1 МАРТ (ВТОРНИК), 20:00 ч.
2 МАРТ (СРЕДА), 20:00 ч.
5 МАРТ (САБОТА), 20:00 ч.
7 МАРТ (ПОНЕДЕЛНИК), 20:20 ч.
8 МАРТ (ВТОРНИК), 17:00 ч.
9 МАРТ (СРЕДА), 17:00 ч.
10 МАРТ (ЧЕТВРТОК), 17:00 ч.
11 МАРТ (ПЕТОК), 20:00 ч.
19 МАРТ (САБОТА), 20:00 ч.
28 МАРТ (ПОНЕДЕЛНИК), 20:00 ч.
31 МАРТ (ЧЕТВРТОК), 20:20 ч.

 

КУЌАТА ГУЧИ

(House of Gucci)

Игран филм, САД / Канада

2021, 158 мин., колор, ДЦП

Режија: Ридли Скот (Ridley Scott)

Сценарио: Беки Џонстон, Роберто Бентивења (Becky Johnston, Roberto Bentivegna)

Улоги: Лејди Гага, Адам Драјвер, Џереми Ајронс, Џаред Лето, Ал Пачино, Селма Хајек (Lady Gaga, Adam Driver, Jeremy Irons, Jared Leto, Al Pacino, Salma Hayek)

 

Сместен во 3 декади исполнети со љубов, предавство, елеганција, одмазда и конечно убиство, во овој филм, снимен според книгата на Сара Геј Форден (Sara Gay Forden), гледаме колку вреди името Гучи и колку далеку ќе оди едно семејство за да го контролира тој бренд. Филмот е инспириран од шокантната вистинска приказна за семејното царство што се крие зад италијанската модна куќа Гучи.

Приказната е фокусирана на внукот на легендарниот италијански дизајнер Гучо Гучи, Маурицио (Драјвер) и неговата бивша сопруга Патриција Реџани (Леди Гага). Реџани беше обвинета и осудена за планирање на убиството на својот бивш сопруг Маурицио Гучи, кој едно време беше главен шеф на модната куќа. Тој беше убиен од платен убиец пред својата канцеларија во 1995 и Реџани беше уапсена две години подоцна, за потоа да биде осудена на 29 години затвор. Реџани, која од медиумите доби прекар Црна Вдовица, беше ослободена во 2016 поради добро однесување.

Светската премиера на КУЌАТА ГУЧИ се случи во ноември 2021 година, на 100-годишнината од основањето на модната куќа. Филмот, чиј кастинг е (пре)полн со холивудски ѕвезди, досега забележа шеесетина номинации за награди, меѓу кои и три за британската награда БАФТА, и освои десетина награди.

 

Возрасна категорија: 16 години

Влезница: 150 денари

 

1 МАРТ (ВТОРНИК), 18:00 ч.

2 МАРТ (СРЕДА), 18:00 ч.

3 МАРТ (ЧЕТВРТОК), 20:00 ч.

4 МАРТ (ПЕТОК), 18:00 ч.

5 МАРТ (САБОТА), 18:00 ч.

 

ВОЛКОТ И ЛАВОТ

(Le loup et le lion / The Wolf and the Lion)

Игран филм, Франција / Канада

2021, 99 мин., колор, ДЦП

Режија: Жил д Местр (Gilles de Maistre)

Сценарио: Жил д Местр, Прун д Местр (Gilles de Maistre, Prune de Maistre)

Улоги: Моли Кунц, Греам Грин, Чарли Карик, Милен Дин-Робик, Еван Булиунг (Molly Kunz, Graham Greene, Charlie Carrick, Mylène Dinh-Robic, Evan Buliung)

 

По смртта на дедо ѝ, Алма одлучува да се врати во својот дом од детството, кој е своевидна оаза во срцето на непрегледните канадски шуми. Таа е своеглава студентка по музика и по погребот на дедо си решава да им се врати на семејните корени.

Во една прилика спасува две животинчиња, волкче и лавче: лавчето требало да заврши во циркус, а волкчето требало да биде плен на истражувачи. Алма создава неверојатна емоционална врска со нив, но набргу шумарот ќе ги открие животните и ќе ги одведе.

Лавот и волкот по извесно време ќе побегнат и треба да тргнат на опасно патување низ Канада за да се спојат меѓусебно, но и со нивната заштитничка – Алма.

ВОЛКОТ И ЛАВОТ ја освои наградата за најдобар филм за млади на Филмскиот фестивал во Цирих, Швајцарија.

 

Возрасна категорија: за сите возрасти

Влезница: 100 денари

 

3 МАРТ (ЧЕТВРТОК), 17:00 ч.

 

НАДЕЖ

(Håp / Hope)

Игран филм, Норвешка / Шведска / Данска

2019, 140 мин., колор, ДЦП

Режија: Марија Содал (Maria Sødahl)

Сценарио: Марија Содал (Maria Sødahl)

Улоги: Андреа Брајен Ховиг, Стелан Скарсгард, Ели Ријанон Милер Озборн (Andrea Bræin Hovig, Stellan Skarsgård, Elli Rhiannon Müller Osborne)

 

Односотмеѓу Ања (Ховиг) и Томас (Скарсгард), сценски уметници и партнери, ќе се смени откако на Ања ќе ѝ биде дијагностицирана тешка болест. Нивното заедничко семејство има комплицирани односи: два мали сина и една ќерка адолесцентка од нивната заедница и две возрасни деца од претходниот брак на Томас.

