МЕСЕЦ НОЕМВРИ ВО КИНОТЕКА
Во ноември, месец на есента, природата блика од разновидноста на боите. Слични на оние на виножитото. Најмногу преовладува жолтата, речиси како злато сјае во есенскиот амбиент. Токму вака кинотека за ноември подготви филмска презентација, разновидна во многу аспекти. Еве зошто.
На самиот почеток на ноември ќе започне со официјалната програма на МЕСЕЦ НА ЕВРОПСКИ ФИЛМ што ќе се одржи од 1 ноември до 9 декември. Во овој месец Кинотеката заедно со уште многу други кина во 70 различни градови во Европа ќе ја слави фантастичната разновидност на европскиот филм. Проектот МЕСЕЦ НА ЕВРОПСКИ ФИЛМ, предводен од мрежата на кина – „Еуропа синемас“, им за цел низ различни европски градови и преку различни европски филмови да презентираи специјални програми, настани и ретроспективи.
Но во овој месец кинотека испланираа сè до половината на месецот да бидат презентирани, во популарно наречената недела на филмот, јапонски филмови. Станува збор за понова продукција на оваа интересна и многу влијателна кинематографија.
Не се одминува нашиот, македонски филм. Тоа се нови проекти. Првин ќе биде промовиран ЛЕНА И ВЛАДИМИР. Режисерскиот потпис е на Игор Алексов, по сценарио на Александар Русјаков, а главните улоги ги толкуваат Сара Климоска и Тони Наумовски. Филмската публика ќе има можност, по неколку успешни патешествија, да го проследи ДОМАЌИНСТВО ЗА ПОЧЕТНИЦИ, новиот филмски проект на тетовчанецот, со долгогодишна адреса на живеење во Австралија, Горан Столевски.
Како еден вид пауза од играните филмови, ќе биде прикажан документарецот со провокативен наслов КАНАБИСОТ ОСЛОБОДУВА. Ова е есеј за неколкумина активисти од разни земји, кои се залагаат за легализација на канабисот. Мала ексклузива – во него учествува и познатиот, контроверзен музичар и инфлуенсер, Рамбо Амадеус. Културата на канабисот има битна улога во веќе култното остварување на браќата Коен, ГОЛЕМИОТ ЛЕБОВСКИ. Филмот ќе биде проектиран на оригинална 35 милиметарска филмска копија.
Се продолжува со играни филмови. Шпански филмови со различно време на создавање, од различни автори, со различни естетски колорити. Неколку денови од втората половина на ноември се издвоени за филмовите од авторите кои се од Пиринејскиот полуостров. Од Апенинскиот полуостров, пак, односно од Италија, ни доаѓа филмот СЕ ПРАШУВАМ КОГА ЌЕ ТИ НЕДОСТИГАМ. Но пред ова остварување да го заокружи месец ноември во кинотека, времето ќе биде искористено за презентација на неколку наслови од филмографијата на авторката на документарци, Петра Селишкар. Тие се со различни содржини, од различни жанрови, а го претставуваат светогледот на авторката.
Така ќе заврши ноември во кинотека, но не и иницијативноста на овој храм на филмот, кој веќе ја подготвува програмата за последниот месец на годината, декември. Квалитетни филмови нема да ви недостигаат. Проследете ги.
1 НОЕМВРИ (СРЕДА) 21:00 ч.
4 НОЕМВРИ (САБОТА) 18:00 ч.
18 НОЕМВРИ (САБОТА), 18:00 ч.
20 НОЕМВРИ (ПОНЕДЕЛНИК), 18:00 ч.
ЛЕНА И ВЛАДИМИР
(Lena and Vladimir)
Игран филм, Македонија / Србија
2023, 95 мин., колор, ДЦП
Режија: Игор Алексов (Igor Aleksov)
Сценарио: Александар Русјаков (Aleksandar Rusjakov)
Улоги: Тони Наумовски, Сара Климоска, Дениз Абдула, Петар Мирчевски, Благоја Чоревски, Петре Арсовски (Toni Naumovski, Sara Klimoska, Deniz Abdula, Petar Mirchevski, Blagoja Chorevski, Petre Arsovski)
Судбината спојува двајца бегалци, Владимир, 40-годишен маж кој ја изгубил сета своја љубов, и Лена, 16-годишна девојка која никогаш немала љубов. Тие си помагаат еден на друг да ја откријат љубовта кон животот.
Возрасна категорија: 16 години
Влезница: 150 денари
НЕДЕЛА НА ЈАПОНСКИ ФИЛМ
3 НОЕМВРИ (ПЕТОК), 20:00 ч.
БАРЕМ ЉУБОВ
(Ikiterudakede Ai / Love at least )
Игран филм, Јапонија
2018, 109 мин., колор, ДЦП
Режија: Косаи Секине (Kôsai Sekine)
Сценарио: Јукико Мотоја, Косаи Секине (Yukiko Motoya, Kôsai Sekine)
Улоги: Шури, Масаки Суда, Рииса Нака, Тецуши Танака (Shuri, Masaki Suda, Riisa Naka, Tetsushi Tanaka)
Сите имаме денови кога дури и станувањето од кревет ни е тешко. Но, за Јасуко, секој ден е предизвик. Таа има Хикикомори синдром (екстремен облик на социјална фобија од која страдаат милиони млади Јапонци) проследен со хиперсомнија. Поради нејзината ментална состојба, едноставните работи како секојдневните домашни обврски и одењето на работа изгледаат невозможни. Таа живее со нејзиното момче Цунаги, кој работи во редакција во едно списание. Нејзината фрустрација расте, бидејќи не може да ги контролира емоциите, а нејзиното момче Цунаги се чини е рамнодушно кон неа. Еден ден се појавува поранешната девојка на Цунаги, Андо, која има намера да ја раскине врската на Јасуко.
