Со проекција на играниот филм ЛЕБ И ЧОКОЛАДО (Pane e cioccolata / Bread and Chocolate) на Франко Брусати (Franco Brusati), на 17 мај (понеделник), на сцената на летоното кино „Мирно лето“ со почеток во 20:00 часот започнува НЕДЕЛАТА НА ИТАЛИЈАНСКИ ФИЛМ.
Истата вечер, пред отворањето на овој филмски циклус Амбасадорот на Република Италија ќе го одликува директорот на Кинотеката Владимир Ангелов со значка и плакета на Витешкиот ред Ѕвезда на Италија – одликување кое го доделува италијанскиот Претседател по препорака на Министерот за надворешни работи на Италија за особени заслуги во промовирањето на италијанската култура и кинематографија во Македонија. Ангелов (р. 1968), инаку добро познат на културната јавност како уредник и селектор на филмски програми и во Кинотеката и на низа филмски фестивали во земјава, автор на многубројни стручни написи на полето на филмската критика, историја и теорија, со ова одликување ќе стане Витез на Витешкиот ред Ѕвездата на Италија (Cavaliere Dell’Ordine della Stella di Italia / Knight of the Order of the Star of Italy).
Филмот што ќе биде прикажан истата вечер, горчливата комедија на Брусати од 1973 (ЛЕБ И ЧОКОЛАДО) за неприлагоденоста на италијански економски емигрант во Швајцарија (улогата ја толкува Нино Манфреди), кој се обидува, но никако не може да се вклопи во швајцарскиот менталитет и постојано е во судир со полицијата бидејќи со неговиот нескротлив јужњачки темперамент ги вознемирува „студените“ Швајцарци, е вовед во тематската недела на италијанската кинематографија со емиграцијата како мотив.
Циклусот италијански филмови опфаќа наслови и теми поврзани со емигрантството – пред сè од економска природа, или печалбарството по нашки – кои се реализирани од врвните автори во период од половина век, од 70-тите до поновата продукција од првата деценија на новиот век.
Така на програмата ќе имаме можност да го видиме и ДА ВИ СЕ ПРЕТСТАВАМ? РОКО ПАПАЛЕО (Permette? Rocco Papaleo / My name is Rocco Papaleo, 1971) на стариот добар мајстор од епохата на неореализмот Еторе Скола (Ettore Scola), со Марчело Мастројани (Marcello Mastroianni) во насловната улога; реалистичната драма во манир на „шпагети-вестерн“ САКО И ВАНЦЕТИ (Sacco e Vanzetti) на Џулијано Монталдо (Giuliano Montaldo); наградуваниот НОВИОТ СВЕТ (Nuovomondo / Golden Door, 2006)на Емануеле Криалезе (Emanuele Crialese), визуелно стилизиран во фелиниевски клуч; социјалната комедија УБАВ, ЧЕСЕН ЕМИГРАНТ ВО АВСТРАЛИЈА БИ СЕ ОЖЕНИЛ СО ЧЕСНА СОГРАЃАНКА (Bello, onesto, emigrato in Australia sposerebbe compaesana illibata / A Girl in Australia, 1971) на Луиџи Ѕампа (Luigi Zampa), со актерските ведети Алберто Сорди, Клаудија Кардинале и Рикардо Гароне (Alberto Sordi, Claudia Cardinale, Riccardo Garrone) во главните улоги; уште една комедија, овој пат современата приказна ТРОБОЈКАТА ОДИ НА ГЛАСАЊЕ (Bianco, rosso e Verdone) на Карло Вердоне (Carlo Verdone); како и еден од најгледаните филмови во Италија последнава деценија, ДОБРЕДОЈДОВТЕ НА ЈУГ (Benvenuti al sud / Welcome to the South) на Лука Минеиро (Luca Miniero), кој се занимава со тн. „внатрешна емиграција“, односно вечниот судир меѓу италијанскиот Север и Југ.
Туѓина-јабана со неповторливиот италијански шмек, горчиво-комични приказни? Одличен предизвик за филмските сладокусци!
