Иницијативата на Асоцијацијата на европските кинотеки (ACE / Association des Cinémathèques Européennes) за бесплатно „онлајн“ прикажување на филмски бисери – продолжува со насловот БИДИ ПОДГОТВЕН! од Националниот чешки филмски архив – на 6 мај (четврток) во 17:00 ч. Во услови на „пандемија со ковид-19“, АЦЕ ги отвора архивите на 22 Кинотеки и прикажува архивски филмови „озвучени“ со современа музика, од декември 2020 до јуни 2021.

БИДИ ПОДГОТВЕН! (Be prepared! / Buď připraven!) е нем црно-бел филм од Националниот чешки филмски архив (Národní filmový archiv, Prague), во режија на Сватоплук Инеман (Svatopluk Innemann) од 1923 година, во траење од 62 минути. Сценариото е на Франтишек В. Кучера (Frantisek V. Kucera), а во главните улоги настапуваат: Карел Фиала, Луиса Ханкова-Кучерова, Васа Бенда, Отик Бенда, Франтишек Кучера, Ела Кучерова (Karel Fiala, Luisa Hanková-Kucerová, Vása Benda, Otík Benda, Frantisek V. Kucera, Ela Kucerová).

Филмот има едукативен карактер и неговата сторија ги прати активностите на група извидници во нивниот летен камп, во близина на замокот Орлик.Извидниците креираат разни игри и ги прикажуваат своите вештини.Тие, исто така, се грижат за повредената ќерка на сопственикот на објектот, каде што се поканети да престојуваат како награда.Летувањето на момчињата продолжува со разни видови извиднички активности, но летниот камп мора да заврши и момчињата се враќаат дома, во Прага. Нивното враќање е прикажано преку уникатните сцени на пловење со сплавови долж брзаците кај местото Свети Јован на реката В`лтава…

Главните актери во филмот се членовите на извидничкиот одред „Прага 5“, од 20-те години на минатиот век, кога извидничкото движење станува масовно движење во Средна Европа.Меѓу аматерските актери, во филмот имало и вработени од замокот Шварценберг.

Филмот беше дигитално реставриран во 2017-2018 година, со музичка придружба на „Wabi Experience“.

 

Leave a comment