ПРОГРАМА ЈУНИ 2019

 

ОМАЖ НА РАЈКО ГРЛИЌ

1 ЈУНИ (САБОТА), 19:00 ч.

ВО ЧЕЛУСТИТЕ НА ЖИВОТОТ

(U raljama života / In the Jaws of Life)

Игран филм, Хрватска

1984, 95 мин., колор,  ДЦП

Режија: Рајко Грлиќ (Rajko Grlić)

Сценарио: Рајко Грлиќ, Дубравка Угрешиќ (Rajko Grlić,  Dubravka Ugrešić)

Улоги: Витомира Лончар, Горица Поповиќ, Богдан Диклиќ, Велимир Бата Живоиновиќ, Миодраг Кривокапиќ, Мира Фурлан  (Vitomira Lončar, Gorica Popović, Bogdan Diklić, Velimir Bata Živojinović, Miodrag Krivokapić, Mira Furlan)

 

Култната комедија на Грлиќ претставува адаптација на популарниот роман „Штефица Цвек во челустите на животот“. Приказната паралелно го следи животот на две жени – просечната и осамена девојка Штефица Цвек (Лончар), која мечтае да го најде човекот на нејзиниот живот, и Дуња (Поповиќ), филмска режисерка која снима телевизиска серија за Штефица, но и ги дели истите љубовни проблеми со неа. Пријателките на Штефица или се мажени и веќе разведени, и тоа по неколку пати, или се во складни врски.

Низ нивните животи ќе продефилираат разни мажи, додека не го најдат вистинскиот. Филмот се одликува со остра сатира на состојбата во тогашната држава СФРЈ: предмет на критиката во филмот се интелектуалците, стереотипите за меѓуетничките односи (релациите меѓу Србите и Хрватите), сексуалните слободи и политичкиот притисок…

ВО ЧЕЛУСТИТЕ НА ЖИВОТОТ е меѓу ексјугословенските филмови кои сè уште имаат култен статус меѓу гледачите. Филмот разбива и разни политичко-идеолошки табуа, како што е темата за логорите на Голи Оток по раскинот на Тито и Сталин во 1948 година. Меѓу повпечатливите епизоди е и онаа на Бата Живоиновиќ во улогата на „Трокрилен“ (алузија на неговото крупно тело, па изгледа како трокрилен орман) и неговите сочни реплики за сексот…

Возрасна категорија: 14 години

Влезница: 50 денари

 

ОМАЖ НА РАЈКО ГРЛИЌ

1 ЈУНИ (САБОТА), 21:00 ч.

ЧАРУГА

(Čaruga)

1991, 108 мин., колор, ДЦП

Игран филм, Хрватска

Режија: Рајко Грлиќ (Rajko Grlić)

Сценарио: Рајко Грлиќ, Иван Кушан (Rajko Grlić, Ivan Kušan)

Улоги: Иво Грегуревиќ, Давор Јањиќ, Бранка Трлин-Матула, Ена Беговиќ, Ненад Стојановски, Петре Арсовски (Ivo Gregurević, Davor Janjić, Branka Trlin-Matula, Ena Begović, Nenad Stojanovski, Petre Arsovski )

 

1918 година, крај на Првата светска војна. По враќањето од рускиот фронт во Славонија, Јово Станивуковиќ-Чаруга станува водач на побунетите селани-надничари кои бараат крај на феудалните односи и имотите на големите земјопоседници да им бидат поделени за обработување. По убиството на еден земјопоседник Чаруга завршува во затвор, но набргу побегнува во шумата и им се придружува на одметниците кои се борат за социјална правда и еднаквост.

Чаруга го ликвидира нивниот шеф и станува лидер на одметниците, чија идеологија е мешавина од комунистички идеи и своевиден „комитлук“ во стилот на Робин Худ. Иако добива ореол на заштитник на сиромашните, популарниот Чаруга набргу борбата за правдина ја заменува со сè посурови грабежи и свирепи убиства на жандарми и цивили. Алчноста за поголемо богатство и моќ ќе го претвори Чаруга од револуционер и романтичен ајдук во суров разбојник и убиец, кој конечно ќе им падне во раце на властите…

Во едно скорешно интервју по повод смртта на Иво Грегуревиќ, Грлиќ потенцира дека ЧАРУГА е неговиот прв и единствен „вестерн“, бидејќи јунаците на тој жанр биле сонот на секое дете од неговата генерација. И на таа тема најмногу се нашле со толкувачот на комплексната улога на Чаруга, Грегуревиќ. „Во таа улога на Чаруга Грегуревиќ не играше само еден лик, туку десет ликови низ таа една личност“, вели Грлиќ.

Возрасна категорија: 14 години

Влезница: 50 денари

 

ОМАЖ НА РАЈКО ГРЛИЌ

2 ЈУНИ (НЕДЕЛА), 19:00 ч.

СЕКОЈА ДОБРА ПРИКАЗНА Е ЉУБОВНА ПРИКАЗНА

(Vsaka dobra zgodba je ljubezenska zgodba / Svaka dobra priča je ljubavna priča)

Документарен филм, Словенија / Хрватска

2017, 71 мин., колор, ДЦП

Режија: Рајко Грлиќ, Матјаж Иванишин  (Rajko Grlić, Matjaž Ivanišin)

Сценарио: Рајко Грлиќ, Матјаж Иванишин  (Rajko Grlić, Matjaž Ivanišin)

Улоги: Душан Јовановиќ, Милена Зупанчич, Борис Каваца, Радко Полич (Dušan Jovanović, Milena Zupančič, Boris Cavazza, Radko Polič)

 

Филм за театарската претстава „Борис, Милена и Радко“ и четирите познати ликови кои учествуваат во нејзиното создавање. Тоа се актерите Борис Каваца (во овој случај режисер), Милена Зупанчич и Радко Полич, и режисерот Душан Јовановиќ (нам добро познат како писател на некогаш култната драма „Ослободување на Скопје“ и на сценариото за истоимениот филм во режија на Данило и Раде Шербеџија), но овој пат како актер, кој се игра себе си, како и Зупанчич и Полич.

Филмот го документира четиримесечниот процес на создавањето на претставата, од нејзината прва проба до премиерата. Се работи за љубовен триаголник меѓу актерите Зупанчич, Јовановиќ и Полич во реалниот живот, кој е буквално пренесен на театарската сцена. Во текот на создавањето на претставата „Борис, Милена и Радко“, која на театарската сцена и во филмот ја режира Борис Каваца, се елиминира приватниот живот на уметниците и почнува универзалната приказна за односите межу реалното и имагинарното, меѓу личната и јавната перцепција на уметноста.

Во реалниот живот пред неколку децении Милена била мажена за Радко, а Борис бил нивниот кум. Милена станала позната актерка, ѕвезда во ексјугословенскиот театар и филм во 1970-те и 1980-те години на минатиот век. Како што растела нејзината популарност, така за неа сè повеќе се интересирал режисерот Јовановиќ, инаку другар на Полич од студентските денови. Јовановиќ успеал да му ја преземе Милена на Полич. Неколку децении подоцна сите тројца, плус Каваца (кој го игра Јовановиќ), ќе минат четири месеци заедно, подготвувајќи ја претставата…

Авторите Грлиќ и Иванишин за нивниот  документарец велат дека тоа е филм што говори за односот меѓу интимноста и јавниот аспект на уметноста и за склоноста околу преплетувањето на личните животни искуства со приказните што ги раскажуваме. Филмот настојува да дефинира што од раскажаното на сцената е егзибиционизам, а што е искрено и понекогаш болно соочување со самите себеси.

