ПОЧИНА РЕЖИСЕРОТ БЕРНАРДО БЕРТОЛУЧИ

Славниот италијански режисер Бернардо Бертолучи (Bernardo Bertolucci) познат по класиците ДВАЕСЕТТИ ВЕК (1900, 1976 г.),  ПОСЛЕДНО ТАНГО ВО ПАРИЗ (Last Tango in Paris, 1972 г.), КОНФОРМИСТ (The Conformist, 1970 г.), МАЛИОТ БУДА (Little Buddha, 1993 г.), УКРАДЕНА УБАВИНА (Stealing Beauty, 1996 г.), ПОСЛЕДНИОТ ИМПЕРАТОР (The Last Emperor, 1987 г.), ЧАЈ ВО САХАРА (The Sheltering Sky, 1990 г.) и др., почина во Рим на 77-годишна возраст.

Бертолучи е роден Парма, Италија. Татко му Атилио бил историчар на уметност, филмски критичар и  пејач. Бернардо уште како тинејџер почнал да се занимава со литература, студирал книжевност во Рим, а потоа и со филмот: првото искуство му било како асистент на режисерот Пјер Паоло Пазолини.  Првиот филм МРАЧНИОТ УБИЕЦ (La commare secca, 1962 г.)  го снимил на 21 година, овој пат со Пазолини како негов асистент на режија. Подоцна оствари успешна кариера и во Европа и во Холивуд.

Неговите филмови не ретко предизвикувале контроверзи и скандали, како ПОСЛЕДНО ТАНГО ВО ПАРИЗ заради експлицитните сцени на секс. Последен филм му е ЈАС И ТИ од 2012 година.

Последно танго во Париз

Меѓу бројните награди, добитник е и на Оскари за сценарио и за режија за ПОСЛЕДНИОТ ИМПЕРАТОР во 1988 година.Филмот освои девет оскари, меѓу кои и за најдобар филм. Речиси и да не постои попознато актерско име со кое Бертолучи не соработувал. И неговиот помлад брат Џузепе Бертолучи (Giuseppe Bertolucci, 1947-2012 г.) се занимавал со филм како сценарист и режисер, често како асистент и косценарист во филмовите на Бернардо.

Бертолучи важеше и за одличен сценарист, па освен за дузина негови филмови, тој е еден од авторите на сценариото и на класикот БЕШЕ ЕДНАШ НА ДИВИОТ ЗАПАД (Once Upon a Time in the West, 1968 г.) на Серџо Леоне (Sergio Leone).

Пред два месеци, во рамките на цискусот филмови за 1968 г. во Кинотеката на Македонија беше прикажан неговиот филм СОНУВАЧИ (The Dreamers, 2003 г.).