Победникот на програмата „Заеднички проект за реставрација“ (Joint Restoration Project) на годинешниот Кански филмски фестивал е СЛИКИ ОД ЖИВОТОТ НА УДАРНИКОТ (Slike iz života udarnika / Pictures from the Life of a Striker; 1972) на босанскиот режисер Бахрудин Бато Ченгиќ (Bahrudin Bato Čengić)

Носител на проектот е Словенечката кинотека (Slovenska kinoteka), со партнерите: Австриски филомски архив, Хрватски државен архив и Сараевски филмски центар (Austrian Film Archive, Croatian National Archives, Sarajevo Film Center).

Асоцијацијата на европски кинотеки (Association of European Cinematheques ACE) го прогласи победникот на оваа програма и добитник на финансиската поддршка во Павилјонот на Европската унија минатата недела. Жирито кое одлучуваше за најдобриот проект беше составено од режисерот Сергеј Лозница (Sergei Loznitsa), директорката на филмската програма на ARTE Клаудија Троние (Claudia Tronnier) и директорот на Фестивалот на неми филмови во Порденоне, Џеј Вајсберг (Jay Weissber).

Филмот го прикажува времето на ударништвото по Втората светска војна во СФР Југославија и главниот херој, рударот Алија Сиротановиќ, чиј лик своевремено ги красеше и банкнотите на југословенкиот динар.

Ченгиќ во сторијата на сценаристот Бранко Вучучевиќ (Бранко Вучићевић) го следи Сиротановиќ (кому му е посветен филмот) од 1947 година, почетокот на урадничката работа, па се до неговото пензионирање.

Директорот на фотографија Карпо Година (Karpo Godina) ќе учествува во реставрацијата на филмот. Композитор на музиката е Бојан Адамиќ (Bojan Adamič), а главната женска улога ја толкуваше Штефка Дролц (Štefka Drolc); филмот делумно е сниман и во Словенија.