Возрасна категорија:  14 години

Влезница: 50 денари

 

ОМАЖ НА РАЈКО ГРЛИЌ

2 ЈУНИ (НЕДЕЛА), 21:00 ч.

НЕКА ОСТАНЕ МЕЃУ НАС

(Neka ostane među nama)

Игран филм, Хрватска / Србија / Словенија

2010, 87 мин., колор, 35 мм

Режија: Рајко Грлиќ (Rajko Grlić)

Сценарио: Рајко Грлиќ, Анте Томиќ (Rajko Grlić, Ante Tomić)

Улоги: Мики Манојловиќ, Бојан Навојец, Ксенија Маринковиќ, Дариа Лоренци, Наташа Дорчиќ (Miki Manojlović, Bojan Navojec, Ksenija Marinković, Daria Lorenci, Nataša Dorčić)

 

Втората соработка меѓу писателот и сценарист Томиќ резултураше со приказна за петмина луѓе кои се меѓусебно поврзани на интересен сентиментален начин. Тоа се браќата Никола и Брацо, нивните сопруги Анамарија и Марта, и само една, но и најважна, љубовницата – Латица. Сопружниците имаат и ќе имаат деца на кои со сигурност не им се знае таткото заради испреплетеноста на сексуалните интереси на двајцата браќа…

НЕКА ОСТАНЕ МЕЃУ НАС е индискретна загрепска сторија за вировите на еротската страст под плаштот на навидум спокојното и тромо граѓанско секојдневие кое, исто така навидум, ги почитува (не)пишаните граѓански и семејни правила.

Никола (Манојловиќ) е успешен и богат адвокат, а неговиот брат Брацо (Навојец) е сликар со боемски живот. Нивните двојни животи и паралелни љубовни врски ќе се измешаат во горко-слатката приказна за неуморната потрага по љубовта и среќата, секако зачинета со многу сексуални мечти, но и ужасните последици кои се предизвикани од фактот дека повремено ќе се затекнат во туѓ кревет…

Грлиќ е автор познат по приврзаноста за филмување приказни во неговиот роден град Загреб, и од 11 наслови осум се снимени токму во Загреб. По речиси две децении со НЕКА ОСТАНЕ МЕЃУ НАС повтгорно се враќа во тој урбан простор и филмот е своевидна посвета на градот, а музиката ја компонирале Алфи Кабиљо и Алан Бјелински.

Возрасна категорија: 14 години

Влезница: 50 денари

 

ОМАЖ НА РАЈКО ГРЛИЌ

3 ЈУНИ (ПОНЕДЕЛНИК), 19:00 ч.

И ДА ПУКНЕ, НЕКА ПУКНЕ

(Kud puklo da puklo)

Игран филм, Хрватска

1974, 89 мин., колор, 35 мм

Режија: Рајко Грлиќ (Rajko Grlić)

Сценарио: Рајко Грлиќ, Срѓан Карановиќ, Александер Кенигсмарк (Rajko Grlić, Srđan Karanović, Alexandear Koengismark)

Улоги: Младен Будишчак, Јагода Калопер, Феликс Смитка (Mladen Budiščak, Jagoda Kaloper, Feliks Smitka)

 

Неконвенционалното момче со работничко потекло наречено Будилица (според прекарот на актерот Будишчак што го игра тој лик) не може да добие пристојно платена работа. Во знак на протест одлучува да остане невработен, но истовремено да ѝ се претстави на јавноста со помош на филмските камери кои го снимаат неговиот секојдневен живот. Во неговиот необичен потфат му се придружува и девојката Јагода (Калопер)…

И ДА ПУКНЕ, НЕКА ПУКНЕ е дебитантски долгометражен игран филм на Грлиќ и претставува дел од бранот на општествено-критичкиот филм во 1970-те години на минатиот век. Необичниот и свеж настап на актерот Будишчак му дава посебен шарм на филмот.

И ДА ПУКНЕ, НЕКА ПУКНЕ е првата професионална соработка на Грлиќ со Карановиќ како сценарист, веќе следната година во Белград ќе ја работат ТВ серијата БОС В ТРЊЕ (Grlom u jagode), и таа нивна соработка ќе продолжи уште во десетина проекти. Интересно е што концептот „филм во филм“, кој кај Грлиќ е само во назнаки, Карановиќ ќе го развие во полнокрвна приказна во неговиот ЗА СЕГА БЕЗ ДОБАР НАСЛОВ (Za sada bez dobrog naslova) од 1988.

За И ДА ПУКНЕ, НЕКА ПУКНЕ Грлиќ ја доби наградата за најдобар млад режисер на Пулскиот фестивал во 1974.

Возрасна категорија: 14 години

Влезница: 50 денари

 

ОМАЖ НА РАЈКО ГРЛИЌ

3 ЈУНИ (ПОНЕДЕЛНИК), 21:00 ч.

КАРАУЛА

(Karaula)

Игран филм, Хрватска / Македонија / Србија

2006, 94 мин., колор, 35 мм

Режија: Рајко Грлиќ (Rajko Grlić)

Сценарио: Рајко Грлиќ, Анте Томиќ (Rajko Grlić, Ante Tomić)

Улоги: Сергеј Трифуновиќ, Тони Гојановиќ, Емир Хаџихафизбеговиќ, Богдан Диклиќ, Верица Недеска, Игор Бенчина  (Sergej Trifunović, Toni Gojanović, Emir Hadžihafizbegović, Bogdan Diklić, Verica Nedeska, Igor Benčina)

 

Дејството на филмот се случува во 1987 година, на македонско-албанската граница, пред почеток на војната во бивша Југославија. Екипажот на една зафрлена караула не знае што се случува во земјата и влегува во трагикомични ситуации со локалното население од двете страни на границата. Постојано пијаниот и фрустриран поручник Сафет Пашиќ (Хаџихафизбеговиќ) заболува од сифилис и бара помош од единствениот доктор меѓу војниците, сплиќанецот Синиша Сиричевиќ (Гојановиќ). Поручникот, сакајќи да ја скрие својата болест, измислува напад на Албанците врз Југославија и го доведува целиот баталјон во воена психоза.

Синиша влегува во љубовна врска со Мирјана, сопругата на Пашиќ (Недеска), неговиот најдобар другар Љуба (Трифуновиќ) сака да ја напушти војската, па изјавува дека по повод Титовата штафета ќе трча од караулата на македонско-албанската граница до Куќата на цвеќето во Белград. Работите крајно се усложнуваат откако Љуба ќе се откаже од мисијата, што ќе доведе до отворен конфликт со поручникот Пашиќ… Говорејќи за не толку дамнешното минато без носталгија и омраза, КАРАУЛА е комедија за личностите кои се наоѓаат на чекор од трагедијата.