БАРЕМ ЉУБОВ е дебитански филм на Косаи Секине – млад јапонски режисер кој е познат како автор на различни интерактивни содржини, музички спотови, уметнички инсталации и реклами за познати брендови како Најк (Nike), Адидас (Adidas) и Уникло (Uniqlo). Филмот е адаптација на истоимениот најпродаван роман на Јукико Мотоја (Yukiko Motoya). Далеку од мелодраматична романса, во филмот режисерот ги доловува нијансите на љубовта, себството и другоста преку визуелно привлечна и на моменти провокативна нарација.
Возрасна категорија: 16 години
Влез бесплатен
НЕДЕЛА НА ЈАПОНСКИ ФИЛМ
4 НОЕМВРИ (САБОТА), 20:00 ч.
ДОЛГОТО ЗБОГУВАЊЕ
(Nagai owakare / A Long Goodbye)
Игран филм, Јапонија
2018, 109 мин., колор, ДЦП
Режија: Рјота Накано (Ryôta Nakano)
Сценарио: Рјота Накано, Тошиа Оно (Ryôta Nakano, Toshiya Ôno)
Улоги: Ју Аои, Хана Грејс, Јуито Камата (Yû Aoi, Hannah Grace, Yuito Kamata)
Еден седумдесетгодишен пензиониран директор на училиште гo известува своето семејство (сопругата и двете ќерки) дека има Алцхајмерова болест. Трите жени се загрижени и секоја различно реагира на новонастанатата ситуација додека неговата болест напредува.
ДОЛГОТО ЗБОГУВАЊЕ е адаптација на истоимениот роман на Кјоко Накаџима (Kyoko Nakajima) и ја прикажува секоја фаза од болеста на неговиот херој, од почеток до крај. Во филмот е претставена драмата на индивидуалните предизвици на членовите на семејството, како и нивните жртви додека тие се справуваат со болеста на нивниот сопруг и татко. Тие се сведоци на неговото пропаѓање. Поради болеста тој почнува да ја губи меморијата. Но, сфаќаат дека има некои работи од неговиот живот што никогаш нема да ги заборави.
ДОЛГОТО ЗБОГУВАЊЕ е последниот филм на Рјота Накано (Ryôta Nakano), еден од најеминентните преставници на новата генерација на јапонски филмаџии. Во неговите филмови најчесто се интересира за смртта, со посебен фокус на семејството и предизвиците што таа ги носи за нив.
Овој филм се издвојува со тоа што семејството не го претставува како токсична средина (што е вообичаениот тренд во современата јапонска кинематографија) туку го прикажува во позитивно светло.
Возрасна категорија: 16 години
Влез бесплатен
НЕДЕЛА НА ЈАПОНСКИ ФИЛМ
6 НОЕМВРИ (ПОНЕДЕЛНИК), 20:00 ч.ОСАМЕНОТО УМЕ ДРВО
(Ume kiranu baka / Lone Ume tree)
Игран филм, Јапонија
2021, 77 мин., колор, ДЦП
Режија: Котаро Ваџима (Kotaro Wajima)
Сценарио: Котаро Ваџима, (Kotaro Wajima)
Улоги: Марико Кага, Муга Цукаји, Икеи Ватанабе, Јоко Моригучи (Mariko Kaga, Muga Tsukaji, Ikkei Watanabe, Yôko Moriguchi)
Една стара куќа стои меѓу новоизградените згради, како да е оставена сама за себе. Тамако, популарна бајачка, со години живее таму, заедно со својот син Тадао. Бидејќи Тадао е аутист, нивните соседи често се жалат на неговото непредвидливо однесување. Еден ден, Тамако дознава дека е има слободна соба во групен дом за лица со интелектуална попреченост каде тие живеат независни од своите семејства. Тамако решава да го пушти Тадао да се пресели во групниот дом. Меѓутоа, Тадао, збунет од ненадејната промена на средината, бега од домот и се впушта во проблематичен инцидент.
ОСАМЕНОТО УМЕ ДРВО е вториот филм на Котаро Виџима (Kotaro Wajima). Тоа е човечка драма за борбата на мајката и на нејзиниот аутистичен син за својата независност во однос на заедницата во која живеат. Режисерот со голема чувствителност и нишка на хумор ја доловува силата и виталноста на мајката и синот, притоа не бегајќи од проблемите, предрасудите и конфликтите со кои се соочуваат обесправените луѓе и нивните семејства во Јапонија.
Возрасна категорија: 16 години
Влез бесплатен
НЕДЕЛА НА ЈАПОНСКИ ФИЛМ
7 НОЕМВРИ (ВТОРНИК), 20:00 ч.
ФИЛМСКИТЕ ЛАЖГОВЦИ ОД АСАХИ-ЗА
(Hama no asahi no usotsukidomo to / Cinematic Liars of Asahi-za)
Игран филм, Јапонија
2021, 114 мин., колор, ДЦП
Режија: Јуки Танада (Yuki Tanada)
Сценарио: Јуки Танада (Yuki Tanada)
Улоги: Митсуки Такахата, Кјотаро Јанагија, Кајоко Окубо (Mitsuki Takahata, Kyotaro Yanagiya, Kayoko Ohkubo)
ФИЛМСКИТЕ ЛАЖГОВЦИ ОД АСАХИ-ЗА раскажува за Асахи-за, вистинско кино во градот Минамисома, префектурата Фукушима, кое постои речиси 100 години. За разлика од другите кина, во Асахи-за се прикажуваат стари филмови и нема многу публика. Но, и покрај тоа има верни гледачи-филмофили кои го посетуваат киното дури и во времиња на големи катастрофи како што се земјотреси, тајфуни и Ковид пандемијата. Менаџерот на Асахи-за, Јасузо Морита, конечно одлучува да го затвори киното. Кога сака да ги запали старите филмови на 35 мм, ненадејно се појавува една млада жена по име Рико Моги која се обидува да го спречи. Таа доаѓа од Токио за да го спаси киното.