Ања се враќа дома по триумфална меѓународна турнеја на нејзината балетска претстава. Тогаш нејзиниот лекар ѝ дава тешка дијагноза: таа има неизлечлив тумор кој може да се поврзе со ракот на белите дробови од кој била успешно лекувана претходната година. Цврстата „супержена“ Ања не сака никому да ја соопшти таа вест освен на Томас. Следните неколку денови ќе ја тестираат силата на нивната врска повеќе од кој било друг предизвик со кој се соочиле…

Ховиг и Скарсгард ги освоија наградите за најдобри актери на Норвешката национална филмска асоцијација, а режисерката Судел ги освои наградите на публиката во програмите „Панорама“ и „Europa Cinemas“ на Берлинале 2020. НАДЕЖ освои и најмногу награди на филмскиот фестивал „Косморама“ во Тродхајм, а Судел и Ховиг беа номинирани и за наградата на Европската филмска академија.

 

Возрасна категорија: 14 години

Влезница: 100 денари

 

СЕЌАВАЊЕ НА АЛЕКСАНДАР ЏАМБАЗОВ

4 МАРТ (ПЕТОК), 20:00 ч.

 

МЕМЕНТО

(Memento)

Игран филм, Македонија

1967, 97 мин., црно-бел, 35 мм

Режија: Димитрие Османли (Dimitrie Osmanli)

Сценарио: Димитрие Османли, Јован Бошковски, Ташко Георгиевски (Dimitrie Osmanli, Jovan Boshkovski, Tashko Georgievski)

Улоги: Стево Жигон, Рената Фреискорн, Предраг Ќерамилац, Драги Костовски, Нада Гешовска, Петре Прличко, Тодор Николовски (Stevo Žigon, Renata Freiskorn, Predrag Ćeramilac, Dragi Kostovski, Nada Geshovska, Petre Prlichko, Todor Nikolovski)

 

Еден ден спроти земјотресот во Скопје 1963 година, се запознаваат Вили Милер, германски диригент на пропатување низ Македонија, и Јана, млада девојка, студентка. Нивната повторна средба е по неколку години, кога Вили Милер диригира еден концерт на „Средбата на солидарноста“ во Скопје. Тие неколку денови минати заедно се исполнети со своевидна реминисценција на Јана за доживеаната семејна трагедија, за нејзините лутања и барање начин повторно да се започне животот, запрен во денот на земјотресот. Можноста да замине со Милер е привлечна, но Јана останува во Скопје. Нејзиното место е покрај момчето за кое ја врзува вистинска љубов.

Кинотеката го прикажува филмот МЕМЕНТО во чест на неодамна починатиот маестро Александар Џамбазов, диригент и композитор, кој е автор на „Рапсодија за Скопје“ –  композиција за пијано и оркестар (1966) која е изведена филмот.

 

Возрасна категорија: 12 години

Влезница: бесплатен влез

 

7 МАРТ (ПОНЕДЕЛНИК), 18:00 ч.

14 МАРТ (ПОНЕДЕЛНИК), 18:00 ч.

15 МАРТ (ВТОРНИК), 20:00 ч.

21 МАРТ (ПОНЕДЕЛНИК), 20:00 ч.

22 МАРТ (ВТОРНИК), 20:00 ч. 

23 МАРТ (СРЕДА), 20:00 ч.

29 МАРТ ( ВТОРНИК), 18:00 ч.

30 МАРТ (СРЕДА), 18:00 ч. 

 

БЕНЕДЕТА

(Benedeta)

Игран филм, Франција / Белгија / Холандија

2021, 127 мин., колор, ДЦП

Режија: Пол Ферхуфен (Paul Verhoeven)

Сценарио: Пол Ферхуфен, Дејвид Бирк, Џудит Браун (Paul Verhoeven,  David Birke, Judith C. Brown)

Улоги: Виржини Ефира, Шарлот Ремплинг, Дафне Патакиа, Ламберт Вилсон (Virginie Efira, Charlotte Rampling, Daphne Patakia, Lambert Wilson)

 

Необичната приказна на БЕНЕДЕТА е сместена во 17 век, а главната хероина е калуѓерка во манастир во Тоскана, Италија, каде што започнува љубовна романса со друга калуѓерка. Филмот е снимен според книгата„Нескромни дела: Животот на лезбејската калуѓерка во ренесансната Италија“ (Immodest Acts: The Life of a Lesbian Nun in Renaissance Italy) на Џудит Браун, пионерската студијаод 1986 година за геј-сексуалноста и митологијата, и премиерно беше прикажан во конкуренцијата на Канскиот филмски фестивал 2021.

Калуѓерката Бенедета страда од вознемирувачки религиозни и еротски визии. Во реализирање на визиите ѝ помага придружничка, а врската меѓу двете жени прераснува во романтична љубовна врска. Бенедета е доведена во манастирот како осумгодишно девојче за да биде спасена од чумата која пустошела низ Европа. Осумнаесет долги години подоцна, додека застрашувачките шепотења на спорни чуда го скандализираат сестринството во манастирот, длабоко побожната Бенедета е пред тест на верата во облик на младата жена Бартоломеја, која побегнала од својот насилен татко. Двете се под будното око на циничната игуманија Фелисита, но меѓу нив се раѓа заемна привлечност како забрането овошје на интимноста, несовладливи желби и интензивни ѓаволски опсесии… Малкумина можат да се борат со вината и да излезат неповредени. Има ли бегство од гревот кога телото е непријател?

Пол Ферхуфен (р. 1938 во Амстердам, Холандија), математичар и физичар по образование – може и Верховен, како што го пишувавме порано – по холивудската кариера и славата стекната кон крајот на 1980-те и почетокот на 1990-те со РОБОКАП (RoboCop, 1987), ТОТАЛНО ОТПОВИКУВАЊЕ (Total Recall, 1990), ОСНОВЕН ИНСТИКТ (Basic Instinct, 1992) и ШОУ ДЕВОЈКИ (Showgirls, 1995), во новиот милениум се врати во Европа, снимајќи го ЦРНАТА КНИГА (Black Book) во 2006. БЕНЕДЕТА освен десетици фестивалски номинации за награди ја освои европската критика.

