– ИСТОВРЕМЕНО ПРИКАЖУВАЊЕ ВО ПОВЕЌЕ ГРАДОВИ НИЗ ДРЖАВАТА-
Премиерата на КАЈМАК, новиот игран филм на Милчо Манчевски ќе се случи на16. ноември во 20 часот во Македонската филхармонијa во Скопје, а веќе следниот ден, КАЈМАК ќе биде дел од редовниот кинорепертоар во киносалите во речиси 30 градови низ земјава.
КАЈМАК ќе игра во цела Македонија. Направивме напор филмот да го донесеме во секое кино, каде има техничка можност за прикажување“, вели продуцентот Јане Ќортошев.
„КАЈМАК е љубовна приказна за возрасни“, вели режисерот Манчевски. Тоа е црна комедија (или среќна трагедија) за две семејства кои се пристојни на почетокот, а среќни на крајот. Филмот е безмилосна критика на малограѓанското лицемерие и апотеоза на индивидуалната слобода.
На денешната прес конференција, Манчевски изјави: „Комшијата е најважната институција во една малограѓанска средина. Но, секое добро уметничко дело те кани да го ѕирнеш светот со поинакви очи. КАЈМАК ја кани публиката да не суди, туку да сочувствува со ликовите – а сите тие се во исто време и жртви и душмани“.
Неодамна, КАЈМАК имаше светската премиера и три распродадени проекции на Токискиот филмски фестивал. Реакцијата на јапонската публика беше извонредна. Весникот „Џапан тудеј“ (Japan Today) го нарече филмот „мрсна сатира“. Манчевски беше во центарот на збиднувањата во Токио, каде одржа и мастерклас кој имаше голем одглас кај публиката.
Веднаш потоа КАЈМАК отпатува во Тајван, каде се прикажа на Филмскиот фестивaл „Златен коњ“ (Golden Horse) во Тајпеј. По двете преполни проекции и едночасовни редици на публиката за автограм од македонскиот режисер, следеа сесии разговори со публиката која ја пофали приказната, велејќи дека постојано изненадува.
Актерките Ана Стојановска и Сара Климоска, кои имаа прилика први да го погледнат филмот во Токио, по проекцијата имаа и разговори со јапонската публика.
„Искуството во Токио беше фузија на ултрамодерно и традиционално. Црвениот килим беше посебно искуство, зборуваме за култура на ред и хармонија. Филмот им се допадна многу на Јапонците, а и на нас. Импресиите од разговорите со публиката беа дека филмот ги насмеал, расплакал и ги замислил, интересно беше дека нè следеа по проекцијата, не само на фестивалот, туку и на улица за да земат автограми од нас“, велат актерките Климоска и Стојановска.
Киноприкажувањето низ Македонија започнува во четврток, 17. ноември и закажано е во Гостивар, Пробиштип, Делчево, Кавадарци, Крива Паланка, Куманово, Виница, Крушево, Струмица, Македонска Каменица, Тетово, Дебар, Берово, Неготино, Богданци, Кратово, Радовиш, Струга, Кичево, Охрид, Свети Николе, Прилеп и Штип. Премиерата во Битола и Гевгелија е закажана за 23. ноември. Во Скопје од 17. ноември филмот ќе игра во кината „Синеплекс“ и „Милениум“.
Филмот е финансиран од Агенцијата за филм на Северна Македонија и државните фондови на Данска, Холандија и Хрватска, како и од европскиот фонд „Еуроимаж.“
По сценарио и режија на Манчевски, во филмот играат: Сара Климоска, Камка Тоциновски, Александар Микиќ, Симона Спировска, Ана Стојановска, Филип Трајковиќ, Петар Мирчевски, Сашка Димитровска, Лазе Манасковски, Јасмина Василева, Дејан Лилиќ, Елена Кузманов, Крсте Роџевски, Ратка Радмановиќ, Ана Димитрова, Никола Ристески, Ангела Димитрова, Соња Михајлова, Александра Пешевска, Ѓорѓи Јолевски, Љиљана Богојевиќ, Сара Станиќ и други.
Македонски продуцент на филмот се „Банана филм“ и Јане Ќортошев, а Македонската Радио Телевизија се јавува како копродуцент. Други учесници во пректот се Дејвид Манс како дизајнер на продукција, Улрик Боел Бенцен како директор на фотографија, монтажер е Емил Нунинга, дизајнер на звукот Херман Пиете, кастинг директор е Милка Анчевска, костимограф Жаклина Крстевска, а дизајнер на шминка е италијанската легенда Марио Микисанти. Музиката е на култниот „Дејниш стринг квартет“, а дополнителната музика на Игор Василев-Новоградска. Во екипата беа вклучени и независни филмски работници од Англија, Италија, Србија и Бугарија.
Филмот е помогнат од бројни домашни и странски поединци и компании, меѓу кои и Алкалоид, НЛБ Банка, Виза; Окта, Тиквеш, Витаминка и Дајмонд оф Скопје.
Македонската радио телевизија, директно ќе севклучи и во церемонијалот од црвениот килим на гала премиерата.