Коректно е и да ги известиме сите посетители, љубители на филмот и пријатели на Кинотеката дека во овој период на променлива временска состојба, го задржуваме правото да ја промениме локацијата на било која од филмските проекции, со цел истите да бидат одржани, а не одложени до некоја метеоролошки поповолна прилика.
Оттаму, во случај на дожд, некои од проекциите наместо во дворот и летното кино МИРНО ЛЕТО на Кинотеката, ќе се одржат на затворено, во кино-салата на Кинотеката.
Билетарата ќе биде отворена секој ден од 19:00 часот и проекциите се бесплатни и започнуваат во 20:00 часот.
Проекциите се одвиваат со целосно почитување на препораките за заштита од КОВИД-19.
ПРОГРАМА НА НЕДЕЛАТА НА ИТАЛИЈАНСКИОТ ФИЛМ – ФИНЕСТРА:
17 МАЈ (ПОНЕДЕЛНИК), 20:00 Ч.
ЛЕБ И ЧОКОЛАДО
(Pane e cioccolata / Bread and Chocolate)
Игран филм, Италија
1973, 115 мин., колор, ДЦП
Режија: Франко Брусати (Franco Brusati)
Сценарио: Франко Брусати, Јаја Фјастри, Нино Манфреди (Franco Brusati, Jaja Fiastri, Nino Manfredi)
Улоги: Нино Манфреди, Ана Карина, Џони Дорели, Уго Далесио (Nino Manfredi, Anna Karina, Johnny Dorelli, Ugo D’Alessio)
Горчлива комедија за неприлагоденоста на италијанскиот економски емигрант во Швајцарија Нино Гарофало (го игра Нино Манфреди). Нино е работник кој се обидува, но никако не може да се вклопи во швајцарскиот менталитет: постојано е во судир со полицијата бидејќи со неговиот нескротлив јужњачки темперамент ги вознемирува „студените“ Швајцарци.
Нино набргу запознава нови луѓе, наоѓа нови работни ангажмани, но мора пред сите ги сокрива неговото италијанско потекло. И покрај сè, не се откажува да ја „освои“ Швајцарија…
Режисерот Брусати (1920-1993) бил правник по образование, а кариерата ја започнал како новинар. Почнал да соработува како сценарист со режисерите Латуада, Роселини и другите претставници на италијанскиот неореализам, а како режисер дебитирал во 1956 со филмот ЈАС СУМ ГАЗДА (Il padrone sono me). Во неговата филмографија најзначајни наслови, освен ЛЕБ И ЧОКОЛАДО, се ДА СЕ ЗАБОРАВИ ВЕНЕЦИЈА (Dimenticare Venezia, 1979), кој бил италијански претставник за „Оскар“, НЕРЕД (Disordine, 1967), ДОБРИОТ ВОЈНИК (Il buon soldato, 1982)…
ЛЕБ И ЧОКОЛАДО ја освоил наградата „Сребрена мечка“ на Берлинале 1974, националните награди „Давид Ди Донатело“ во неколку категории, наградите на филмските критичари на Њујорк и Канзас (САД), а освоил и десетица други номинации.
Возрасна категорија: 14 години
Влезница: бесплатен влез
18 МАЈ (ВТОРНИК), 20:00 Ч.
ДА ВИ СЕ ПРЕТСТАВАМ? РОКО ПАПАЛЕО
(Permette? Rocco Papaleo / My name is Rocco Papaleo)
Игран филм, Италија
1971, 106 мин., колор, ДЦП
Режија: Еторе Скола (Ettore Scola)
Сценарио: Еторе Скола, Руџеро Макари (Ettore Scola, Ruggero Maccari)
Улоги: Марчело Мастројани, Лорен Хатон, Том Рид, Маргот Новак (Marcello Mastroianni, Lauren Hutton, Tom Reed, Margot Novak)
Роко Папалео (Мастројани) е простодушен и љубезен италијански емигрант кој пред 20 години пристигнал во САД со намера да направи успешна кариера како професионален боксер. Наместо тој сон, работи во еден рудник на Алјаска.