Филмот е уникатен експеримент, снимен по повод 50-годишнината од отворањето на Централната телевизија во Фукушима. Имаше премиера во 2020-тата година (во пикот на КОВИД пандемијата) истовремено и на телевизија и во кино, и претставува мултимедијалната приказна за една млада жена која решава да помогне во оживување на стогодишното кино во еден мал град во Фукушима како начин да ѝ се оддолжи на учителката која ѝ помогнала. Двата дела се поврзани со истата актерска екипа и ликови, но се разликуваат во нивните приказни.
Филмот е режиран од Јуки Танада (Yuki Tanada), една од најпродуктивните и најуспешни режисерки во Јапонија, со кариера од повеќе од 20 години и десетина играни филмови зад себе како режисерка: ДЕВОЈКА ОД МИЛИОН ЈЕНИ (One Million Yen Girl / Hyakuman-en to nigamushi onna, 2008), УТРИНСКИ РЕЦЕПТ (Mourning Recipe, 2013) и МОРУ (Moru, 2001). Нејзиниот опус е разновиден и таа се има испробано во различни жанрови, од комедија до документарен филм. Но, нејзин главен интерес се приказните за жени кои се борат со економските нееднаквости.
Возрасна категорија: 16 години
Влез бесплатен
НЕДЕЛА НА ЈАПОНСКИ ФИЛМ
8 НОЕМВРИ (СРЕДА), 20:00 ч.
МАКУКО
(Makuko)
Игран филм, Јапонија
2019, 108 мин., колор, ДЦП
Режија: Кеико Цуруока (Keiko Tsuruoka)
Сценарио: Канако Ниши, Кеико Цуруока (Kanako Nishi, Keiko Tsuruoka )
Улоги: Хикару Јамазаки, Нинон, Риса Судоу (Hikaru Yamazaki, Ninon, Risa Sudou)
Сатоши e ученик во петто одделение од основно училиште, кој живее во едно јапонско гратче познато по своите со топли извори – мало место каде сите се познаваат. Тој почнува да забележува промени во своето тело што не му се допаѓа, бидејќи не сака да порасне. Еден ден, Сатоши ја запознава Козуе, убава студентка на размена која е постара од него. Козуе е почитувана од децата во нејзиното одделение, но е многу необична девојка која сака да прави сè. Отпрвин, Сатоши држи дистанца од неа, но паѓа на нејзиниот шарм и постепено се зближува со Козуе. Почнуваат интензивно да комуницираат. Еден ден, таа на Сатоши му открива голема и мистериозна тајна по која тој созрева. Таа е од многу далечно место и носи подарок за Сатоши и жителите на градот.
Филмот е адаптација на истоимениот роман на Канако Ниши (Kanako Nishi). И во овој филм режисерката Кеико Цуруока (Keiko Tsuruoka) раскажува љубовна приказна преку мешање на жанровите.
Филмот е приказна за стравот од растење, стравот од влегување во комплицираниот и контрадикторен свет на возрасните. Ова е еден од оние филмови кои ја изненадуваат публиката и нејзиниот хоризонт на очекување, бидејќи жанровски е една невообичаена комбинација на приказна за растење и научна фантастика која одлично функционира.
Возрасна категорија: 16 години
Влез бесплатен
6 НОЕМВРИ (ПОНЕДЕЛНИК), 18:00 ч.
ИСПРАВИ СЕ, ДЕЛФИНА
(Stand up Straight, Delfina)
Игран филм, Македонија
1977, 101 мин., колор, 35 мм
Режија: Александар Ѓурчинов (Aleksandar Gjurchinov)
Сценарио: Александар Ѓурчинов(Aleksandar Gjurchinov)
Улоги: Неда Арнериќ, Диме Илиев, Слободан Димитриевиќ, Дарко Дамески (Neda Arnerić, Dime Iliev, Slobodan Dimitrijević, Darko Dameski)
Приказна за девојката Делфина, која е решена да ги совлада сите оние тешкотии и разочарувања што ги носи со себе животот и да истрае во совладувањето на водите од каналот Ла Манш. Делфина се подготвува да го преплива каналот. Меѓу случајните минувачи е и Рене, инвалид во количка, кој го препливал каналот и сите пливачи ги испраќа на нивниот долг пат. Во бродот што ја придружува, покрај судиите, се нејзиниот тренер Атанас и пријателот Петко. Тоа се единствените луѓе што вистински ја сакаат Делфина и кои настојуваат да ѝ помогнат во остварувањето на подвигот.
Додека плива во разбранетото и студено море, Делфина се сеќава на изминатиот живот: како се запознава со Младен, тренерот на републичката репрезентација во пливање, за првите интимни контакти со него, за наставата во угостителското училиште и за членувањето во локалниот пливачки клуб. Кога еден ден добива стипендија за школување во ДИФ, Делфина не се двоуми и заминува за Скопје, зашто очекува од животот многу повеќе, и е решена ништо да не ја спречи во намерата да го осмисли својот живот и да го најде вистинскиот пат. Сите напори, сите достигнувања, сите падови и омаловажувања, Делфина ги надминува стоички. Препливувањето на Ла Манш ќе значи единствена можност Делфина да ја врати самодовербата, желбата за нормално живеење и самопочитта. Делфина ја води последната битка, со крајни напори се исправа на своите нозе и го постигнува невозможното.