КАРАУЛА е првиот филм по распадот на Југославија во чија продукција учествувале екипи од Србија, Македонија, Хрватска, Словенија и Босна и Херцеговина. Филмот е снимен според романот на Анте Томиќ, „Ништо не смее да не изненади“ („Ništa nas ne smije iznenaditi“), алузија на паролата за концептот на постојана будност на Народната одбрана на Југославија од можна агресија однадвор.

Според дел од филмските критичари, КАРАУЛА е врв во творечкиот опус на Грлиќ.

Возрасна категорија: 14 години

Влезница: 50 денари

 

ОМАЖ НА РАЈКО ГРЛИЌ

4 ЈУНИ (ВТОРНИК), 20:00 ч.

УСТАВ НА РЕПУБЛИКА ХРВАТСКА

(Ustav Republike Hrvatske)

Игран филм, Хрватска / Чешка / Македонија / Словенија

2016, 93 мин., колор, ДЦП

Режија: Рајко Грлиќ (Rajko Grlić)

Сценарио: Рајко Грлиќ, Анте Томиќ (Rajko Grlić, Ante Tomić)

Улоги: Небојша Глоговац, Ксенија Маринковиќ, Дејан Аќимовиќ, Божидар Смиљаниќ (Nebojša Glogovac, Ksenija Marinković, Dejan Aćimović, Božidar Smiljanić)

 

Вјеко (Глоговац) е професор во средно училиште кој го посветил целиот свој живот на проучувањето на хрватската историја и јазик. Тој живее во простран, но запоставен стан во центарот на Загреб со својот стар татко Хрвоје (91). За време на Втората светска војна, татко му бил усташки  офицер во хрватската фашистичка војска, а сега, како тежок инвалид  шест години е врзан за креветот. Згора на сè, пред помалку од една година Вељко трагично ја загубил љубовта на својот живот, Бобо, виолончелист.

Во недостиг на животна радост и со самоубиствени мисли, единственото нешто во што Вељко ужива се прошетки во доцните ноќни часови. Тој талка низ празниот град, нападно нашминкан и облечен во женска облека. Една вечер група на млади луѓе го претепуваат, уринираат врз него и го оставаат да лежи во несвест на улица. Во болницата, Маја, медицинска сестра која живее во подрумот на зградата во која живее и Вељко, го препознава и се грижи за него. Маја му помага да се врати дома, таа почнува да се грижи не само за него туку и за неговиот неподвижен татко . Вељко се согласува да му помогне на нејзиниот маж, полицаецот Анте, во подготовката на испитот за хрватскиот устав. Анте има тешкотии во учењето, живее живот исполнет со страв дека ќе падне на испитот само поради фактот дека е Србин, иако го сменил роденото име. Започнува приказната за три многу различни луѓе кои живеат во иста зграда и кои, неочекувано и против своја волја, се зависни едни од други.

УСТАВ НА РЕПУБЛИКА ХРВАТСКА е поднасловен како „љубовен филм за омразата“. Иако доминираше на фестивалот во Пула со четири награди, филмот предизвика големи полемики во хрватската јавност заради горливите теми што ги третира, во прв ред хомосексуалноста, травестијата, национализмот и (нео)усташтвото. Ликот на Вјеко е една од последните улоги на одличниот актер Глоговац, кој почина неколку месеци по премиерата на филмот.

Филмот освои десетина награди на фестивалите низ светот, меѓу кои и наградата за најдобар филм на фестивалот во Монтреал.

Возрасна категорија: 14 години

Влезница: 50 денари

 

 

НЕДЕЛА НА РУСКИ ФИЛМ 5 – 10 ЈУНИ

 

 

5 ЈУНИ (СРЕДА), 20:00 ч.

МОЛОХ

(Molokh / Moloch)

Игран филм, Русија / Германија / Италија / Јапонија / Франција

1999, 108 мин., колор, ДЦП

Режија: Александар Сокуров (Aleksandr Sokurov)

Сценарио: Јуриј Арабов, Марина Коренева (Yuriy Arabov, Marina Koreneva)

Улоги: Елена Руфанова, Леонид Мозговој, Ирина Соколова, Елена Спиридонова, Владимир Богданов (Elena Rufanova, Leonid Mozgovoy, Irina Sokolova, Yelena Spiridonova, Vladimir Bogdanov)

 

Вила во ридовите на Баварија, Германија, 1942 година, во екот на Втората светска војна. Во вилата сама престојува Ева Браун, љубовницата на Адолф Хитлер. Пристигнува Хитлер со неговата придружба: д-р Јозеф Гебелс, министер за култура и пропаганда на нацистичка Германија, неговата сопруга Магда Гебелс, и Мартин Борман, еден од највисоките функционери во хитлеровата власт, но и човек со најмистериозна судбина по крајот на војната. Идејата на Хитлер е да помине неколку денови во изолираната вила, во дружба со неговите пријатели и соработници, но без разговори за политиката. Филмот МОЛОХ ја содржи провокацијата на Сокуров дали може да се направи филм за Хитлер како „обичен“ човек, со секодневни банални активности во животот… Зборот „молох“ означува страшна и слепа сила која е постојано „гладна“ за бројни и невини жртви, како што е војната.

МОЛОХ е првиот дел од филмската тетралогија на Сокуров, сочинета од БИК (Taurus, 2001), посветена на водачот на руската Окромвриски комунистичка револуција, Владимир Илич Ленин; потоа СОНЦЕТО ( The Sun, 2005), чија тема е јапонскиот император Хирохито, и ФАУСТ (Faust, 2011), за старогерманскиот мит Фауст, опеан и кај класичниот писател Јохан Волфганг Гете.

Возрасна категорија: 14 години

Влезница: бесплатен влез

 

 

 

6 ЈУНИ (ЧЕТВРТОК), 20:00 ч.

ОСАМЕНИОТ ГЛАС НА ЧОВЕКОТ

(Odinokiy golos cheloveka / The Lonely Voice of Man)

Игран филм, Русија

1987,. 87 мин.,колор, ДЦП

Режија: Александар Сокуров (Aleksandr Sokurov)

Сценарио: Јуриј Арабов, Андреј Платонов (Yuriy Arabov, Andrey Platonov)

Улоги: Андреј Градов, Владимир Дегтјарев, Владимир Гладишев, Татјана Горјачева (Andrey Gradov, Vladimir Degtyarev, Vladimir Gladyshev, Tatyana Goryacheva)

 

ОСАМЕНИОТ ГЛАС НА ЧОВЕКОТ е вториот долгометражен игран филм на Сокуров, работен според драмата на Бернард Шо. Филмот, всушност, е дипломската работа на на Сокуров на националниот иститут за филм ВГИК снимен пред десет години, но бил забранет до „Перестројката“, процесот на политичка либерализација во СССР во втората половина на 1980-те години. Цензорите наредиле филмската копија целосно да биде уништена, но Сокуров и неговиот снимател скриле една копија под креветот во нивниот дом и филмот, сепак, бил тајно прикажуван во домовите на руските интелектуалци.

