Синоќешното доделување на наградите „Оскар“ на Американската академија за филмски уметности и науки AMPAS (Academy of Motion Picture Arts and Science) во Лос Анџелес се врати на традиционалната локација, киното „Долби“. 94-тото доделување на престижните филмски награди беше обележано со неочекуваниот „минимален“, но значаен триумф на филмот КОДА на Сиан Хедер (Sian Heder), кој ги освои сите три статуетки од трите номинации, вклучувајќи ја и таа за најдобар филм.
Тоа, воедно, е и прв „Оскар“ за најдобар филм продуциран од стриминг-платформа („Епл ТВ+), а најозборуван момент на настанот е одглумениот инцидент кога актерот Вил Смит (Will Smith) – кој го доби„Оскарот“ за најдобра главна машка улога во КРАЛОТ РИЧАРД (KING RICHARD), каде што го игра таткото на тенисерките Ванеса и Винус Вилијамс – навреден од коментарите водителот на церемонијата, комичарот Крис Рок, за фризурата на сопругата Џејда Пинкет-Смит (главата и е ишишана до кожа заради алопеција-косопад), му удри шлаканица.
Најинтересните моменти од церемонијата
Трој Коцур (Troy Kotsur) од КОДА е првиот глув машки актер кој добил „Оскар“ (за споредна улога), а Аријана Дебосе (Ariana DeBose) доби „Оскар“ за споредна женска улога во мјузиклот ПРИКАЗНА ОД ЗАПАДНАТА СТРАНА (WEST SIDE STORY), односно за истата улога за која беше наградена Рита Морено пред 60 години (1962).
Џејн Кемпион (Jane Campion) доби „Оскар“ за најдобра режија, за вестернот МОЌТА НА КУЧЕТО (THE POWER OF THE DOG), и тоа беше единствена награда за амбициозната стриминг-платформа „Нетфликс“ од 12 номинации. Наградата повторно е во рацете на режисерка по минатогодишниот успех на Клое Жанг.
Кенет Брана (Kenneth Branagh) по седум номинации годинава се задоволи само со „Оскар“ за сценарио за неговиот автобиографски филм БЕЛФАСТ (BELFAST). Најдобра актерка е Џесика Честејн (Jessica Chastain) со улогата во ОЧИТЕ НА ТАМИ ФЕЈ (THE EYES OF TAMMY FAYE).
Најдобар странски филм е јапонскиот ВОЗИ ГО МОЈОТ АВТОМОБИЛ (Doraibu mai kâ /Drive My Car) на режисерот Рајусуке хамагучи (Ryûsuke Hamaguchi).
Сите награди на 94. доделување на „Оскарите“ можете да ги видите ТУКА.