За време на едно патување во Чикаго со пријателите, со намера да се забавуваат во големиот град, Роко ќе се изгуби во градскиот метеж. Среќава разни живописни ликови, се запознава и со една убава девојка-манекенка (Хатон), но, не го наоѓа посакуваното гостопримство…
Еторе Скола (1931-2016) е еден од најмаркантните претставници на италијанската кинематографија од втората половина на минатиот век. Неговиот филм ЕДЕН НЕОБИЧЕН ДЕН (Una giornata particolare, 1977) – добитник на „Златниот глобус“ и беше номиниран Оскар; номинација за најдобар актер доби и Мастројани, со кого Скола често соработува – е меѓу најпознатите од 40-тината наслови во неговата кариера, во кои спаѓаат и ГРДИ, ВАЛКАНИ, ЗЛИ (Brutti, sporchi e cattivi, 1976), МНОГУ СЕ САКАВМЕ (C’eravamo Танто Amati, 1974), БАЛ(Le bal, 1983)… Скола е добитник на награди на престижните европски филмски фестивали во Венеција, Кан, Москва….
Возрасна категорија: 14 години
Влезница: бесплатен влез
19 МАЈ (СРЕДА), 20:00 Ч.
САКО И ВАНЦЕТИ
(Sacco e Vanzetti)
Игран филм, Италија / Франција
1971, 125 мин., колор/црно-бел, ДЦП
Режија: Џулијано Монталдо (Giuliano Montaldo)
Сценарио: Фабрицио Онофри, Џулијано Монталдо (Fabrizio Onofri, Giuliano Montaldo)
Улоги: Џан Марија Волонте, Рикардо Кучиола, Сирил Кјузак (Gian Maria Volontè, Riccardo Cucciolla, Cyril Cusack)
Уште еден репрезентативен претставник на италијанскиот неореализам. Сторијата на САКО И ВАНЦЕТИ – кој кокетира и со стилот на шпагети-вестернот – се базира на еден од најконтроверзните правни случаи во САД на почетокот на 20ти век.
Сако и Ванцети се италијански емигранти во САД. Тие се анархисти, обвинети за убиство од прв степен, и се неправедно осудени на смрт со погубување на електрична столица, но не заради злосторството (вооружен грабеж), туку заради нивните политички убедувања. Нивниот случај имал голем публицитет во САД како политички процес исполнет со антиемигрантски и антииталијански побуди…
САКО И ВАНЦЕТИ на Монталдо беше победник на Фестивалот на неореалистичен филм во Авелино (најдобар филм и најдобар актер- Кучиола); Кучиола ја доби и „Златната палма“, а Монталдо беше номиниран за престижната награда во Кан 1971.
Музиката во филмот е на легендарниот композитор Енио Мориконе (Ennio Morricone), а неколку песни исполнува пејачката Џоан Баез (Joan Baez).
Возрасна категорија: 14 години
Влезница: бесплатен влез
20 МАЈ (ЧЕТВРТОК), 20:00 Ч.
НОВИОТ СВЕТ
(Nuovomondo / Golden Door)
Игран филм, Италија / Франција
2006, 118 мин., колор, ДЦП
Режија: Емануеле Криалезе (Emanuele Crialese)
Сценарио: Емануеле Криалезе (Emanuele Crialese)
Улоги: Шарлот Гинзбур, Винченцо Амато, Винсент Скијавели (Charlotte Gainsbourg, Vincenzo Amato, Vincent Schiavelli)
НОВИОТ СВЕТ (или ЗЛАТНА КАПИЈА) е трет игран филм на Криалезе, римјанин со сицилијанско потекло. Како и во многу други наслови во италијанската кинематографија – впрочем, како и овој избор на наслови во Неделата на италијанскиот филм – Криалезе се занимава со феноменот на емиграцијата на Италијаните во светот на почетокот на 20 век.