Филмот има култен статус меѓу јапонските филмофили и често се прикажува во арт-кината во Токио. Дури и славниот Андреј Тарковски изјавил дека ОСАМЕНИОТ ГЛАС НА ЧОВЕКОТ е филмско дело на гениј, радосен што филмот имал среќна судбина да не исчезне засекогаш. ОСАМЕНИОТ ГЛАС НА ЧОВЕКОТ  е поетски филм, а рецензентите велат дека неговата убавина доаѓа од најдлабоката вера на рускиот народ: Русите традиционално веруваат дека уметничкото творештво е служење на Бога. Сокуров и неговите соработници на сценариото, Арабов и Платонов, речиси потсвесно се на тој пат, што резултирало со овој легендарен филм.

Филмските критичари велат дека не можат да замислат друга земја или друга епоха кои би можеле да родат  таков уникатен филм со толку едноставна и наивна приказна како ОСАМЕНИОТ ГЛАС НА ЧОВЕКОТ. Главниот лик, Никита, е прогонуван од последиците на граѓанската војна во Русија во почетокот на 1920-те години; се среќава со Љуба, која е длабоко морална и осамена личност… Треперливата чувствителност на младите е проткаена со мистичниот израз на религиозни чувства.

Филмот на Сокуров е еден од ретките случаи во историјата на филмот кога младите режисери постигнале зрелост на мајстори. Затоа препораките велат дека ОСАМЕНИОТ ГЛАС НА ЧОВЕКОТ мора да биде прикажуван повторно и повторно, и тоа не само на филмофилите, туку и на самиот Сокуров, за да се сети каков автор бил кога имал 26-27 години.

Возрасна категорија: за сите возрасти

Влезница: бесплатен влез

 

 

7 ЈУНИ (ПЕТОК), 20:00 ч.

ПИСМАТА НА МРТВИОТ ЧОВЕК

(Pisma myortvogo cheloveka / Dead Man’s Letters)

Игран филм, Русија

1986, 87, црно-бел / колор, ДЦП

Режија: Константин Лопушански (Konstantin Lopushanskiy)

Сценарио: Константин Лопушански, Вјачеслав Рибаков (Konstantin Lopushanskiy, Vyacheslav Rybakov)

Улоги: Ролан Биков, Јосиф Риклин, Виктор Михајлов (Rolan Bykov, Iosif Ryklin, Viktor Mikhaylov)

Дебитантски долгометражен игран филм на Лопушански. Нуклеарната катаклизма го натерало малубројното преживеано население во подрумите на зградите во стушените градови…

Централен лик во филмот е постар научник, кој во мрачната просторија на подрумското засолниште пишува писма до синот, одржувајќи ја на тој начин сопствената надеж дека неговото дете е живо, без разлика каде се наоѓа. Реалноста што ја гледаме во филмот е сурова: поголемиот дел од популацијата е буквално спржена од катаклизмата или е изложена на радијација, а поголемиот дел од луѓето се полудени. Светот е едно големо загадено ѓубриште со мрачни кулиси покрај кои се тетерават некои од преживеаните, со гас-маски на лицата.

Сепак, научникот се труди да остане оптимист. Тој е во потрага по храна наоколу, не престанува да му пишува писма на синот, бара лекови за сопругата која е озрачена и почнува да го губи разумот. Не може да се помири со фактот дека огромен број истрауматизирани деца се препуштени на смртта бидејќи се непотребни за опстанокот на псевдо-комуната која е под строга контрола на она што останало од армијата. Војската ги собира преживеаните луѓе во еден голем бункер, каде што ќе треба да живеат следните 30 или 50 години. Во тој брутален свет нема место за деца, стари и болни…

ПИСМАТА НА МРТВИОТ ЧОВЕК е фина, меланхолична и морничава визија на светот во кој духот и надежта се уништени, и претставува еден од најмрачните постапокалиптични филмови во 1980-те години и епохата на Студената војна, кога големите сили биле исплашени од можноста за меѓусебен нуклеарен конфликт.
Возрасна категорија: 12 години

Влезница: бесплатен влез

 

8 ЈУНИ (САБОТА), 19:00 ч.

ТРАОРНА РАМНОДУШНОСТ

(Скорбное бесчувствие / Mournful Unconcern)

Игран филм, Русија

1987,. 110 мин.,колор, ДЦП

Режија: Александар Сокуров (Aleksandr Sokurov)

Сценарио: Џорџ Бернард Шо (George Bernard Shaw)

Улоги: Рамаз Чхиквадзе, Ала Осипенко, Ирина Соколова (Ramaz ChkhikvadzeAlla OsipenkoIrina Sokolova)

Траорна Рамнодушност е трет филм во продукција на Сокуров од 1983 г., но четврт издаден бидејќи бил забранет од советските власти до Перестројката во 1987 г. Филмот, чие дејство е сместено во Првата светска војна, е инспириран од театарска претстава на Бернард Шо. Професионални актери (Замански, Осипенко, Соколова и др) ги толкуваат улогите со аматерски актери, како во повеќето рани филмови на Сокуров и многу од карактеристиките на неговиот кинематографски стил се веќе препознатливи.

Поради тоа што советските власти ја откажале поддршката на филмот во текот на продукцијата било потребно подолго време за филмот да се заврши. Филмот бил номиниран за Златна мечка на 37-иот Меѓународен филмски фестивал во Берлин.

Возрасна категорија: 12 години

Влезница: бесплатен влез

 

 

8 ЈУНИ (САБОТА), 21:00 ч.

ПОСЕТИТЕЛ НА МУЗЕЈОТ

(Posetitel muzeya)

Игран филм, Русија

1989, 136 мин., колор, ДЦП

Режија: Константин Лопушански (Konstantin Lopushanskiy)

Сценарио: Константин Лопушански (Konstantin Lopushanskiy)

Улоги: Виктор Михајлов, Вера Мајорова, Вадим Лобанов (Viktor Mikhaylov, Vera Mayorova, Vadim Lobanov)

Лопушански по ПИСМАТА НА МРТВИОТ ЧОВЕК продолжува со снимањето мрачни, депресивни и безнадежни визии за иднината на човештвото. Неговите научнофантастични приказни се проткаени со специфични психоделично-филозофски визии за иднината на светот, кој е населен со сенилни и деформирани мутанти, кои живеат во резервати.

Еден човек ги посетува урнатините на музејот кој се наоѓа под морето, во кој може да се пристапи само за време на мала плима…

Возрасна категорија: 12 години

Влезница: бесплатен влез

 

9 ЈУНИ (НЕДЕЛА), 19:00 ч.

СОЛО

(СОЛО)

Краток филм, Русија

1980, 29 мин., колор, ДЦП

Режија: Константин Лопушански (Konstantin Lopushanskiy)

Сценарио: Албина Шулгина (Albina Shulgina)

Улоги: Николај Гринко, Лудмила Аржаникова, Вадим Лобанов (Nikolay Grinko, Lyudmila Arzhannikova)

 

Дејството на филмот е сместено во Ленинград, зимата 1942 г.. Солистот на Симфонискиот оркестар работи на Петтата симфонија на Чајковски. Концертот ќе се одржи во Ленинградската филхармонија и ќе се пренесува во Лондон.

