфузија и неразбирање на односот помеѓу возрасните. Мајката му недостасува, но е исплашен од менталната состојба и очајот на татко му. Ромул, чие поведение е под влијание на високи морални вредности, се обидува на синот да му надомести за отсутната и депресивна мајка и со него да изгради нераскинлива врска исполнета со љубов и доверба.

Пред таткото и синот и нивниот обид да живеат нормален и стабилен живот се испречуваат низа пречки, пред сѐ хоспитализацијата на Ромул, но нивната приврзаност и посветеност еден на друг се неисцрпни.

Leave a comment