Возрасна категорија: 12 години
Влезница: 100 денари
7 НОЕМВРИ (ВТОРНИК) 18:00 ч.
СРЕЌНА НОВА`49
(Happy New `49)
Игран филм, Македонија
1986 г., 125 мин., колор, 35 мм
Режија: Столе Попов (Stole Popov)
Сценарио: Гордан Михиќ (Gordan Mihić)
Улоги: Александар Ѓорчев, Мето Јовановски, Светозар Цветковиќ, Владица Милосављевиќ, Петар Арсовски, Мите Грозданов, Душко Костовски (Svetozar Cvetković, Meto Jovanovski, Vladica Milosavljević, Petar Arsovski, Aleksandar Gjorchev, Mite Grozdanov, Dushko Kostovski)
Дејството на филмот започнува во јуни 1948 година. Група југословенски студенти, на школување во СССР, по несогласувањата меѓу двете земји се враќаат дома. Меѓу другите, се и Драгослав, неговата девојка Вера и блискиот пријател Градимир, кого раздвојувањето со СССР го доведува до низа внатрешни конфликтни ситуации, кои конечно кулминираат со чинот на неговото самоубиство на железничката станица во Суботица. Истрагата во врска со самоубиството започнува веднаш, и Драгослав, како негов пријател и сопатник, дава објаснување за мотивите на самоубиството. Семејството на Драгослав го очекува неговото враќање, дотолку повеќе што неговата мајка, тешко болна, е пред умирање. Таткото Стојан, по професија каменорезец, се грижи за егзистенцијата на семејството. Тука се уште и неговата сестра Нела во годините кога престанува да биде дете, и браќата, помалиот Коле и Коста, гимназијалец, кој пред матурата заминува од училиштето. Тој се занимава со црноберзијански работи. За него нема повеќе авторитети, како што нема ни непознаници во живеењето „на работ“. Драгослав дома ја доведува и Вера со која сака да се ожени. Првата средба на Драгослав и Коста завршува со тепачка поради желбата на постариот брат Коста да живее и да се однесува во согласност со нормите на граѓанскиот живот. Непосредно потоа Драгослав е одведен од ОЗНА. Тој е обвинет дека е советски агент и е задржан во истражниот затвор.
Возрасна категорија: 16 години
Влезница: 100 денари
8 НОЕМВРИ (СРЕДА) 18:00 ч.
ЏИПСИ МЕЏИК
(Gipsy Magic)
Игран филм, Македонија
1997 г., 135 мин., колор, 35 мм
Режија: Столе Попов (Stole Popov)
Сценарио: Владимир Блажевски (Vladimir Blazhevski)
Улоги: Предраг Мики Манојловиќ, Бајрам Северџан, Горан Додевски, Катина Иванова, Владимир Јачев, Арна Шијак, Синоличка Трпкова (Predrag Miki Manojlović, Bajram Severdzhan, Goran Dodevski, Katina Ivanova, Vladimir Jachev, Arna Shijak, Sinolichka Trkova)
Таип, главата на едно повеќечлено и сиромашно ромско семејство, мечтае за Индија, прататковината на сите Роми. Случајно се запознава со индиски доктор кој е припадник на силите на УНПРОФОР, и добива идеја како да заработи пари, да купи коњ и да го однесе семејството во Индија. И така започнува низата „несреќни случки“ во семејството на Таип: посмртниците за бабата, мајката, синовите, ги потпишува докторот Риџу, а Таип ги добива парите што му следуваат од „социјалното“ за умирачките. Но, ваквиот начин на заработување е однапред осуден на неуспех и завршува трагично за семејството.
Возрасна категорија: 16 години
Влезница: 100 денари
10 НОЕМВРИ (ПЕТОК), 18:00 ч.
ХАЈ-ФАЈ
(HI-FI)
Игран филм, Македонија
1987, 102 мин., колор, 35 мм
Режија: Владимир Блажевски (Vladimir Blazhevski)
Сценарио: Горан Стефановски (Goran Stefanovski)
Улоги: Фабијан Шоваговиќ, Данчо Чевревски, Елизабета Ѓоревска, Вукосава Донева, Мето Јовановски (Fabijan Šovagović, Dancho Chevrevski, Elizabeta Gjorevska, Meto Jovanovski)
Преку фрагмент од животот на Борис и неговиот син Матеј, филмот зборува за судирот на генерациите, за создадениот јаз поради идеолошката обоеност која едниот ја има, а другиот не ја поседува или, пак, кај него се манифестира на друг начин, и низ поинаквото однесување во умеењето или неумеењето да се помине животот достојно за едно човечко битие… Политичкиот затвореник Борис, по неколкуте години минати во затвор, се враќа дома. Во станот во кој по разводот со жената живее сам, вселен е неговиот син Матеј. Синот е веќе возрасен човек кој се обидува да заработи и да се афирмира како музичар. Во станот е сместено импровизирано тонско студио. Начинот на кој живее Матеј, неговата врска со девојката Мира, луѓето со кои тој контактира не му се допаѓаат на Борис. Тој смета дека е тоа бесмислен живот, без планови и идеали.