Возрасна категорија: 12 години

Влезница: бесплатен влез

 

9 ЈУНИ (НЕДЕЛА), 20:00 ч.

УЛОГА

(Rol)

Игран филм, Русија

2013, 132 мин., колор, ДЦП

Режија: Константин Лопушански (Konstantin Lopushanskiy)

Сценарио: Павел Фин, Константин Лопушански (Pavel Finn, Konstantin Lopushanskiy)

Улоги: Александер Ефремов, Ана Гелер, Јури Ицков (Aleksandr Efremov, Anna Geller, Yuriy Itskov)

 

Улога е филм за извонреден актер во револуционерна Русија кој ја презема најголемата улога во неговиот живот – улогата на друг човек. Под влијание на идеите од симболизмот, тој решава да го преземе животот на неговиот двојник – револуциониерен водач во новата Советска Русија. На почетокот интригантно, потоа опседнато, тој се соживува со улогата и ја живее во целост… дури и го претставата за животот што ја пишува се ближи кон трагичниот крај. Базирано на вистински инциденти во животите на руските симболисти, филмот истражува колку далеку може да се отиде кога се работи за животната улога. Филмот бил прикажан на 35 Московски меѓународен филмски фестивал и добил награда Ника за најдобро сценарио.

Возрасна категорија: 12 години

Влезница: бесплатен влез

 

 

10 ЈУНИ (ПОНЕДЕЛНИК), 18:30 ч.

Денови на затемнување

(Дни затмения, The Days of Eclipsе)

Игран филм, Русија

1988,. 139 мин.,колор, ДЦП

Режија: Александар Сокуров (Aleksandr Sokurov)

Сценарио: Аркадиј Стругатски (Arkadiy Strugatskiy)

Улоги: Алексеј Ананишов , Ескендер Умаров Ирина Соколова (Aleksei AnanishnovEskender UmarovIrina Sokolova)

Денови на затемнување е наградуван филм во режија на Александер Сокуров од 1988 г.. Сценариото е на Јури Арабов и Пјотр Кадочникот базиран на романот на Аркади и Борис Стругатски „Милијарда години до крајот на светот“.

Младиот лекар Дмитри Мајланов добива работа во далечен и многу сиромашен дел на Туркменистан. Покрај дневната работа како педијатар, Мајланов ги истражува ефектита на религијата врз човечкото здравје. Неговото истражување води кон политички некоректниот заклучок дека религиозната верба влијае добро врз здравјето. Меѓутоа, додека се обидува да ја напише тезата се случуваат низа неверојатни и бизарни настани. Мајланов има чувство дека некоја сила се обидува да го спречи да ја заврши тезата.

Филмот е добитник на повеќе филмски награди и признанија.

Филмот е снимен со користење на невообичаени филмски техники. Во полудокументарен стил, каде црно-белите рамки се мешаат со боја, Сокуров го отсликува животот во Туркменистан, болни деца, психијатриска клиника и пустината со мешавина од звуци во позадина.

Возрасна категорија: 12 години

Влезница: бесплатен влез

 

10 ЈУНИ (ПОНЕДЕЛНИК), 21:00 ч.

Специјална проекција на најдобриот долгометражен филм според жирито на 9 Филозофски Филмски Фестивал

КРАДЦИ НА ГУЛАБИ

(The Pigeon Thieves / Güvercin Hırsızlar)

Игран филм, Турција

2018, 82 мин., колор, ХД

Режија: Осман Наил Доган (Osman Nail Doğan)

Сценарио:Осман Наил Доган, Самет Доган(Osman Nail Doğan, Samet Doğan)

Улоги: Сеит Низам Јилмаз, Мерт Бугра Татароглу, Кутај Сандикчи, Гокан Јикилкан, Бурчин Сезен (Seyit Nizam Yilmaz, Mеrt Buğra Tataroğlu, Kutay Sandikçi, Gökhan Yikilkan, Burçin Sezen)

Животот на 16-годишниот Махмут се состои од хранењето на гулабите и заработување од крадењето туѓи гулаби. Најголемиот сон му е да ги има најдобрите гулаби. Еден ден, еден од гулабите ќе избега и не се враќа повеќе. Кога Махмут наоѓа гулаб вгнезден на еден покрив, го запознава Исмаил, осумгодишно детенце кое живее во куќата. Оваа средба станува една од најважните пресвртници којашто ќе влијае на животите на двете деца.

КРАДЦИ НА ГУЛАБИ, прв игран филм на режисерот кој беше дел од Официјалната селекција на 24-тиот Сараевски филмски фестивал, е филм за растењето, за созревањето и за вивнувањето во животот. Топла приказна за пријателството и младешките страсти, погледната низ специфичната призма на културата на живеење во Анадолија. И како што Доган прашува, зборувајќи за филмот, дилемата е пред нас: „Што е добро, a што лошо? Дали можеш да бидеш добар со лошо однесување?“ Или, пак, како може еден човек да биде добар ако животот е беспоштеден и суров, луѓето се немилосрдни и себични, а светот е студен и туѓ?

По проекцијата следува Q&A со режисерот Осман Наил Доган

Возрасна категорија: 12 години

Влезница: бесплатен влез

 

 

11 ЈУНИ (ВТОРНИК), 21:00 ч.

Специјална проекција на најдобриот долгометражен филм според публиката на 9 Филозофски Филмски Фестивал

8 МИНУТИ И 19 СЕКУНДИ

(8’19’’ / 8 минути и 19 секунди)

Игран филм, Бугарија

2018, 85 мин., колор, ДСП

Режија: Петaр Валчанов, Љубомир Младенов, Теодор Ушев, Надежда Косева, Владимир Љуцканов, Кристина Грозева (Петър Вълчанов, Любомир Младенов, Teодор Ушев, Надежда Косева, Владимир Люцканов, Кристина Грозевa)

Сценарио: Георги Господинов

Улоги: Светлана Јанчева, Иван Барнев, Цветан Алексиев (Светлана Янчева, Иван Бърнев, Цветан Алексиев)

Омнибус филм базиран на кратките раскази на најпреведуваниот современ бугарски писател Георги Господинов, режиран од шест различни режисери од Бугарија.

Во оној момент кога ќе почнете да го гледате овој филм, сонцето можеби веќе згаснало, но вие сè уште нема да го знаете тоа бидејќи 8 минути и 19 секунди е времето за кое ќе пристигне веста за неговата смрт. Тоа е времето што ѝ е потребно на светлината да стигне дотука, а потоа ќе настапи темнината…

Темата на апокалипсата не мора да биде прикажувана преку глобална катаклизма, коњаници на апокалипсата, ангели на смртта, оган и деструкција. Крајот на светот може да биде многу лична работа, интимно и безмалку нечујно човечко искуство.

Наративниот мозаик на 8 МИНУТИ И 19 СЕКУНДИ ќе ги постави стожерните точки на овој исклучителен омнибус филм: чувството на смртноста, миговите пред самиот крај, нашето неизвесно постоење и стравот што доаѓа од сознанието за сето тоа.