Возрасна категорија: 16 години

Влезница: 100 денари

 

8 МАРТ (ВТОРНИК), 20:00 ч.

ЈАС БЛАГА МИЦАНОВА

 (I, Blaga Micanova)

Документарен филм, Македонија

1977, 11 мин., колор, 35 мм.

Режија и сценарио: Вангел Чемчев – Лаки (Vangel Chemchev – Laki)

 

Документарецот на авторот Чемчев (сценарио, монтажа, режија) го следи животниот пат на БлагаМицанова, која како млада селска девојка, растејќи преку работните акции го остава селото  и станува прва жена во Македонија која работи со булдожер.

Филмот е добитник на специјалната диплома на Меѓународниот филмски фестивал во Лајпциг, (тогаш Источна) Германија.

 

СТАРАТЕЛСТВО

(Jusqu’à la garde / Custody)

Игран филм, Франција

2017, 93 мин., колор, ДЦП

Режија: Гзавие Легранд (Xavier Legrand)

Сценарио: Гзавие Легранд (Xavier Legrand)

Улоги: Леа Дрикер, Дени Меноше, Тома Џорија (Léa Drucker, Denis Ménochet, Thomas Gioria)

 

Антоан Бесон, разведениот сопруг на Миријам, е прекрасен маж, задолжен за безбедноста на една болница, го ценат и претпоставените и колегите. Освен тоа, тој е добар татко, кој сакајќи да биде поблизок со својот единаесетгодишен син Жилиен, избрал да биде префрлен во градот каде што момчето живее со мајка му и неговата постара сестра Жозефин. Токму тоа е причината поради која Антоан, грижливиот татко, бара заедничко старателство над Жилиен.

Сето тоа би било в ред доколку Антоан е всушност човекот за кој тврди дека е. Проблемот е што неговата сопруга и неговите две деца го гледаат во многу поинаква светлина. Во минатото, Антоан бил далеку од претставата за ангел. Напротив, тој често создавал атмосфера на постојан страв дома, одејќи дотаму што повремено ја тепал сопругата пред очите на своите деца. И се извлекол од таа ситуација лесно бидејќи Миријам, сакајќи да избегне уште повеќе проблеми, никогаш не поднела обвинение против него – факт што на крајот се свртува против неа. Затоа, и покрај фактот што Жилиен повеќе не сака да се гледа со својот татко, судијата на семејниот суд го исполнува барањето на Антоан…

ПРИТВОР освои четири национални француски филмски награди „Цезар“, како и награда на француската филмска критика. Во успешното портфолио на филмот на авторот Легранд забележани се уште дваесеттина награди од светските филмски фестивали.

 

Возрасна категорија: 14 години

Влезница: 100 денари

 

ВЕЧЕРИ НА ЖЕНСКИ ПРАВА

9 МАРТ (СРЕДА), 20:00 ч.

10 МАРТ (ЧЕТВРТОК), 20:00 ч.

 

 11 МАРТ (ПЕТОК), 18:00 ч.

14 МАРТ (ПОНЕДЕЛНИК), 20:20 ч.

15 МАРТ (ВТОРНИК), 18:00 ч.

21 МАРТ (ПОНЕДЕЛНИК), 18:00 ч.

22 МАРТ (ВТОРНИК), 18:00 ч.

23 МАРТ (СРЕДА), 18:00 ч.

 

ТРИУМФ

(Un triomphe / The Big Hit)

Игран филм, Франција

2021, 105 мин., колор, ДЦП

Режија: Емануел Куркол (Emmanuel Courcol)

Сценарио: Емануел Куркол (Emmanuel Courcol)

Улоги: Кад Мерад, Давид Ајала, Ламин Сисоко (Kad Merad, David Ayala, Lamine Cissokho)

 

Етјен е просечен актер со мал успех на сцените и, за да обезбеди основна егзистенција, прифаќа да води театарска работилница во еден затвор. Собира група затвореници кои се прилично талентирани, па Етјен предлага да ја направат претставата „Чекајќи го Годо“ од Семјуел Бекет на вистинска театарска сцена. Бекетовата драма не е случаен избор, бидејќи затворениците се во состојба бескрајно да чекаат на нешто добро во животот. И Етјен е во слична ситуација, очекувајќи поуспешна кариера.

Претставата е успешна и групата затвореници предводена од Етјен заминува на турнеја по Франција. Неговата главна преокупација е како ќе поминат пред пребирливата публика во Париз.

Филмот е инспириран од вистински настан од средината на 1980-те години во Шведска. Тамошниот актер и режисер Јан Јонсон ја поставил Бекетовата драма во строго обезбедуван затвор, но на премиерата во Гетеборг пет од шесте актери-затвореници побегнале пред самиот почеток на претставата…

Комедијата ТРИУМФ беше голем хит во француските киносали, имаше премиера на Канскиот филмски фестивал, освои неколку награди на европски филмски фестивали, на фестивалот „Викторија“ во Канада, а круната на успехот е наградата за најдобра комедија на доделувањето на Европските филмски награди. Францускиот актер од алжирско потекло Кад Мерад е популарен и успешен комичар чии филмови рушат рекорди на гледаност во киносалите.

 

Возрасна категорија: 14 години

Влезница: 100 денари

 

12 МАРТ (САБОТА), 18:00 ч. 

12 МАРТ (САБОТА), 20:00 ч. 