Сторијата на Криалезе се занимава со познатата тема за емигрирањето на семејството на Салваторе Манкузо (Амато) од сиромашната Сицилија, полна единствено со празноверје, во новиот свет полн со ветувања – САД. Парувањето со брод е тешко и мачно, посебно во клаусрофобичното потпалубје, наменето за патници со најевтините билети. Кога така измрцварените патници ќе стигнат до ветената земја, ги очекуваат бесчуствителните службеници на островот Елис, таа „златна капија“ на САД, каде што треба да го поминат карантинот и бирократските процедури.
НОВИОТ СВЕТ е филм склопен во три визуелни делови: во првиот се истакнуваат поетските пејзажи на брдовитата и каменеста Сицилија и нејзините жители со паганските обичаи и верувања. Во вториот дел Салваторе, кој постојано сонува за Америка, и покрај жестокото противење на мајката (таа патријархална икона во медитеранските кинематографии) го распродава целиот имот. Во третиот, пак, на чекор до американското тло, се појавува мистериозната убавица Луси (Гинзбур), елегантна жена со мистериозно потекло, која делумно ќе ја насочи судбината на машките членови од семејството Манкузо…
НОВИОТ СВЕТ на Криалезе забележа педесеттина награди и номинации. Освен „Сребрениот лав“ во Венеција и неколку награди на независните жирија на тој фестивал, филмот на Криалезе триумфираше и на доделувањето на националните филмски награди „Давид Ди Донатело“ во Италија, потоа на фестивалот „Капри“ во Холивуд, „Златна кајсија“ во Ереван, Ерменија, и на десеттина други фестивали во светот.
Возрасна категорија: 14 години
Влезница: бесплатен влез
21 МАЈ (ПЕТОК), 20:00 Ч.
УБАВ, ЧЕСЕН ЕМИГРАНТ ВО АВСТРАЛИЈА БИ СЕ ОЖЕНИЛ СО ЧЕСНА СОГРАЃАНКА
(Bello, onesto, emigrato in Australia sposerebbe compaesana illibata / A Girl in Australia)
Игран филм, Италија / Австралија
1971, 113 мин., колор, ДЦП
Режија: Луиџи Ѕампа (Luigi Zampa)
Сценарио: Луиџи Ѕампа, Родолфо Сонего (Luigi Zampa, Rodolfo Sonego)
Улоги: Алберто Сорди, Клаудија Кардинале, Рикардо Гароне (Alberto Sordi, Claudia Cardinale, Riccardo Garrone)
Младата селанка Кармела (Кардинале) сака да побегне од сиромаштијата и проституцијата како единствен егзистенцијален излез, па ја прифаќа понудата на локалниот свештеник: да биде невеста во договорен брак со италијанскиот емигрант Амедео (Сорди) во Австралија и да се пресели на далечниот континент.
Амедео е телефонски техничар кој работи во тешко достапните предели на Австралија. Срамежлив каков што е, и девојките се тешко достапни за него. Сака да се ожени, па „нарачува“ невеста од родната Италија „по пошта“. Ја избира проститутката Кармела која не сака вече да се занимава со најстарата професија, но за да ја нанами во Австралија во писмото испраќа фотографија од неговиот другар Џузепе (Гароне), кој е поубав од него.
Кога Кармела ќе го добие писмото со брачната понуда и фотографијата од младоженецот, прифаќа да отпатува во Австралија. Но, кога ќе го запознае Амедео, одбива да се омажи за него: нејзиниот избор е Џузепе. Амедео мора да смисли начин да ја освои Кармела и да се ожени со неа…
Главните актери во оваа италијанска комедија со долг наслов ја освоија публиката и критиката: Клаудија Кардинале ја доби националната награда на италијанската кинематографија „Давид Ди Динатело“ за најдобра женска улога во 1972, а Алберто Сорди беше номиниран за најдобар актер од италијанскиот синдикат на филмските критичари.
Возрасна категорија: 14 години
Влезница: бесплатен влез
22 МАЈ (САБОТА), 20:00 Ч.