Возрасна категорија: 12 години

Влезница: бесплатен влез

 

 

12 ЈУНИ (СРЕДА), 20:00 ч.

17 ЈУНИ(ЧЕТВРТОК), 20:00 ч.

ДЕВОЈКА

(Girl)

Игран филм, Белгија / Холандија

2018, 105 мин., колор, ДЦП

Режија: Лукас Донт (Lukas Dhont)

Сценарио: Лукас Донт, Ангело Тијсенс (Lukas Dhont, Angelo Tijssens)

Улоги: Виктор Полстер, Арие Ворталер, Кателине Дамен, Валентин Даененс (Victor Polster, Arieh Worthalter, Katelijne Damen, Valentijn Dhaenens)

 

Одлучната петнаесетгодишна Лара е посветена на тоа да стане професионална балерина. Со поддршка од татко си се труди да биде најдобрата во нејзиното ново училиште за балет. Адолесцентските фрустрации и нетрпеливост на Лара се засилуваат затоа што сфаќа дека нејзиното тело не се покорува така лесно на строгата дисциплина што му ја наметнува поради тоа што била родена како момче, но тоа не ја спречува да биде девојка, бидејќи така се чувствува и така се однесува. Живее со татко и со братче: татко  ѝ е таксист кој не заработува многу, но не се двоуми да се преселат во друг град заради уметничкото школување на Лара…

Сепак, нејзината интима е изложена пред сите ученички, кои треба да се изјаснат дали им пречи кога Лара по физички напорните балетски вежби се тушира заедно со нив. Лара е ставена на програмата во една клиника која врши операции на промена на полот, но се наоѓа во своевиден „цајтнот“ меѓу животната опсесија со балетот и „непослушниот“ развој на нејзиното тело во годините кога најмногу се расте…

Кинематограферот на ДЕВОЈКА, Франк ван ден Иден, беше во конкуренцијата за награда на фестивалот на филмската камера „Браќа Манаки“ минатата година во Битола. Тој ја истакна улогата на Виктор Полстер, кој го толкува ликот на Лара: „Полстер никогаш не бил порано пред камера. По професија е танчер, беше искусен со работа пред публика, но немал никакво искуство пред камера. Не знаевме како ќе реагира на снимањето, но тој беше во секој кадар, секој ден, и беше среќен со изборот“.

Возрасна категорија: 14 години

Влезница: 100 денари

ФИЛМ ПО ИЗБОР НА ГЕТЕ ИНСТИТУТ

13 ЈУНИ (ЧЕТВРТОК), 20:00 ч.

ЗА ЕДНА ДЕВОЈКА

(About A Girl / Charleen Macht Schluss)

Игран филм, Германија

2013/14, 105 мин., колор, ДЦП

Режија: Марк Монхајм (Mark Monheim)

Сценарио: Марк Монхајм , Мартин Ребок (Mark Monheim, Martin Rehbock)

Улоги: Јасна Фрици Бауер, Хеике Макач, Аурел Мантај  (Jasna Fritzi Bauer, Heike Makatsch, Aurel Manthei)

Шарлин, има 16 години, и е голем обожавател на Курт Кобејн и постојано се чуди зошто возрасните секогаш мора да ги комплицираат работите. Еден ден, таа ќе се почувствува особено меланхолично и бунтовнички, и ќе одлучи да го прекине нејзиниот живот. За среќа, Шарлин ќе преживе и ќе открие дека  животот може да биде исполнет со забава и љубов. Главниот лик на Шарлин го толкува младата филмска ѕвезда, Јасна Фрицзи Бауер, која одлично ја портретира тинејџерката што ќе го ревидира својот став животот по нејзиниот неуспешен обид за самоубиство. Во својот прв игран филм ЗА ЕДНА ДЕВОЈКА Марк Мохнајм раскажува малку иронична приказна за периодот на растењето, кога патот од збунетост води кон радост на животот.

Возрасна категорија:  14 години

Влезница: бесплатен влез

 

 

 

 

ФИЛМ ПО ИЗБОР НА ФРАНЦУСКИ ИНСТИТУТ

18 ЈУНИ (ВТОРНИК), 20:00 ч.

УБАВА И УБАВА

(La belle et la belle)

Игран филм, Германија

2017, 95 мин., колор, ДЦП

Режија и сценарио: Софи Филер (Sophie Fillières)

Улоги: Сандрин Киберлан, Агате Боницер, Мелвил Попу (Sandrine Kiberlain, Agathe Bonitzer, Melvil Poupaud)

Марго има 45 години, работи како професорка по историја и географија, и не прави ништо посебно во живот. На една забава таа ќе се запознае со дваесетгодишна девојка и открива дека имаат многу сличности една со друга. Како за почеток, и таа се вика Марго и прави глупости во својот млад живот. Таа е нејзината помлада верзија од пред 25 години.

Возрасна категорија:  12 години

Влезница: 50 денари

 

 

 

19 ЈУНИ (НЕДЕЛА) 20:00 ч.

20 ЈУНИ (ПОНЕДЕЛНИК) 20:00 ч.

ЗАЈДИСОНЦЕ

(Napszállta / Sunset)

Игран филм, Унгарија / Франција

2018, 145 мин., колор, ДЦП

Режија: Ласло Немеш (László Nemes)

Сценарио: Ласло Немеш (László Nemes)

Улоги: Влад Иванов, Евелин Добош, Бјерн Фрајберг, Јули Јакаб, Сузан Вуест (Vlad Ivanov, Evelin Dobos, Björn Freiberg, Juli Jakab, Susanne Wuest)

 

Младата Ирис Лејтер се враќа во Будимпешта, возбудлив град на Австро-Унгарската монархија и срцето на Европа. Ирис помладите години ги минала во сиропиталиште, во надеж дека ќе работи како модистка во легендарната продавница за шапки што им припаѓала на нејзините покојни родители. Таа одеднаш е соочена со нејзиното минато и почнува да бара одговори за нејзиното семејство, при што наидува на мрачни тајни.

Новиот сопственик на продавницата, угледниот бизнисмен Оскар Брил, се обидува да се ослободи од неа по секоја цена. Улиците на наизглед веселиот град стануваат опасни за Ирис, особено ноќта кога непознат човек ќе ја пресретне и ќе почне да се распрашува за нејзиниот брат…

ЗАЈДОСОНЦЕ ја освои наградата ФИПРЕСЦИ на фестивалот во Венеција минатата година, а имаше и забележително претставување на дузина фестивали низ светот: Торонто, Цирих, Рејкјавик, Лондон, Мишколц (Специјална наградат на жирито за Немеш)…

Во 2015 година Ласло Немеш го освои Оскарот за најдобар филм од неанглиското говорно подрачје со исклучително потресната драма за страдањето на Евреите во Втората светска војна, СИНОТ НА САУЛ.

Возрасна категорија:  14 години

Влезница: 100 денари

 

 

 

ДЕНОВИ НА СОВРЕМЕН МЕКСИКАНСКИ ФИЛМ 21-25 ЈУНИ

 

 

21 ЈУНИ (ПЕТОК) 20:00 ч.

НЕ Е ВИНОВНО ДЕТЕТО

 (¿Qué culpa tiene el niño?)