УЛИШТЕ

(Hive)

Игран филм, Косово / Македонија / Чешка / Луксембург / Албанија

2021, 84 мин., колор, ДЦП

Режија: Блерта Башоли (Blerta Basholli)

Сценарио: Блерта Башоли (Blerta Basholli)

Улоги: Јилка Гаши, Чун Лајчи, Аурита Агуши, Кумрије Хоџа, Адриана Матоши (Yllka Gashi, Çun Lajçi, Aurita Agushi, Kumrije Hoxha, Adriana Matoshi)

Фахрије е жена чиј сопруг e исчезнат уште од војната во Косово. Таа започнува мал земјоделски бизнис за да го прехрани своето семејство во традиционалното патријархално опкружување каде на нејзината амбиција да биде еманципирана не се гледа како на позитивна работа. Нејзиниот потфат започнува добро, освен пчелите во нејзиното улиште, кои се чини дека се хаотични и агресивни кон неа. Во своето патување да се помири со пчелите, таа започнува да прави мир и со самата себе, за да може да живее и да се зајакне во новата ситуација за да се соочи со многу непријателска реалност… Филмот се базира на вистинска приказна.

УЛИШТЕ е дебитантски филм на авторката Башоли и е трикратен добитник на награда на 38 филмски фестивал „Санденс“ во САД годинава, како и официјален косовски кандидат за наградата „Оскар“ за најдобар меѓународен филм.

 

Возрасна категорија: 12 години

Влезница: 100 денари

 

СЕЌАВАЊА: 79 ГОДИНИ ОД ТРАГИЧНАТА ДЕПОРТАЦИЈА НА МАКЕДОНСКИТЕ ЕВРЕИ ВО ЛОГОРОТ ТРЕБЛИНКА

13 МАРТ (НЕДЕЛА), 20:00 ч.

 

ЅВЕЗДЕНО НЕБО НАД РИМСКОТО ГЕТО

(Un cielo stellato sopra il ghetto di Roma / A Starry Sky Above the Roman Ghetto)

Игран филм, Италија

2020, 102 мин., колор, ДЦП

Режија: Џулио Базе (Giulio Base)

Сценарио: Џулио Базе, Израел Чезаре Москати, Марко Берета (Giulio Base, Israel Cesare Moscati, Marco Beretta)

Улоги: Џулио Базе, Доменико Фортунато, Паоло Фосо (Giulio Base, Domenico Fortunato, Paolo Fosso)

 

Филмот на Басе раскажува за едно од најтажните поглавја во историјата на човештвото, она на Холокаустот или како што Евреите го нарекуваат – Шоа (Shoah).

Осумнаесетгодишната Софија е надежна виолинистка и ќерка на меѓународно познат пијанист. На таванот на нејзината куќа наоѓа стар куфер со потресно писмо и една пожолтена фотографија од еврејско девојче, Сара Коен, родена во 1939 година. Нејзиното семејство било варварски убиено во логорот за истребување Биркенау.

Софија, заедно со група пријатели (двајца католици како неа, Тато и Валентина, и тројца Евреи, Рубен, Илан и Леа), одлучуваат темелно да истражат за да дознаат што се случило со тоа мало девојче, кое било посвоено…

ЅВЕЗДЕНО НЕБО НАД РИМСКОТО ГЕТО беше премиерно прикажан на 15-тото издание на Филмскиот фестивал во Рим во 2020, а во јануари 2021 по повод Меморијалниот ден на холокаустот на националната италијанска телевизија РАИ. Филмот на Базе учествуваше на десетина фестивали на филмови со еврејска тематика низ светот и беше победник на Jewish Film Festival 2021 во Лос Анџелес.

 

Возрасна категорија: 14 години

Влезница: бесплатен влез

 

 

 

УРЕДНИК СО ПРИЧИНА: ИЛИНА АРСОВА

16 МАРТ (СРЕДА), 20:00 ч.

 

ДОКУМЕНТАРЕН СЕРИЈАЛ „THIS IS HER STORY

Документарен филм, Македонија

2019, 15 мин., колор, ДЦП

Режија: Игор Христов (Igor Hristov)

Сценарио: Илина Арсова, Ванеса Беучер, Игор Христов (Ilina Arsova, Vanessa Beucher, Igor Hristov)

Учествуваат: Илина Арсова, Аргиро Папатанасиу, Флутура Ибрахими – Ута, Александра Тоткова (Ilina Arsova, Argyro Papathanasiou, Flutura Ibrahimi – Uta, Aleksandra Totkova)

 

Овој документарen серијал се состои од 4 кратки епизоди посветени на четири жени од регионот кои се вљубенички во адреналински спортови и планини, а учествувал на дваесетина меѓународни фестивали и има добиено 4 награди. Продуцент, автор, сценарист, драматург, автор на идејата, наратор, дизајнер на анимација и една од протагонистките е Арсова.

 

16 МАРТ (СРЕДА), 20:20 ч.

 

ИСПРАВИ СЕ, ДЕЛФИНА

(Stand up Straight, Delfina)

Игран филм, Македонија

1977, 101 мин., колор, 35 мм

Режија: Александар Ѓурчинов (Aleksandar Gjurchinov)

Сценарио: Александар Ѓурчинов(Aleksandar Gjurchinov)

Улоги: Неда Арнериќ, Диме Илиев, Слободан Димитриевиќ, Дарко Дамевски (Neda Arnerić, Dime Iliev, Slobodan Dimitrijević, Darko Damevski)

 

Приказна за девојката Делфина, која е решена да ги совлада сите оние тешкотии и разочарувања што ги носи со себе животот и да истрае во совладувањето на водите од каналот Ла Манш. Делфина се подготвува да го преплива каналот. Меѓу случајните минувачи е и Рене, инвалид во количка, кој го препливал каналот и сите пливачи ги испраќа на нивниот долг пат. Во бродот што ја придружува, покрај судиите, се нејзиниот тренер Атанас и пријателот Петко. Тоа се единствените луѓе што вистински ја сакаат Делфина и кои настојуваат да ѝ помогнат во остварувањето на подвигот.