За ваквата трансформација на синот тој ја обвинува поранешната сопруга која е успешна во професионалната кариера, но затоа нема авторитет пред синот и единственото што може да го направи е да ја обезбедува неговата материјална егзистенција. Уште еден неочекуван пораз го погодува Борис. Жената со која сака да го помине преостанатиот дел од животот, умира. Според него, сега единственото што може да го направи – е да го „врати“ синот на вистинскиот пат и да му покаже дека човек треба достојно да го минува времето што му е дадено. Она што му преостанува е да воведе суров режим во животот на синот. Ги прекинува сите негови контакти. Го врзува со лисици, а сите потреби и сета комуникација ја презема на себе. Според мислењето на Борис, сè што се случува е лично меѓу нив двајцата. Тој врши и вербална и физичка тортура врз синот, инсистирајќи тој да се согласи дека животот што го водел е залуден. Матеј не се согласува со ставот на таткото, но пасивниот отпор што го покажува го заплашува Борис. Нивните денови минуваат во играње шах и во пречукување на затворскиот дневник што Борис го водел секојдневно и без исклучок во затворот. Најпосле, Борис сепак го ослободува синот. Тие тргнуваат на пат кон родното село на таткото…
Возрасна категорија: 12 години
Влезница: 100 денари
Возрасна категорија: 12 години
Влезница: 100 денари
22 НОЕМВРИ (СРЕДА) 18:00 ч.
22 НОЕМВРИ (СРЕДА) 20:00 ч.
11 НОЕМВРИ (САБОТА) 20:00 ч.
М
(М)
Игран филм, Македонија / Хрватска / Косово / Франција / Луксембург
2022, 96 мин., колор, ДЦП
Режија: Вардан Тозија (Vardan Tozija)
Сценарио: Вардан Тозија (Vardan Tozija),
Улоги: Матеј Сиваков, Сашко Коцев, Александар Ничовски, Камка Тоциновски, Тони Михајловски, Бојана Грегориќ Вејзовиќ (Matej Sivakov, Sashko Kocev, Aleksandar Nichovski, Kamka Tocinovski, Toni Mihajlovski, Bojana Gregorić Vejzović)
Во зафрлена шума малиот Марко живее под будното око на таинствениот и претерано заштитнички настроен татко. Не знае ништо подалеку од нивниот изолиран живот. Марко бара утеха во својата скапоцена сликовница, наоѓајќи спокој и одговори меѓу нејзините страници. Еден ден, средба со едно љубезно, беспомошно момче по име Мико, внесува малку топлина и поврзаност во изолираниот свет на Марко. Како што му расте љубопитноста, Марко копнее да ги открие тајните што се кријат зад границите на дивината. Суров сплет на околности му ја исполнува желбата порано одошто очекува. Го чека тешко патување, исполнето со непознати опасности и можност да види еден засекогаш променет свет.
Возрасна категорија: 12 години
Влезница: 150 денари
16 НОЕМВРИ (ЧЕТВРТОК), 18:00 ч.
17 НОЕМВРИ (ПЕТОК), 18:00 ч.
КАНАБИСОТ ОСЛОБОДУВА
(Konoplja osvobaja / Cannabis Sets You Free)
Документарен филм, Словенија / Македонија / Хрватска
2022, 81 мин., колор, ДЦП
Режија и сценарио: Миха Челар (Miha Čelar)
Учесници: Рамбо Амадеус (Rambo Amadeus)
КАНАБИСОТ ОСЛОБОДУВА е документаристички есеј за активисти од Словенија, од поранешна Југославија и од други европски и светски земји што си го посветиле животот на легализација на канабисот. Некои од нив имаат влезено во судир со законот, но сите на овој или оној начин тргнуваат по патот на „канабис-револуцијата“.
Возрасна категорија: 18 години
Влезница: 150 денари
ДЕНОВИ НА ШПАНСКИ ФИЛМ
15 НОЕМВРИ (СРЕДА), 20:00 ч.
КРАВИ
(Vacas / Cows)
Игран филм, Шпанија
1992, 96 мин., колор, ДЦП
Режија: Хулио Медем (Julio Médem)
Сценарио: Хулио Медем, Мичел Гастамбиде (Julio Médem, Michel Gaztambide)
Улоги: Кармело Гомез, Ема Суарез, Ана Торент, Кара Елахаде (Carmelo Gómez, Emma Suárez, Ana Torrent, Karra Elejade)
КРАВИ е филм од 1991 година, по сценарио и режија на Хулио Медем. Тоа е првиот филм на Медем за кој ја има освоено наградата Гоја во 1993 година за најдобар нов режисер.
Филмот е морничава семејна сага сместена во рурална Баскија. Ги следи реплетените животни приказни на две семејства и нивното ривалство низ три генерации и повеќе од шеесет години, во еден нестабилен и крвав период, помеѓу 1875 и 1936 година. Режисерот Хулио Медем користи храбри стилски решенија за да ја илустрира цикличната природа на нерешениот судир меѓу двете ривалски семејства во филмот: користи ист актер низ различни генерации и понекогаш приказната се раскажува од ексцентрична гледна точка на кравите, симболична фигура на баскискиот идентитет и алузија на Герника на Пикасо.
КРАВИ е евокативен филм за значењето на семејството, честа, традицијата и сеќавањето со аура на мистерија. Тоа e еден од најважните шпански филмови во 1990-тите години, со кој започна оживувањето на баскиската кинематографија.
Возрасна категорија: 16 години
Влез бесплатен
ДЕНОВИ НА ШПАНСКИ ФИЛМ
16 НОЕМВРИ (ЧЕТВРТОК), 20:00 ч.
МАМА ПОЛНИ 100 ГОДИНИ
(Mamá cumple cien años / Mama Turns 100)
Игран филм, Шпанија
1979, 100 мин., колор, ДЦП
Режија: Карлос Саура (Carlos Saura)
Сценарио: Рафел Аскона, Карлос Саура (Rafael Azcona, Carlos Saura)
Улоги: Џералдин Чаплин, Фернан Гомез, Рафаела Апарисио, Ампаро Муњоз (Geraldine Chaplin, Fernando Fernán Gómez, Rafaela Aparicio, Amparo Muñoz)
МАМА ПОЛНИ 100 е шпанска комедија од 1979 година, во сценарио и режија на великанот на шпанската кинематографија, Карлос Саура, и беше номиниранa за наградата „Оскар“ за најдобар странски филм во 1979 година. Филмот е продолжение на драмата АНА И ВОЛЦИТЕ (Ana y los lobos), исто во режија на Саура во 1973 година. И двата филма се политичка алегорија на животот во Шпанија за време на диктатурата за Франко. Во МАМА ПОЛНИ 100 продолжува приказната за Ана, (играна од Џералдин Чаплин) која по многу години се враќа на имотот каде работела како дадилка. Таа е дојдена на прославата на 100-тиот роденден на матријархот. Но, наскоро дознава дека роднините на мајката подготвуваат заговор да ја убијат.