Игран филм, Мексико

2016, 105 мин., колор, ДЦП

Режија и сценарио: Густаво Лоза (Gustavo Loza)

Улоги: Карла Соуза, Рикардо Абарка, Басини Сегура (Karla Souza, Ricardo Abarca, Biassini Segura)

 

Мару е успешна девојка која неодамна била оставена од нејзиното долгогодишно момче за кое таа сметала дека еден ден ќе се омажи. По една пијана вечер, на свадбата на нејзината пријателка, Мару ќе остане бремена и ќе мора да се сети со кого била таа ноќ.

Со помош на нејзините пријателки, таа дознава дека татко на нејзиното дете е едно неискуно и невработено 19-годишно момче. Ќе бидат принудени да стапат во брак, под присила на традицијата и стереотипите.

Возрасна категорија:  14 години

Влезница: бесплатен влез

 

 

 

22 ЈУНИ (САБОТА) 20:00 ч.

ПОЧЕТОКОТ НА ВРЕМЕТО

 (El Comienzo del Tiempo?)

Игран филм, Мексико

2014, 110 мин., колор, ДЦП

Режија и сценарио: Бернардо Арелано (Bernardo Arellano)

Улоги: Aнтонио Перез Карбахал, Берта Оливиа Рамирез, Франческо Бареиро (Antonio Pérez Carbajal, Bertha Olivia Ramírez, Francisco Barreiro)

 

Антонио и Берта се постара двојка во деведесеттите години од нивниот живот, кои ќе се најдат во неволја кога нивните пензиите ќе им бидат сопрени заради социјалната и финансиската криза во земјата. Со оглед на тоа што долго време не ги виделе нивните две деца, тие ќе се соочат со преживување во тешките услови на суровата реалност и тоа преку продажба на нивните лични предмети и ситниот криминал. Животот на постарата двојка се менува кога синот Хонас и внукот Пако, по десет години, неочекувано ќе се појават во нивниот живот.

Возрасна категорија:  14 години

Влезница: бесплатен влез

 

 

 

23 ЈУНИ (НЕДЕЛА) 20:00 ч.

ГЕНЕРАЦИЈА СПИЛБЕРГ

 (Generación Spielberg)

Игран филм, Мексико

2013, 110 мин., колор, ДЦП

Режија и сценарио: Хибран Базан (Gibrán Bazán)

Улоги: Бруно Бишир, Силвија Карусиљо, Софи Гомез, Алехандро Дуран (Bruno Bichir, Silvia Carusillo, Sophie Gómez, Alejandro Durán)

 

Пет поврзани приказни. Љубовници ќе се обидат да останат 24 часа во нивната постела, обидувајќи се да наликуваат на Јоко Оно и Џон Ленон. Една девојка е заглавена во лифт во една зграда, заедно со еден поштар и сметководител. Група писатели инхалираат мескалин во едно комбе и се враќаат во времето. Психоаналитичар се заклучува себеси во бањата во обид да изврши самоубиство. Една директорка и мајка се заклучува во шпајзот во нејзината фирма. Сите тие се поврзани меѓу себе и комуницираат преку нивните мобилни телефони.

Возрасна категорија:  14 години

Влезница: бесплатен влез

 

 

 

 

24 ЈУНИ (ПОНЕДЕЛНИК) 20:30 ч.

КОГА ЌЕ СЕ ВРАТАТ ДЕЦАТА

 (Cuando los Hijos regresan)

Игран филм, Мексико

2017, 100 мин., колор, ДЦП

Режија: Хуго Лара (Hugo Lara)

Сценарио: Клаудија Гонзалес-Рубио, Хуго Лара (Claudia González-Rubio, Hugo Lara)

Улоги: Фернандо Лухан, Кармен Маура, Сесилија Суарез, Ирене Азуела, Франциско де ла Регера (Fernando Luján, Carmen Maura, Cecilia Suárez, Irene Azuela, Francisco de la Reguera)

 

Пензионерска двојка ќе мора да си го одбрани домот против заканата од враќањето на нивните деца.

Возрасна категорија:  14 години

Влезница: бесплатен влез

 

 

 

 

25 ЈУНИ (ВТОРНИК) 20:00 ч.

ТОВАР

 (La Carga)

Игран филм, Мексико

2016, 94 мин., колор, ДЦП

Режија: Алан Хонсон (Alan Jonsson)

Сценарио: Алан Хонсон, Артуро Руиз Серано (Alan Jonsson, Arturo Ruiz Serrano)

Улоги: Мариа Валверде, Хорасио Гарсија-Рохас, Ерик Францес, Герардо Тарацена, Еусебио Лазаро (María Valverde, Horacio García-Rojas, Eric Francés, Gerardo Taracena, Eusebio Lázaro)

 

Доцен шеснаесетти век. Еден Индијанец од племето Тамеме и благородничка бегаат низ шумите на Новиот свет барајќи ја нивната слобода. Нивното избезумено патување ќе ја ублажи тензијата меѓу нив и ќе ги надмине разлики, а тоа ќе прерасне во интимна врска што ќе го загрози нивниот опстанок.

Возрасна категорија:  14 години

Влезница: бесплатен влез

 

 

 

 

ОМАЖ НА ЈОХАН МЕЛИН 26-30 јуни

 

26 ЈУНИ (СРЕДА) 20:00 ч.

КУЧЕТО ГЛЕДА

(Dog is watching)

Игран филм, Шведска

1999, 20 мин., колор, ДЦП

Режија и сценарио: Јохан Мелин (Johan Melin)

Улоги: Фредрик Сјохолм, Ники Норденсколд, Јохан Баксторм, Густав Деиноф (Fredrik Sjöholm, Niki Nordensköld, Johan Bäckström, Gustav Deinoff)

 

Лажен документарец за животот на фашистичките чувари кои тајно сонуваат да бидат полицајци.

Возрасна категорија:  14 години

Влезница: бесплатен влез

 

 

 

26 ЈУНИ (СРЕДА) 20:00 ч.

ПОД НУЛАТА

(Below down Zero)

Игран филм, Данска

2003, 12 мин., колор, ДЦП

Режија и сценарио: Јохан Мелин (Johan Melin)

Улоги: Луиз Мериц, Томас Габриелсон, Сорен Маилинг (Louise Mieritz, Thomas Gabrielsson, Søren Malling)

 

Рике е бездомник и не го видела својот син скоро една година. На неговиот роденден, Рике има шанса да се искупи себе си и да најде подарок за него. Студентски филм за Националната филмска школа на Данска.

Возрасна категорија:  14 години

Влезница: бесплатен влез

 

 

 

 

 26 ЈУНИ (СРЕДА) 20:00 ч.

СТЕПСКИ ВОЛЦИ

(Steppenwolves)

Игран филм, Данска

2005,37 мин., колор, ДЦП

Режија и сценарио: Јохан Мелин (Johan Melin)

Улоги: Јаков Кедергрен, Лаи Иде, Шарлот Гулдберг, Мет Рибер Кристоферсен (Jakob Cedergren, Lai Yde, Charlotte Guldberg, Mette Riber Christoffersen)

 

Јакоб ќе се врати во своето родно гратче по отслужената казна затвор, каде што лежел наместо неговите пријатели. Сега е одлучен повторно да ја освои Ања, неговата љубов, но времето променило сè и Јакоб мора да се соочи со прерасудите од општеството.

