IN MEMORIAM: ГОРДАН МИХИЌ (1938-2019)

Гордан Михиќ, еден од најзначајните филмски сценаристи на просторот на екс Југославија, почина вчера на 80годишна возраст.

Михиќ е (ко)сценарист на три македонски играни филмови: СРЕЌНА НОВА ’49 на Столе Попов (Златна арена за најдобро сценарио на филмскиот фестивал во Пула, 1986), КОНТАКТ на Сергеј Станојковски (2005) и ДЕЦА НА СОНЦЕТО на Антонио Митрикески (2014).

Владица Милосављевиќ и Мето Јовановски во сцена од „Среќна нова ’49“

Михиќ (1938, Мостар – 2019, Белград), ја почнал кариерата во 60те како новинар, автор на луцидни текстови во белградска „Борба“, а потоа во тандем со Љубиша Козомара ги напиша сценаријата на некои од најважните наслови на „црниот бран“, како КОГА ЌЕ БИДАМ МРТОВ И БЕЛ и БУДЕЊЕ НА СТАОРЕЦОТ на Живоин Жика Павловиќ.

Михиќ е еден од најплодните сценаристи, а неговиот опус бележи над 100 филмски и телевизиски филмови и серии. Во 70те години пишува сценарија за филмовите на авторите од тн. „Прашка школа“ во југословенската кинематографија, како Горан Паскаљевиќ, Емир Кустурица… а паралелно е потписник на најпопуларните телевизиски серии на Југословенската радиотелевизија. Михиќ беше и редовен професор на Факултетот за драмски уметности во Белград, каде што предаваше филмско сценарио.

Дел од неговата филмографија ги содржи и насловите ТУЃА АМЕРИКА, ЛАЖЛИВО ЛЕТО ’68, КАМИОНЏИИ, СИВИОТ ДОМ, БАЛКАН ЕКСПРЕС, ДОЈДЕ ВРЕМЕ ДА СЕ ПРОБА ЉУБОВ, ЈАГУАРОВ СКОК, ЗАБОРАВЕНИ, ТАНГО АРГЕНТИНО, ОТВОРЕНА ВРАТА, НЕМАЊИЌИ, РАНЕТА ЗЕМЈА…

Ивана, Гордан и Вера

Уште во периодот кога бил новинар, на еден од фестивалите во Пула ја интервјуирал актерската ѕвезда во успон Вера Чукиќ, која му станала сопруга, и со која ја имаат ќерката Ивана Михиќ, успешна актерка и во поново време и продуцентка. Вера Чукиќ ја играше главната улога (Цвета) во МАКЕДОНСКА КРВАВА СВАДБА на Трајче Попов (1967).