Возрасна категорија: 16 години
Влез бесплатен
ДЕНОВИ НА ШПАНСКИ ФИЛМ
17 НОЕМВРИ (ПЕТОК), 20:00 ч.
ТЕЗА ЗА ЕДНО УБИСТВО
(Tesis sobre un homicidio /Thesis on a Homicide)
Игран филм, Шпанија / Аргентина
2013, 106 мин., колор, ДЦП
Режија: Хернан Голдфрид (Hernán Goldfrid)
Сценарио: Патрицио Вега, по роман на Диего Пашковски, ( Patricio Vega, Diego Paszkowski)
Улоги: Рикардо Дарин, Наталија Сантијаго, Алберто Аман (Ricardo Darín, Natalia Santiago, Alberto Ammann)
Еден од стидентите на семинарот кој го води професорот Роберто Бермудез, експерт за кривично право, е и Гонзало, син на негови пријатели. Очигледно е дека енигматичното момче има некаков проблем со авторитети, бидјеќи постојано му пркоси на професорот. Нивниот однос станува поконфликтен кога на паркингот од кампусот ќе биде пронајдена убиена келнерката од кафетеријата во која свратуваат сите студенти. Според професорот, убиството е дело на психопат, но Гонзало се спротивставува на оваа теза. Истрагата поврзана со убиството се претвора во опсесија и за професорот и за студентот.
Возрасна категорија: 16 години
Влез бесплатен
ДЕНОВИ НА ШПАНСКИ ФИЛМ
18 НОЕМВРИ (САБОТА), 20:00 ч.
ЕЛ БОЛА
(El Bola / Pellet)
Игран филм, Шпанија
2000, 88 мин., колор, ДЦП
Режија: Ачеро Мањас ( Achero Mañas)
Сценарио: Ачеро Мањас, Вероника Фернандез (Achero Mañas, Verónica Fernández)
Улоги: Хуан Хозе Балеста, Пабло Галан, Алберто Хименез, Ана Вагенер (Juan José Ballesta, Pablo Galán, Alberto Jiménez, Ana Wagener)
ЕЛ БОЛА на Ачеро Мањас од 2000-та година е еден од најуспешните дебитански филмови во поновата шпанска кинематографија. Филмот е добитник на четири награди „Гоја“: за најдобро оригинално сценарио, најдобар нов актер, најдобар нов режисер и најдобар филм. Споредуван со 400 УДАРИ на Франсоа Трифо, филмот ни раскажува за Пабло, познат како „Ел Бола“, дванаесетгодишно момче од сиромашна населба во Мадрид со премногу строг татко кој често го тепа. Тој има малку пријатели сè додека не се запознае со Алфредо, новото дете во класот. Пабло се чувствува пријатно во топлата и грижлива атмосфера во семејството на Алфредо, што е во спротивност со неговото семејство и неговиот диктаторски татко. Искуството на Пабло со семејството на неговиот пријател го учи да се соочи со своите најлоши стравови.
Возрасна категорија: 16 години
Влез бесплатен
ДЕНОВИ НА ШПАНСКИ ФИЛМ
19 НОЕМВРИ (НЕДЕЛА), 20:00 ч.
СЕДУМ МАСИ ЗА БИЛЈАРД
(Azul y no tan rosa / My Straight Son)
Игран филм, Шпанија
2007, 116 мин., колор, ДЦП
режија: Грaсиjа Керехета (Gracia Querejeta);
сценарио: Давид Планел, Грасиja Керехета (David Planell, Gracia Querejeta);
улоги: Марибел Верду, Бланко Портиљо, Хесус Кастехон (Maribel Verdú, Blanco Portillo, Jesús Castejón)
Ангела и нејзиниот син Гиље патуваат во големиот град за да го посетат Лео, таткото на Ангела, за кој разбрале дека е болен. Меѓутоа, кога пристигнуваат во градот Лео е веќе починат, а Чаро, неговата љубовница, им раскажува за маките што стариот ги имал со својот бизнис во последно време. Имено, починатиот зад себе оставил сала со седум маси за билијард и неговото семејство треба да реши дали да ги продаде и со добиените пари да ги плати долговите, или да го заживее бизнисот и да си обезбеди егзистенција.
Возрасна категорија: 16 години
Влез бесплатен
ДЕНОВИ НА ШПАНСКИ ФИЛМ
20 НОЕМВРИ (ПОНЕДЕЛНИК), 18:00 ч.
ЏИНОТ
(Handia / The Giant)
Игран филм, Шпанија
2017, 114 мин., колор, ДЦП
Режија: Аитор Ареги, Јон Гарањо, Хозе Мари Гоенага (Aitor Arregi, Jon Garaño)
Сценарио: Карлос Саура (Aitor Arregi, Jon Garaño, Jose Mari Goenaga)
Улоги: Хосеба Усабијага, Енеко Сагардој, Ињиго Аранбуру, Рамон Агире, Аја Крузе (Joseba Usabiaga, Eneko Sagardoy, Iñigo Aranburu, Ramón Agirre, Aia Kruse)
Откако ќе биде ранет за време на отслужување на воениот рок, Мартин се враќа во своето родно село Алцо во Баскискиот регион на Шпанија. Таму открива дека неговиот помлад брат Хоакин израснал во вистински џин и во таа негова аномалија тој гледа извор на заработувачка. Двајцата браќа ќе тргнат на турнеја низ Европа и секаде онаму кадешто можат да заработат од необичноста на „џинот“. Мартин се надева дека ќе собере доволно пари за да замине во Америка, а Хоакин сака со парите да ја откупи семејната фарма и да се врати во родното село. Расте несогласувањето помеѓу нив, како што се влошува и здравјето на Хоакин, дијагностициран со „гигантизам“ од страна на европските доктори.