Додека плива во разбранетото и студено море, Делфина се сеќава на изминатиот живот: како се запознава со Младен, тренерот на републичката репрезентација во пливање, за првите интимни контакти со него, за наставата во угостителското училиште и за членувањето во локалниот пливачки клуб. Кога еден ден добива стипендија за школување во ДИФ, Делфина не се двоуми и заминува за Скопје, зашто очекува од животот многу повеќе, и е решена ништо да не ја спречи во намерата да го осмисли својот живот и да го најде вистинскиот пат. Сите напори, сите достигнувања, сите падови и омаловажувања, Делфина ги надминува стоички. Препливувањето на Ла Манш ќе значи единствена можност Делфина да ја врати самодовербата, желбата за нормално живеење и самопочитта. Делфина ја води последната битка, со крајни напори се исправа на своите нозе и го постигнува невозможното…

Награди: 1977 ФЈИФ, Пула, Бронзена арена за режија на Александар Ѓурчинов; 1977 ФЈИФ, Пула, Награда за режијата од магазинот „Зум репортер“ на Александар Ѓурчинов; 1977 ФЈИФ, Пула, Сребрена арена за главна женска улога за Неда Арнериќ; 1977 ФФ, Врњачка бања, Специјална награда „Златник“ за актерот Слободан Димитриевиќ; 1977 ФФ, Врњачка бања, Трета награда за сценарио на Александар Ѓурчинов; 1977 ФФ, Ниш, Награда „Царица Теодора“ за најдобра женска улога на Неда Арнериќ; 1978 МФФ на спортски филмови, Париз, CIDALC…

 

Возрасна категорија: 12 години

Влезница: 100 денари

 

17 МАРТ (ЧЕТВРТОК), 18:00 ч.

 101 УЛОГА, 102 ЖИВОТИ, БАЈРУШ МЈАКУ

(101 Roles 102 Lifes, Bajrush Mjaku)

Документарно-игран филм, Македонија

2021, 82 мин., колор, ДЦП

Режија: Филип Херин (Filip Herin)

Сценарио: Филип Херин (Filip Herin)

Улоги: Бајруш Мјаку (Bajrush Mjaku)

 

Документарно-играниот филм се фокусира на животот и кариерата на Бајруш Мјаку, кој сè уште ги инспирира театрите на Балканот и во светот. Дипломирал актерска игра на Вишата педагошка школа во Приштина, 1973 година. Во 2014 година ја добива наградата „Ристо Шишков“ за најдобро актерско остварување, а во 2019 наградата за животно дело на МТФ „Војдан Чернодрински“.

Мјаку е ѕвезда во светот на театарската уметност, но малку познат надвор од професионалците и публиката во театарот: зошто продолжува да ги возбудува страстите? Овој брилијантен, надарен и визионерски актер, татко и дедо, ни ја претставува својата приказна која трае речиси половина век, исполнета со професионален успех и посветеност на семејството. Неговото актерство беше, е и ќе биде – негова мисија.

 

Возрасна категорија: за сите возрасти

Влезница: 50 денари

 

УРЕДНИК СО ПРИЧИНА: ИЛИНА АРСОВА

17 МАРТ (ЧЕТВРТОК), 20:00 ч.

 

ПЛАЖАТА

(The Beach)

Игран филм, В. Британија / САД

2000, 120 мин., колор, блуреј

Режија: Дени Бојл (Danny Boyle)

Сценарио: Џон Хоџ (John Hodge)

Улоги: Леонардо Ди Каприо, Тилда Свинтон, Вирџини Ледојен, Гијом Кане, Роберт Карлајл (Leonardo DiCaprio, Tilda Swinton, Virginie Ledoyen, Guillaume Canet, Robert Carlyle)

 

Дрзок млад американски патник е во потрага по егзотични искуства и ги води своите пријатели до таен островски рај на крајбрежјето на Тајланд, единствено за да дознае дека оние први што го откриле рајот, сакаат да го сочуваат за себе.
Ричард (ДиКаприо) е Американец кој патува низ Азија со група пријатели од Европа. Додека е во Бангкок, тој среќава еден луд Шкотланѓанец кој себеси се нарекува Дафи Дак. Кратко пред Дак да се самоубие, тој му дава на Ричард делумна мапа од едно место во Тајланд за кое тврди дека е рај на Земјата: убаво, незагадено и ненаселено. Немајќи што друго да прави, Ричард и неговите придружници се обидуваат да го лоцираат местото што, по едно опасно патување, ги носи до една плажа што е совршено прекрасна, токму онака како што ја опишал Дак. Ричард и пријателите се сместуваат, но наскоро тие откриваат дека не се сами; поголема група патници веќе се сместиле и основале заедница со истите социјални зла кои Ричард се надевал дека ќе ги остави зад себе…

Снимен според романот на Алекс Гарланд (Alex Garland), ПЛАЖАТА на Дени Бојл беше вистински кино-хит на почетокот на милениумот, зацврснувајќи ја актерската слава на Леонардо ДиКаприо.

 

Возрасна категорија: 14 години

Влезница: 100 денари

 

 18 МАРТ (ПЕТОК), 18:00 ч.

 

КОКИНО

(Kokino)

Документарен филм, Македонија

2019, 75 мин., колор, ДЦП

Режија: Владимир Митревски (Vladimir Mitrevski)

Сценарио: Билјана Станковска, Владимир Митревски, Сашо Миленковски (Biljana Stankovska, Vladimir Mitrevski, Sasho Milenkovski)

 

Документарниот филм КОКИНО ја раскажува историјата, археолошките откритија и мистериите на Татиќев Камен или Кокино, една од најстарите мегалитски опсерватории досега откриени во светот. Познато како „Македонскиот Стоунхенџ“, локацијата беше препознаена од НАСА во 2005 година како опсерваторија постара и далеку поважна од Мачу Пикчу. Локалитетот е света планина, а служел и како календар кој ги читал позициите на небесните тела. Која древна цивилизација ја адаптирала и користела оваа локација како опсерваторија за да ги следи движењата на Сонцето, Месечината и на Плејадите (познати и како „Седум сестри“ и „Месје 45“, а чие македонско народно име е „Квачка“) – расеаното ѕвездено јато на врели B-тип ѕвезди, северозападното соѕвездието Бик?