ТРОБОЈКАТА ОДИ НА ГЛАСАЊЕ
(Bianco, rosso e Verdone)
Игран филм, Италија
1981, 110 мин., колор, ДЦП
Режија: Карло Вердоне (Carlo Verdone)
Сценарио: Леонардо Бенвенути, Пјеро Де Бернарди, Карло Вердоне (Leonardo Benvenuti, Piero De Bernardi, Carlo Verdone)
Улоги: Карло Вердоне, Елена Фабрици, Ирина Санпитер (Carlo Verdone, Elena Fabrizi, Irina Sanpiter)
Карло Вердоне е режисер, сценарист и актер во оваа италијанска комедија. Сторијата говори за тројца Италијанци кои на денот на парламентарните избори одат да гласаат во нивниот роден град.
Пасквале е италијански емигрант кој живее во Минхен, Германија, и тргнува за гратчето Матера во Јужна Италија, среќен што ќе помине макар неколку дена во родниот крај, иако земјата од неговата носталгија е различна од реалноста. Фурио патува од Торино во Рим, па кога оди да гласа неговата сопруга Магда мисли дека сака да побегне од неа. Мимо, пак, е млад човек кој патува од Верона во Рим со неговата баба: тој е постојано загрижен за нејзиното здравје, додека баба му е сосем ладнокрвна…
Улогите на Пасквале, Фурио и ги игра самиот Вердоне. Продуцент на филмот е Серџо Леоне (Sergio Leone), а музиката е на Енио Мориконе (Ennio Morricone) и неговиот соработник Марио Брега (Mario Brega); оваа екипа претходно стана позната по композициите од „шпагети вестерните“, поточно по тн. „доларска“ трилогија.
Филмот на Вердоне забележа неколку номинации за наградата „Давид Ди Донатело“, а Елена Фабрици ја доби наградата на синдикатот на италијанските филмски критичари за најдобра млада актерка.
Возрасна категорија: 14 години
Влезница: бесплатен влез
23 МАЈ (НЕДЕЛА), 20:00 Ч.
ДОБРЕДОЈДОВТЕ НА ЈУГ
(Benvenuti al sud / Welcome to the South)
Игран филм, Италија
2010, 102 мин., колор, ДЦП
Режија: Лука Минеиро (Luca Miniero)
Сценарио: Масимо Гаудиозо, Дени Бун (Massimo Gaudioso, Dany Boon)
Улоги: Клаудио Бизио, Алесандро Сиани, Анџела Финокјаро (Claudio Bisio, Alessandro Siani, Angela Finocchiaro)
Алберто (Бизио) е поштенски службеник во малото гратче Брианѕи на северот на Италија. По наговор на неговата сопруга Силвија (Финокјаро) се обидува по секоја цена да добие преместување во Милано. Алберто ќе се обиде да се прикаже како инвалид, но ќе биде фатен во измамата, па по казна ќе биде префрлен со должност во мало место на југот од Италија.
Алберто е предубеден дека сите жители на италијанскиот Југ се мрзеливи и се поврзани со мафијата, бидејќи не им се работи чесно и напорно. Но, на сопствено изненадување, Алберто сфаќа дека многу добро се прилагодил во новата средина, дури и ужива таму, спријателувајќи се со новиот колега, поштарот Матио…
Минеиро (1967) по студиите на книжевност работел на бројни маркетиншки кампањи, радио и ТВ продукции со неговиот соработник Паоло Џеновезе (Paolo Genovese). По успехот со неколку кратки филмови во 2001, заеднички прават долгометражна верзија на еден од нив, НЕАПОЛСКА МАГИЈА (Incantesimo napoletano), а Минеиро подоцна ја продолжува режисерската кариера самостојно.
ДОБРЕДОЈДОВТЕ НА ЈУГ е најгледан филм во Италија во 2010, а освои десеттина награди и триесеттина номинации во земјата и светот: фестивалот „Капри“ во Холивуд, наградите „Давид Ди Донатело“, европски филмски награди, италијански „Златен глобус“…
Возрасна категорија: 14 години
Влезница: бесплатен влез
Leave a comment
Мора да се пријавите за да испратите коментар.