Возрасна категорија:  14 години

Влезница: бесплатен влез

 

 

 

26 ЈУНИ (СРЕДА) 20:00 ч.

МИН ОРТ – ЉУБОВНА ПРИКАЗНА

(Min Ort – A Love Story)

Документарен филм, Шведска

2017, 32 мин., колор, ДЦП

Режија и сценарио: Јохан Мелин (Johan Melin)

Улоги: Раат Алаудин, Амина Скоратовска, Саид Вилјам Леге, Кевин Фо (Raad Alaulddin, Amina Skoratovska, Said William Legue, Kevin Foo)

 

Трагична драма за Ахмед кој ја сака Амина. Кога нејзините браќа ќе дознаат за нивната врска, сè ќе се промени. По интервјуата со младите луѓе од предградијата, ова е е прв филм кој ги следи овие два карактери по повеќе од една година.

Возрасна категорија:  14 години

Влезница: бесплатен влез

 

 

 27 ЈУНИ (ЧЕТВРТОК) 20:00 ч.

РОДИОН РАСКОЛНИКОВ

(Rodion Raskolnikov)

Игран филм, Данска

2013, 17 мин., колор, ДЦП

Режија и сценарио: Јохан Мелин (Johan Melin)

Улоги: Кристофер Сване, Ана Фабрициус, Елена Бундаловиќ, Здравко Милановиќ, Јете Карла Нилсен (Christoffer Svane, Anna Fabricius, Elena Bundalovic, Zdravko Milanovic, Jette Carla Nielsen)

 

Немa филмска адаптација на „Злосторство и казна“ на Достоевски каде Родион Расколников шета наоколу со ужасна наполеонова идеја: да го убие лихварот, коренот на сето зло… А веќе го нашол и оружјето…

Возрасна категорија:  14 години

Влезница: бесплатен влез

 

 

 

27 ЈУНИ (ЧЕТВРТОК) 20:00 ч.

МАЛО ГРАТЧЕ

(Köftbögen)

Игран филм, Данска

2003, 76 мин., колор, ДЦП

Режија и сценарио: Јохан Мелин (Johan Melin)

Улоги: Сверир Гуднасон, Тове Апелквист, Тед Франсон, Рајнер Гердес, Матиас Ост Кфотбоген (Sverrir Gudnason, Tove Appelqvist, Ted Fransson, Rainer Gerdes, Mattias Östh Köftbögen)

 

Ова е дебитантен и автобиографски филм за Јохан, панк-рокерот и сонувачот чија девојка Карин ќе замине за Херјунга. Ова е филм за растењето, за панк-рок музиката и за преживувањето во еден град каде ништо не се случува. Мелин имал само 21 година кога го режирал овој филм со мал буџет, пред да се пресели во Копенхаген, каде ќе ги започне филмските студии.

Возрасна категорија:  14 години

Влезница: бесплатен влез

 

 

28 ЈУНИ (ПЕТОК) 20:00 ч.

ОСВЕТЛУВАЊЕ

(The Brightening)

Игран филм, Данска

2018, 75 мин., колор, ДЦП

Режија и сценарио: Јохан Мелин (Johan Melin)

Улоги: Рајнер Гердес, Ана Фабрициус, Патриција Шуман, Томас Кнут-Винтерфелд, Андерс Хове (Rainer Gerdes, Anna Fabricius, Patricia Schumann, Thomas Knuth-Winterfeldt, Anders Hove)

 

Данте има писателска криза и работи во кланицата на неговиот свекор. Наскоро треба да стане татко. Но, Господ побара од Данте да го убие премиерот за Господ повторно да се симне на земјата. Данте ќе ја запознае Наталија, а таа ќе стане неговата муза. И Наталија исто така знае како да контактира со Господ. Ова е психоделична драма за љубовта и смртта. И ова ќе биде премиерно прикажување на филмот ОСВЕТЛУВАЊЕ.

Возрасна категорија:  14 години

Влезница: бесплатен влез

 

 

 

29 ЈУНИ (САБОТА) 19:00 ч.

ПРЕЛУДИУМ

(Preludium)

Игран филм, Данска

2008, 103 мин., колор, ДЦП

Режија и сценарио: Јохан Мелин (Johan Melin)

Улоги: Ана Фабрициус, Патриција Шуман, Лаи Иде,  Томас Кнут-Винтерфелд, Рајнер Гердес (Anna Fabricius, Patricia Schumann, Lai Yde, Thomas Knuth-Winterfeldt, Rainer Gerdes)

 

Ова е приказна за неколкумина скршени луѓе кои се обидуваат да најдат среќа и да живеат во сегашноста. Филмот е снимен во еден долг кадар, низ Копенхаген – 20 актери и кинематограф со скејтборд. Ова е прв наративен филм снимен во еден кадар, а она што не го знаеле  филмаџиите е фактот дека Ирак победил на Азиското првенство во фудбал и дека Копенхаген таа ноќ експлодирал во радост и лудило.

Возрасна категорија:  14 години

Влезница: бесплатен влез

 

 

 

 

29 ЈУНИ (САБОТА) 21:00 ч.

ПРОРОШТВО

(Profetia)

Игран филм, Данска

2009, 106 мин., колор, ДЦП

Режија и сценарио: Јохан Мелин (Johan Melin)

Улоги: Ана Фабрициус, Патриција Шуман, Анете Карлсен, Кристофер Сване, Сана Тор, Рајнер Гердес, Петер Хесе Овергард (Anna Fabricius, Patricia Schumann, Anette Karlsen, Svane, Sanna Thor, Rainer Gerdes, Peter Hesse Overgaard)

 

Ова е филмот што следи по ПРЕЛУДИУМ, каде раскршените приказни оживуваат преку Софи Јенсес, пропадната писателка која решила да изгори сè што некогаш напишала во еден чудeн амфитеатар во Копенхаген.

Возрасна категорија:  14 години

Влезница: бесплатен влез

 

 

 

 

 

30 ЈУНИ (НЕДЕЛА) 20:00 ч.

МИН ОРТ – ОВА Е ШВЕДСКА

(Min Ort – This is Sweden)

Игран филм, Данска

2018, 75 мин., колор, ДЦП

Режија и сценарио: Јохан Мелин (Johan Melin)

Улоги: Амина Скоратовска, Мина Францен, Себастиан Теодорсон, Денис Игнасио, Саид Вилјам Леге и многу други (Amina Skoratovska, Mina Franzén, Sebastian Theodorsson, Deniece Ignacio, Said William Legue and many more)

 

Ова е вториот филм од „Гетеборг проџект Мин Орт“. Кога братот на Амина, Мустафа, ќе исчезне, таа ќе се обиде да открие што се случило. Но сè е една голема мешаница во предградијата – во обид да го пронајде својот брат, таа ќе мора да ги натера бандите да соработуваат.

Возрасна категорија:  14 години

Влезница: бесплатен влез

 

 

 

Leave a comment