Филмот КОКИНО се обидува да одговори на ова, како и на многу други прашања.

 

Возрасна категорија: за сите возрасти

Влезница: 50 денари

  

УРЕДНИК СО ПРИЧИНА: ИЛИНА АРСОВА

18 МАРТ (ПЕТОК), 20:00 ч.

 

МОИ ПЕСНИ, МОИ СНИШТА

(The Sound of Music)

Игран филм, САД

1965, 172 мин., колор, блуреј

Режија: Роберт Вајс (Robert Wise)

Сценарио: Џорџ Хурдалек, Хауард Линдзи, Ернест Леман (George Hurdalek, Howard Lindsay, Ernest Lehman)

Улоги: Џули Ендрјус, Кристофер Пламер, Елеонор Паркер, Ричард Хајдн, Пеги Вуд, Чермијан Кар, Хедер Мензиес-Урих (Julie Andrews, Christopher Plummer, Eleanor Parker, Richard Haydn, Peggy Wood, Charmian Carr, Heather Menzies-Urich)

 

Легендарен холивудски мјузикл кој е базиран на вистинската приказна на Марија фон Трап и нејзината музичка група.

Дејствието се случува во 30-ите години на минатиот век во Австрија, период во кој некако се залечени раните од Првата светска војна, но над Европа веќе се надвиснува опасноста од нацизмот. Семејството на богатиот пензиониран офицер капетан Фон Трап има други проблеми. По прераната смрт на неговата сопруга, капетанот се обидува да биде примерен родител на неговите седум деца на возраст од 4 до 16 години.

Неговата професија ја пресликува во семејството, обидувајќи се да ги воспитува децата со војничка дисциплина. Меѓутоа, децата се поитри, па во нивните игри страдаат гувернантите, кои често се менуваат, не можејќи да го издржат притисокот. Еден ден во нивното семејство доаѓа нова гувернанта, убавата Марија, искушеничка во блискиот католички манастир. Марија треба да биде само привремено решение, бидејќи се наближува венчавката на капетанот со бароницата Елзи, која треба да стане новата мајка на седумте деца. Но, прекрасната личност на Марија не ги остава рамнодушни младите членови на семејството Фон Трап, ниту неговата глава, капетанот. Од друга страна, пак, нацистите се во експанзија и ја припојуваат Автрија кон Германија. Фон Трап како чесен војник и патриот не може да го прифати тој чин, па семејството Трап се подготвува да замине од земјата…

МОИ ПЕСНИ, МОИ СНИШТА е еден од најпопуларните мјузикли на сите времиња со одличен прием и кај публиката и кај критиката. Филмот доби пет „Оскари“ – меѓу нив и за најдобар филм и најдобра режија – два „Златни глобуса“ и десетина други престижни награди.

 

Возрасна категорија: за сите возрасти 

Влезница: 100 денари

 

МАКЕДОНСКИ КРАТКИ ИГРАНИ И АНИМИРАНИ ФИЛМОВИ

19 МАРТ (САБОТА), 18:00 ч.

28 МАРТ (ПОНЕДЕЛНИК), 18:00 ч.

 

ВО ПЛАВИ НОТИ

(Blue Key)

Анимиран филм, Србија / Македонија

2019, 9 мин., колор, ДЦП

Режија: Јелена Бешир (Jelena Bešir)

Сценарио: Јелена Бешир (Jelena Bešir)

 

Филмот ВО ПЛАВИ НОТИ ја отсликува врската помеѓу авторот и нејзината работа – музиката и анимацијата; филмот претставува судир помеѓу реалноста и имагинацијата, филм за гледање и слушање. Одејќи низ градот „таа“ е опколена од бучавата на градот и луѓето кои ја опкружуваат. Кога во една стара куќа здогледува една фигура, решава да ја однесе дома. Во моментот кога заспива, фигурата оживува…

 

ОБРАЗЕЦ Б-16

(Form B-16)

Анимиран филм, Македонија

2019, 9 мин., колор, ДЦП

Режија: Иван Ивановски ( Ivan Ivanovski)

Сценарио: Иван Ивановски ( Ivan Ivanovski)

 

Приказна за „малиот“ човек, заглавен во бирократскиот лавиринт, кој секогаш добива најмалку од сите. Тој човек издржува низа ситуации во системот на апсурдите и парадоксите кои немоновно произлегуваат од општествената динамика, а посебно од идеолошките и технократските управувања. Сепак, слободата и правото на индивидуалниот избор за начинот на живот во рамките на системот се и ќе останат врзани за личната одговорност за себе…

 

ШУМАРОТ

(A vokte fjellet / To Guard a Mountain)

Краток игран филм, Македонија / Норвешка

2012, 25 мин., колор, ДЦП

Режија: Изер Алиу (Izer Aliu)

Сценарио: Тор Хубро Стене (Tor Hubro Stene)

Улоги: Бурхан Амити, Бесим Муртезани, Алтин Аџани (Burhan Aliti, Besim Murtezani, Altan Axhani)

 

Горе во планините на Македонија, во едно мало село, Иса (10) е момче кое се обидува да биде маж, како неговиот татко. Откако една овца од домашното бачило ќе се изгуби, Иса е испратен од страна на неговиот татко да ја најде овцата. Неговиот помал брат му се придружува во потрагата. Студена и темна ноќ, обилни дождови… Удира гром и Хамид е повреден. Иса е соочен со дилема: дали треба да ја исполни својата одговорност кон татко си и да ја продолжи потрагата по овцата или треба да се грижи за својот брат и да го однесе дома?