Сценариото е базирано на вистински настани и личности, а во филмот се говори на баскиски и шпански јазик. Во 2018 година ЏИНОТ освоил повеќе награди „Гоја“ (за сценарио, камера, монтажа, најдобар актер, итн.) и ја добил посебната награда на жирито на филмскиот фестивал во Сан Себастијан во 2017 година.
Возрасна категорија: 16 години
Влез бесплатен
ДЕНОВИ НА ШПАНСКИ ФИЛМ
20 НОЕМВРИ (ПОНЕДЕЛНИК), 20:00 ч.
ЕЛИЗА, ЉУБОВ МОЈА
(Elisa, vida mía / Elisa, My Love)
Игран филм, Шпанија / Куба / Велика Британија / Германија
1977, 125 мин., колор, ДЦП
Режија: Карлос Саура (Carlos Saura)
Сценарио: Карлос Саура (Carlos Saura)
Улоги: Фернандо Реј, Џералдин Чаплин, Норман Бриски, Изабел Местрес, Хоакин Инохоса (Fernando Rey, Geraldine Chaplin, Norman Briski, Isabel Mestres, Joaquín Hinojosa)
Елиза минува низ брачна криза и веќе девет години го нема видено својот татко Луис. По телеграмата што ја добива од сестра си Исабел, во која пишува дека нивниот татко е тешко болен, таа ќе појде надвор од Мадрид за да го посети. Ќе остане подолго време со него, ќе ги дознае причините зошто тој ја оставил мајка им пред многу години, но и самата ќе му раскажува за својот неверен сопруг кој ја измамил со најдобрата другарка. Кога Антонио, сопругот на Елиза, ненадејно ќе пристигне во куќата, таа веќе има решено што ќе прави понатаму во животот.
Фернандо Реј за улогата на Луис во ЕЛИЗА, ЉУБОВ МОЈА, ја доби наградата за Најдобар актер на Канскиот филмски фестивал во 1977 година, а Карлос Саура беше номиниран во категоријата за Најдобра режија.
Возрасна категорија: 16 години
Влез бесплатен
21 НОЕМВРИ (ВТОРНИК), 20:00 ч
МЕДИУМСКИ ФЕСТИВАЛ
РЕТРОСПЕКТИВА НА ПЕТРА ПАН ПРОДУКЦИЈА
24 НОЕМВРИ (ПЕТОК), 18:00 ч.
БАБИЧКИТЕ НА РЕВОЛУЦИЈАТА
(The Grandmothers of Revolution)
Документарен филм, Словенија / Куба
2006, 96 мин., колор, ДЦП
Режија: Петра Селишкар (Petra Seliškar)
Сценарио: Петра Селишкар (Petra Seliškar)
Филмот претставува интимна приказна за еден пар и нивните семејства кои имале слична судбина во периодот на Втората светска војна.
Тоа ги натера Петра и Бранд да го направат овој документарен филм, кој ги однесе во Словенија, Македонија и Куба, од каде што потекнуваат нивните баби и дедовци.
Филмот е полн со емотивни и комични елементи и нè воведува во верувањата во три различни идеологии. Ни прикажува е постојана битка за опстанок, која се обединува во гените на новата генерација – генерацијата создадена од филмаџиите и нивните деца.
Возрасна категорија: 16 години
Влезница: 150 денари
РЕТРОСПЕКТИВА НА ПЕТРА ПАН ПРОДУКЦИЈА
24 НОЕМВРИ (ПЕТОК), 20:00 ч.
ТЕЛО
(Telo / Body)
Документарен филм, Словенија / Германија / Македонија
2023, 92 мин., колор, ДЦП
Режија: Петра Селишкар (Petra Seliškar)
Сценарио: Петра Селишкар (Petra Seliškar)
Улоги: Уршка Ристиќ, Бојан Ристиќ, Мија Ристиќ (Urška Ristić, Bojan Ristić, Mija Ristić)
ТЕЛО е трогателна долгометражна приказна на режисерката Петра Селишкар која опфаќа две децении од чудесниот живот на Уршка, блиска пријателка на режисерката Селишкар, додека се бори со ретки автоимуни болести. Поранешен модел, а денес професионална пијанистка, Уршка се соочува со огромни предизвици, но никогаш не го губи својот нескротлив дух. Приказната обединува интимни разговори, лични архиви и креативни визуелни елементи за да ги истражи мистериите на човечкото тело и да ја разбере неговата суштина преку моќта на уметноста и пријателството. Бурно патување кон исцелување и самоприфаќање.
Возрасна категорија: 16 години
Влезница: 150 денари
РЕТРОСПЕКТИВА НА ПЕТАР ПАН ПРОДУКЦИЈА
25 НОЕМВРИ (САБОТА), 18:00 ч.