 

 

ЗМИЈА

(Snake)

Краток игран филм, Македонија

2019, 20 мин., колор, ДЦП

Режија: Андреј Илиевски-Волкашин (Andrej Ilievski Volkashin)

Сценарио: Андреј Илиевски-Волкашин (Andrej Ilievski Volkashin)

Улоги: Ведран Делиџаков, Габриела Петрушева, Марјан Најдовски (Vedran Delidzakov, Gabriela Petrusheva, Marjan Najdovski)

 

Горчливо-слатка приказна за почетоците на пријателство помеѓу деветгодишниот јунак Марио и ексцентричното геј-момче Борче, соочено со стравот и предрасудите на родителите на Марио, во едно зафрлено македонско гратче.

 

КОЛИВО

(Kolivo)

Краток игран филм, Македонија / Бугарија

2018, 24 мин., колор, ДЦП

Режија: Андреј Илиевски-Волкашин (Andrej Ilievski Volkashin)

Сценарио: Андреј Илиевски-Волкашин (Andrej Ilievski Volkashin)

Улоги: Лабина Митевска, Јоана Поповска, Дејан Лилиќ, Симеон Дамевски, Ана Ангеловска, Ива Цонева, Дарко Јовановски,  Павел Атанасовски (Labina Mitevska, Joana Popovska, Dejan Liliкј, Simeon Damevski, Ana Angelovska, Iva Coneva, Darko Jovanovski, Pavel Atanasovski)

 

Филмот го отсликува секојдневието на Дана, чиј живот одеднаш се разоткрива кога на традиционалното коливо – варена пченица засладена со мед, се послужува на слава – ќе се појави нејзиниот поранешен љубовник Марко.

 

Возрасна категорија: 14 години

Влезница: 100 денари

 

 

 

НЕДЕЛА НА ФРАНКОФОНСКИ ФИЛМ

24 МАРТ (ЧЕТВРТОК), 20:00 ч.

РАБОТИТЕ ШТО ГИ КАЖУВАМЕ, РАБОТИТЕ ШТО ГИ ПРАВИМЕ

(Les choses qu’ondit, les choses qu’on fait / The Things We Say, the Things We Do)

Игран филм, Франција

2020, 122 мин., колор, ДЦП

Режија: Емануел Море (Emmanuel Mouret)

Сценарио: Емануел Море (Emmanuel Mouret)

Улоги: Камелија Жордана, Нилс Шнејдер, Венсан Макењ, Емили Декењ (Camélia Jordana , Niels Schneider, Vincent Macaigne, Émilie Dequenne)

 

Дафне е во третиот месец од бременоста, и со нејзиниот партнер Франсоа е на одмор на село. Тој мора да замине поради својата работа и Дафне се наоѓа сама да го пречека Максим, нејзиниот братучед кој никогаш не го запознала.

Четири дена, додека го чекаат враќањето на Франсоа, Дафне и Максим постепено се запознаваат и си кажуваат сè поинтимни доживувања поврзани со нивните минати и сегашни љубовни врски…

Филмот на Емануел Море беше дел од официјалната конкуренција на Канскиот филмски фестивал 2020, имаше 12 номинации за националната француска филмска награда „Цезар“, а ја доби Емили Декењ за најдобра споредна женска улога. РАБОТИТЕ ШТО ГИ КАЖУВАМЕ, РАБОТИТЕ ШТО ГИ ПРАВИМЕ победи на фестивалот во Фаро (островот најпознат како креативната оаза на Ингмар Бергман), беше најдобар според францускиот синдикат на филмските критичари и забалежа уште десетина учества на филмските фестивали низ Европа.

 

Возрасна категорија: 14 години

Влезница: 100 денари

 

 25 МАРТ (ПЕТОК), 20:00 ч.

 

СЕМЕЈСТВОТО

(La Mif / The Fam)

Игран филм, Швајцарија

2021, 110 мин., колор, ДЦП

Режија: Фредерик Бејлиф (Frédéric Baillif)

Сценарио: Фредерик Бејлиф (Frédéric Baillif)

Улоги: Чарли Ареди, Касиа Да Коста, Амандин Голај, Клаудија Гроб (Charlie Areddy, Kassia Da Costa, Amandine Golay, Claudia Grob)

 

Група тинејџерки се сместени во дом за згрижување и со нив работат социјални работници. Ова принудно „семејно“ искуство создава неочекувани тензии и интимности. Еден инцидент предизвикува синџир на прекумерни реакции, ги открива слабостите на застарениот систем за социјална грижа, и ги буди потиснатите стравови што ги прогонуваат овие малолетнички. СЕМЕЈСТВОТО е социјална драма, која го пресликува и лажниот морал на општеството.

Критиката за долгометражното филмско деби на Фредерик Бејлиф вели дека има директен и псевдо-документарен наратив, откривајќи ја емоционалната сложеност слој по слој. Филмот функционира како остра критика на погрешните вредности на современото општество, ги испитува траумите што нè обликуваат и е своевидна филмска репортажа за адолесценцијата.

СЕМЕЈСТВОТО учествуваше на Берлинале 2021 каде што ја доби наградата на интернационалното жири во програмата за младински филмови, на Филмскиот фестивал во Цирих (награда на екуменското жири и Golden Eye Award), беше најдобар филм на „Џифони филм фестивал“ и фестивалите во Наму и Ваљадолид, а на фестивалот во Анталија, Турција, ја доби наградата за најдобра актерка (Клаудија Гроб).

 

Возрасна категорија: 14 години

Влезница: 100 денари

 

26 МАРТ (САБОТА), 18:00 ч.

 

БОГОРОДИЦА ОД НИЛ

(Notre-Dame du Nil / Our Lady of the Nile)

Игран филм, Франција / Белгија / Руанда / Монако

2019, 93 мин., колор, ДЦП

Режија: Атик Рахими (Atiq Rahimi)

Сценарио: Атик Рахими, Рамата-Тулај Си (Atiq Rahimi, Ramata-Toulaye Sy)

Улоги: Аманда Мугабезаки, Албина Киренга, Малајка Увамахоро, Клариела Бизимана (Amanda Mugabezaki, Albina Kirenga, Malaika Uwamahoro, Clariella Bizimana)

 

Филмот е адаптација на истоимениот роман на Шоластик Мукасонга (Scholastique Mukasonga) од 2012 година, писателка од Руанда, чие семејство припаѓа на етничката група Тутси.

Дејствието на филмот е сместено во 1973 година и претставува портрет на полнолетството на група млади девојки од Руанда во католички интернат под белгиско управување. Филмот е инспириран од вистински настан што ќе го навести геноцидот во 1994 година за време на Граѓанската војна во Руанда меѓу племињата Тутси и Хуту, во која страдаа милиони луѓе, и е прв случај на Меѓународниот суд за воените злостортва во Хаг (т.н. Хашки трибунал). Повеќето од девојките припаѓаат на елитни семејства, додека другите имаат поскромно потекло. Понатамошната поделба се продлабочува истоврено со порастот на анти-Тутси реториката во земјата под владеење на Хуту. Состојбата во државата е тензична но во преден план на филмот е маѓепсувачката, а сепак скромна, приказна за отпорот кон колонијализмот, проследен со ситните пакости и љубопитноста на тинејџерите. Сепак, моментот бара поголе влог до сите учесници…

БОГОРОДИЦА ОД НИЛ беше победник во категоријата младински филмови на Берлинале 2020 и фестивалот „Џифони“, а забележа уште неколку номинации за награди на филмските фестивали во светот.

 

Возрасна категорија: 14 години

Влезница: 100 денари

 

29 МАРТ (ВТОРНИК), 20:00 ч.

МОЛЊА НАД ВОДА

(Nick’s Film – Lightning over Water)

Документарен филм, Западна Германија / Шведска

1980, 91 мин., колор, блуреј

Режија: Николас Реј, Вим Вендерс (Nicholas Ray, Wim Wenders)

Сценарио: Николас Реј, Вим Вендерс (Nicholas Ray, Wim Wenders)

 

Документарниот филм ги прикажува последните месеци од животот на култниот филмски режисер Николас Реј, најпознат по филмот БУНТОВНИК БЕЗ ПРИЧИНА (Rebel Without a Cause) од 1955 година со Џејмс Дин (James Dean) во иконичната улога.

Реј е еден од големите идоли на Вим Вендерс, и како почит кон неговото творештво му доделува мала улога во филмот АМЕРИКАНСКИ ПРИЈАТЕЛ (Der amerikanische Freund / The American Friend, 1977). Знаејќи дека Николас Реј е неизлечиво болен, Вендерс заедно со него го реализира последниот проект на авторот кој одлучил да се занимава со филм буквално до самиот крај на животот.

МОЛЊА НАД ВОДА е замислен како игран филм за еден смртно болен сликар кој заминува на патување во Кина, а Вендерс го документира тој проект. Но, бидејќи здравствената состојба на Реј многу се влошила и станал свесен дека нема да го доврши проектот, филмот се претворил во евоцирање спомени од неговиот живот и размислувањата на авторот за претстојната смрт…

 

Возрасна категорија: 14 години

Влезница: 100 денари

 

ФИЛМ ПО ИЗБОР НА ГЕТЕ-ИНСТИТУТ

30 МАРТ (СРЕДА), 20:00 ч.

 

ЗАПАДЕН ВЕТЕР

(Westwind)

Игран филм, Германија / Унгарија

2011, 90 мин., колор, блуреј

Режија: Роберт Талхајм (Robert Thalheim)

Сценарио: Иља Халер, Сузан Шимк (Ilja Haller, Susann Schimk)

Улоги: Фредерике Бект, Луизе Хајер, Франц Динда, Фолкер Брух (Friederike Becht, Luise Heyer, Franz Dinda, Volker Bruch)

 

Додека тренираат за првенството во веслање во летен камп во Унгарија во 1988 година, сестрите-близначки од Источна Германија се запознаваат со млади момци од Хамбург, тогашна Западна Германија, кои летуваат во истиот камп. На средбата на Истокот и Западот на некогаш поделената земја се тестира врската меѓу сестрите.

Филмот е заснован на вистинска приказна, а во реалноста сестрите биле ракометарки, а не веслачки. Една од двете вистински сестри Сузан Шимк е копродуцентка и косценаристка на филмот. Дистрибутерскиот наслов на филмот во Унгарија (земја копродуцент) е РЕТРО ЉУБОВ (Retró szerelem).

 

Возрасна категорија: 14 години

Влезница: бесплатен влез

 

31 МАРТ (ЧЕТВРТОК), 18:00 ч.

 

СИГУРНОСТ

(Sekuritas)

Игран филм, Швајцарија

2019, 117 мин., колор, ДЦП

Режија: Кармен Штадлер (Carmen Stadler)

Сценарио: Кармен Штадлер, Стефан Тојвизен (Carmen Stadler, Stephan Teuwissen)

Улоги: Катрин Вајт, Даниел Кацтура, Вилма Биери, Жан Девос, Дуреид Абас Гаиб (Kathrin Veith, Daniel Kasztura, Vilma Bieri, Jeanne Devos, Duraid Abbas Ghaieb)

 

Канцелариска зграда посакува да ѝ се случи љубовна приказна пред да ја урнат. За да ѝ се случи таква приказна избира осаменици, оние кои ја обезбедуваат зградата во ноќните часови, ги чистат тоалетите, експериментираат со рецепти или го вежбаат својот последен говор. Филмот на Штадлер е своевиден поетски и ексцентричен калеидоскоп во кој се рефлектираат копнежот, сигурноста и милозвучните звуци кои се движат низ целата зграда.

 

Возрасна категорија: 12 години

Влезница: 100 денари