СЕ ПРАШУВАМ КОГА ЌЕ ТИ НЕДОСТИГАМ
( Mi chiedo quando ti mancherò / Wonder When You’ll Miss Me)
Игран филм, Италија / Словенија
2019, 90 мин., колор, ДЦП
Режија: Франческо Феи (Francesco Fei)
Сценарио: Кјара Барзини, Франческо Феи, Лука Инфаскели (Chiara Barzini, Francesco Fei, Luca Infascelli)
Улоги: Беатриче Грано, Клаудиа Марсичано, Драган Мишевски, Маруша Мајер (Beatrice Grannò, Claudia Marsicano, Dragan Mishevski, Marusha Majer)
СЕ ПРАШУВАМ КОГА ЌЕ ТИ НЕДОСТИГАМ е драмедија, бајка која се занимава со клучни теми – како што се тинејџерската нелагодност, важноста на волјата и моќта на сонот – раскажана со реализам и поезија.
Возрасна категорија: 16 години
Влезница: 150 денари
РЕТРОСПЕКТИВА НА ПЕТРА ПАН ПРОДУКЦИЈА
25 НОЕМВРИ (САБОТА), 20:00 ч.
МОЈОТ ПРЕВРТЕН СВЕТ
(Moj narobe svet / My world is upside down)
Документарен филм, Словенија / Македонија / Хрватска
2016, 74 мин., колор, ДЦП
Режија: Петра Селишкар (Petra Seliškar)
Сценарио: Петра Селишкар (Petra Seliškar)
Музички документарец за сестран уметник со сериозно оштетување на мозокот наречено разум.
Возрасна категорија: 16 години
Влезница: 150 денари
27 НОЕМВРИ (ПОНЕДЕЛНИК), 18:00 ч.
ГОЛЕМИОТ ЛЕБОВСКИ
(The Big Lebowski)
Игран филм, САД
1998, 117 мин., колор, 35мм
Режија: Џоел Коен, Итан Коен (Joel Coen, Ethan Coen)
Сценарио: Џоел Коен, Итан Коен (Joel Coen, Ethan Coen)
Улоги: Џеф Бриџис, Џулиан Мур, Стив Бушеми, Дејвид Хадлстон, Џон Тортуро (Jeff Bridges, John Goodman, Julianne Moore, Steve Buscemi, David Huddleston, John Turturro)
Џеф „The Dude“ Лебовски (игран од Џеф Бриџис) е опуштен, мрзелив и страстен играч на куглање од Лос Анѓелес. Тој е жртва на напад, во кој му го уништуваат неговиот скапоцен тепих. Дознава дека нападот е поради погрешен идентитет, го помешале со милионерот кој се вика исто како него – Џеф Лебовски. Бара реституција за својот уништен тепих и ги ангажира своите пријатели од кугланата да му помогнат.
ГОЛЕМИОТ ЛЕБОВСКИ е американски филм од 1998- година, напишан, продуциран и режиран од најпознатите браќа на современиот американски филм, браќата Џоел и Итан Коен. Филмот е крими-комедија, лабаво инспирирана од делата на Рејмонд Чендлер, со сложен заплет кој на крајот не е толку важен, колку што остава простор да се развијат широка лепеза на исклучителни и неверојатни (offbeat) карактери.
ГОЛЕМИОТ ЛЕБОВСКИ не поминува толку добро кај критика во времето кога се појавува. Но, со текот на времето, прераснува во култен филм, до таа мера што во 2005 година се основа движење/религија Дјудеизaм (Dudeism) која е посветена на ширење на филозофијата и начинот на живот на главниот лик во филмот. ГОЛЕМИОТ ЛЕБОВСКИ денес е еден од најпрепознатливите филмови на браќата Коен, каде се присутни сите елементи од нивниот стил: ексцентрични ликови, генијални комични секвенци и духовити идиосинкратични дијалози.
Возрасна категорија: 16 години
Влезница: 150 денари
РЕТРОСПЕКТИВА НА ПЕТРА ПАН ПРОДУКЦИЈА
27 НОЕМВРИ (ПОНЕДЕЛНИК), 20:00 ч.
ДЕНОВИ НА ЛУДИЛО
(Dani ludila / Days of Madness)
Документарен филм, Хрватска / Словенија
2018, 73 мин., колор, ДЦП
Режија: Дамиан Ненадиќ (Damian Nenadić)
Сценарио: Дамиан Ненадиќ (Damian Nenadić)
Улоги: Младен Бадјун, Леон Лучев, Маја Шќуканец (Mladen Badjun, Leon Lučev, Maja Šćukanec)
Преку партиципативниот метод на снимање филм, приказната нè води низ деинституционализацијата и социјализацијата на ментално болните лица.
Возрасна категорија: 16 години
Влезница: 150 денари
РЕТРОСПЕКТИВА НА ПЕТРА ПАН ПРОДУКЦИЈА
28 НОЕМВРИ (ВТОРНИК), 18:00 ч.
МАМА ЕВРОПА
(Mama Europa)
Документарен филм, Словенија / Македонија / Хрватска
2013, 90 мин., колор, ДЦП
Режија: Петра Селишкар (Petra Seliškar)
Сценарио: Петра Селишкар (Petra Seliškar)
МАМА ЕВРОПА е приказна за Европа видена низ очите на шестгодишната Тера. Родена на Балканот, но израсната како граѓанин на светот од татко со кубанско-македонско потекло и мајка со словенечки корени, малата Тера многу бргу учи што е тоа граница.
Возрасна категорија: 16 години
Влезница: 150 денари
РЕТРОСПЕКТИВА НА ПЕТРА ПАН ПРОДУКЦИЈА
28 НОЕМВРИ (ВТОРНИК), 20:00 ч.
АКО НИКОЈ НЕ СВИРИ
(If Nobody’s Playing)
Документарен филм, Македонија
2010 г., колор, 54 мин., ХД-видео
Сценарио: Ѓорѓи Јаневски
Режија: Ѓорѓи Јаневски
Возрасна категорија: 16 години
Влезница: 150 денари
